Цæгат Кавказы дислокацигонд Хуссар æфсæддон окруджы æфсады танкисттæ сахуыр кодтой хæстон машинæтæ доны бын скъæрын Владимиры областы полигон «Прудбой»-ы.
Хуссар æфсæддон окруджы пресс-службæйы куыд фехъусын кодтой, афтæмæй мæйы дæргъы цы ахуыртæ цыдысты, уым хайад райстой Республикæ Цæгат Ирыстон, Цæцæны Республикæ, Дагестан æмæ Хуссар Ирыстоны дислокацигонд баиугæндтæ æмæ æфсæддон хæйттæй 250 адæймаджы.
«Ахуырты пайдагонд æрцыд 40 иуæджы техникæйæ», – зæгъынц пресс-службæйы.
Уым куыд зæгъынц, афтæмæй Т-90А æмæ модернизацигонд Т-72БМ танкты экипажты ахуыртæ цыдысты, 5 метры йæ арф æмæ 100 метры йæ фæтæн кæмæн уыд, ахæм хиарæзт донмарæны.
«Бынтондæр цæст не ‘взæрста, ахæм уавæрты механик-скъæрæг прибортæм гæсгæ хъуамæ аскъæрдтаид машинæ тагъдад æнæ аивгæйæ, æнæрлæугæйæ æмæ цæхгæр æнæфæзилгæйæ, – загътой пресс-службæйы. – Танк доны бын скъæрыныл ахуыр кæнгæйæ доны сæрмæ баззайы æрмæстдæр уæлдæфисæн хæтæл æмæ ирд ленкгæнæг къоритæ, цæмæй танк цыран ис, уымæн сбæлвырдгæнæн уа бахъуыды рæстæджы».
Пресс-службæйы бæлвырдæй загътой, зæгъъгæ танкисттæ ифтонг уыдысты сæрмагонд аварион-ирвæзынгæнæн фæрæзтæй, изоляцигæнæн улæфæн аппараттæй ИП-5, кæцытæ сты танк æрлæууыны кæнæ дæлдон кæныны рæстæджы экипажы раирвæзын кæныны амал.
«Ацы фæрæз кæмæ уа, уыцы æфсæддонæн йæ бон у доны бын 1 сахат фæлæууын, – банысан кодтой пресс-службæйы. Уымæй дарддæр ма техникон дæлхæйтты æфcæддонтæ ахуыр кодтой æвирхъау цауы рæстæджы танчы доны бынæй сласыныл дæр. Цалынмæ доны бын машинæтæ скъæрынмæ уагъд æрцыдаиккой, уæдмæ уал æфсæддонтæ рацыдысты доны бын ленк кæныны ахуыртæ, цыран сæрмагонд дæлдонгæнæг танчы макетыл цайдагъ кодтой сæрмагонд противогазæй пайда кæныныл æмæ доны бын машинæйы змæлынгæнæн куы ахуысса, уæд машинæйæ раирвæзын кæныныл».
Comments are closed, but trackbacks and pingbacks are open.