Хуссар Ирыстоны зонадон-иртасæн институт æмæ Уæрæсейы Зонæдты академийы материалон культурæйы институт сæ къухтæ æрфыстой æмгуысткæнынады тыххæй сразыдзинадыл. Уый тыххæй фехъусын кодта Хуссар Ирыстоны зонад-иртасæн институты директор Гаглойты Роберт.
Зонад-иртасæн институты директор куыд загъта, афтæмæй Хуссар Ирыстон æмæ Уæрæсейы Федерацийы ‘хсæн сразыдзинадыл къухтæ æрфыстæуыд, Уæрæсейы Федерацийы куырыхондæр археолог, историон зонæдты доктор, профессор Василий Любины сæдæ азон юбилейы цытæн Санкт Петербурджы ауагъдæрцæуæг конференци «Памятники Кавказа в контексте нижнего и среднего палеолита Евразии»-йы хайад исыны рæс-тæджы.
«Къухтæ фыст цы сразыдзинадыл æрцыдысты, уый реализацийы фæлгæтты рауæрæх уыдзæн æхсæнпаддзахадон зонадон æмгуысткæнынад, фæарфдæр уыдзæн, куыд быдырон фадыджы, афтæ археологийы æндæр фадгуыты æмæ музейты иртасынæдты фæсауæрцтæй иумиагæй алыварсонæй пайда кæнын», – загъта Гаглойты Роберт.
Уымæй дарддæр ма Гаглойы фырт банысан кодта, зæгъгæ, документ фæахъаз уыдзæн зонадон иртасынадтæ, симпозиумтæ æмæ æндæр равдыстытæ бацæттæ кæнынæн. Уыимæ иумæ ма сразыдзинад фæахъаз уыдзæн дыууæ уагдоны зонадон кусджыты – археологты, историкты, аивадзонджыты, реставраторты æмæ æндæрты тематикон фембæлдтытæ регуляронæй уадзынæн.
«Дыууæ фарсæй алкæцы дæр хæсджын у баххуыс кæна дыууæ уагдоны специалисттæн дæр ахæм тематикæйы куысты фæдыл, кæцы цымыдисон у дыууæ фарсæн дæр, уыимæ иумæ хъуамæ æххуыс кæна уыцы специалисттæн музейтæ, архивтæ æмæ йæ регионы археологон къахæнты бынæттимæ сæ зонгæ кæныны хъуыддаджы», – йæ ныхасмæ бафтыдта Гаглойты Роберт.
Конференцийы йæ хайадисты тыххæй дзургæйæ банысан кодта, Республикæ Хуссар Ирыстоны Президент Бибылты Анатолийы номæй Василий Любинæн Кады орден кæй радта, Хуссар Ирыстон æмæ Уæрæсейы Федерацийы адæмты ‘хсæн хæларадон ахастыты æмæ æм-гуысткæнынады рæзтмæ стыр хайбавæрд кæй бахаста, уый тыххæй, афтæ ма историон зонæдты фадыджы йæ лæггæдты тыххæй.
Хуссар Ирыстоны делегаци Любинæн радта РХИ-йы Парламенты Кады грамотæ дæр.
«Василий Любин у зынгæ археолог, уый зындгонд у раздæры Советон Цæдисы тыгъдады. Республикæйы зонадмæ йæ хайбавæрды тыххæй куы дзурæм, уæд банысан кæнын хъæуы, уый палеолиты дуджы Цхинвалы культурæ кæй байгом кодта, кæцы йæ рады нысан æрцыд ЮНЕСКО-йы æмвæзадыл», – загъта Гаглойты Роберт.
«Памятники Кавказа в контексте нижнего и среднего палеолита Евразии»-йы конференци сорганизаци кодта Уæрæсейы Зонæдты академийы Материалон культурæйы историйы институт, Паддзахадон Эрмитаж, Петр Великийы номыл Антропологи æмæ этнографийы музей (Кунсткамера) æмæ Санкт-Петербурджы паддзахадон университетимæ иумæ.
Comments are closed, but trackbacks and pingbacks are open.