Хуссар Ирыстоны скъолаты сфæлдыстадон коллективтæ систы XXIV Æппæтуæрæсейон фестиваль «Рождественская елка «Казачьи круг»-ы уæлахиздзаутæ. Уагъд æрцыд Мæскуыйы, зæгъгæ, фехъусын кодта къорды къухдариуæггæнæг Туаты Тамарæ.
«Горæт Цхинвалы 5-æм съолайы ахуыргæнæг Гæззаты Маринæйы разамындæй Цхинвалы 5-æм астæуккаг скъолайы вокалон коллектив «Мидбылхудт» æмæ ахуыргæнæг Санахъоты Агуындæйы разамындæй Бехъмары астæуккаг скъолайы хореографион коллектив «Хуры тын»-ы уæнгтæ систы фестивалы фыццаг къæпхæны лауреаттæ «хореографи» æмæ «вокалы» номинациты», – загъта Туаты чызг.
Йæ ныхæстæм гæсгæ, фестивалæй дарддæр скъоладзаутæн организаци æрцыд экскурси Мæскуымæ, историон парк «Уæрæсемæ истори»-мæ, афтæ ма Кремлы территоримæ. Сывæллæттæ бацыдысты Кремлы назбæласмæ, Успенаг аргъуанмæ, Чырысти Ирвæзынгæнæджы аргъуанмæ, Третьяковы галереямæ.
«Фестивалы хайад райсгæйæ скъоладзаутæ райстой ирд тæлмæнтæ. Цыппурсы каникултæ ацы аз уыдонæн уыдысты иууыл ирддæр æмæ зæрдылдаринагдæр», – банысан кодта Тамарæ. – Æмæ, кæй зæгъын æй хъæуы, æхсызгон у, нæ сывæллæттæ сæхи кæй равдыстой иттæг хорз æмæ сын фестивалы кæй уыдис ахæм æнтыстытæ».
Фестивалы сæйраг нысан уыд рæзгæ фæлтæры Уæрæсейы Федераци æмæ æввахс фæсарæнты территоритыл цæрæг æппæт адæмты традицитæ æмæ æгъдæуттæ бахъахъхъæныны бындурыл хъомыл кæнын.
Фестивалы хайад райстой 388 адæймаджы, уыдоны нымæцы Уæрæсейы Федерацийы регионтæй æмæ Хуссар Ирыстонæй сывæллæтты коллективтæ æмæ солисттæ.
Comments are closed, but trackbacks and pingbacks are open.