Мах сæрыстыр кæмæй стæм, стыр кад кæмæн кæнæм, уыдон 76 азы размæ сæрибардзинад æрхастой фашизмыл фæуæлахиз уæвгæйæ. Ирыстоны ахæм хæдзар нæ баззад, кæцыйы къæсæрæй тохы быдырмæ нæ афæндараст сты нæ фæндвидар лæппутæ æмæ чызджытæ. Уыдонæй бирæтæ баззадысты тохы быдыры, бирæтæ та сахъатджынтæй, цæфтæй, фæлæ сæрыстырæй æрыздæхтысты сæ уæзгуытæм.

Абон махæн нæ æвæджиаг хæс у, цæмæй уыдон хъæбатырдзинад, Райгуырæн бæстæйыл æнувыддзинад рæгъмæ хæссæм, активон хайад исæм ацы рæсугъд æмæ ирд бæрæгбоны цытæн мадзæлтты.

Нæ цыбыр блиц-æрфарсты мах цымыдис кодтам Уæлахизы парад æмæ Æнæмæлгæ полчы хайад кæимæ исдзысты нæ респонденттæ, цахæм æнкъарæнтимæ æмбæлынц ацы бæрæгбоныл æмæ æндæр традицион фарстытæм.

Лохты Джамбулат – Паддзахадон телерадиокомпани «ИР» -ы информацион алæвæрдты редактор, Афганистаны хæсты ветеран, Республикæ Хуссар Ирыстоны сгуыхт журналист:

– Уæлахизы бæрæгбон мæнæн у бæрæгбонтæй иууыл ахсджиагдæр. Уый тыххæй нæ, æмæ æрмæст уæлахизы бон у, фæлæ ма мын у сæрыстырдзинады бæрæгбон дæр, уыцы хæсты уæлахизхæссæг советон солдат нæ адæмы лæгдзинад æмæ хъарудзинад кæй равдыста, уый тыххæй. Стыр Фыдыбæстæйон хæсты хайадисджытæй æз бирæты лæгæй-лæгмæ зыдтон, сæ къухы схъомыл дæн. Мæ ахуыргæнджытæй бирæтæ уыдысты фронты хайадисджытæ æмæ нæ уыдон скъолайы ахуыр кодтой хорз традицитыл, уымæн æмæ рацыдысты царды уæззау фæндæгтыл. Хъыгагæн, уыдонæй абон бирæтæ не ‘хсæн нал сты. Абоны онг ма дзы сæрæгас чи ис, уыдонæн сæ фылдæр сæ хайбавæрд уæлахизмæ хастой æххуысгæнæг дæлхæйтты.

Хистæры цæвиттоныл кæстæр ахуыр кæны. Æмæ æз чысылæй фæстæмæ хъуыды кæнын, ацы бæрæгбон-иу куы æрцæйхæццæ кодта, уæд – иу нæ зынаргъ фронтовиктæ сæ риутыл бакодтой сæ хорзæхтæ æмæ нæ зонгæ кодтой сæ хæстон фæндæгтимæ. Куырд куырдыл ахуыр кæны, æмæ хистæр фæлтæры цæвиттонтыл куы ахуыр кæной кæстæртæ, уæд уыцы бæстæйæн ис рæсугъд сомбон. Ме ‘взонджы рæстæджы цы патриотикон уроктæ уагъд цыд, хъыгагæн, ныртæккæ не скъолаты уыцы æмвæзадыл уагъд нал цæуынц. Мæ кары фæсивæдæй уæды рæстæджы алчи дæр тырныдта Фыдыбæстæйы раз йе ‘мбæстагон хæс сæххæст кæнынмæ. Æмæ кадимæ нæ службæйы хæс æххæст кодтам раздæры Советон Цæдисæй дарддæр, Афганистан æмæ æндæр бæстæты территоритыл.

Хъыгагæн, уæлахизхæсджытæ абон не ‘хсæн нал сты, уыцы мысынад уыдон нал хъæуы, уый хъæуы мах, кæстæр фæлтæры.

Нæ хæдзарвæндагæй тохы быдырмæ аивгъуыдтой 12 хæстоны. Уыдонæй фæстæмæ сæрæгасæй æрыздæхт се ‘мбис, иннæтсæхи нывондæн æрхастой бæстæйы сæрибардзинады сæрыл.

Гулиты Владимир – Ленингоры районы администрацийы сæргълæууæг:

– Стыр уæлахизы бæрæгбон, куыд æппæт Ирыстоны адæмæн, афтæ мæнæн дæр у сæрыстырдзинад, æхсар æмæ хъайтардзинады бон. Стыр æмæ уæзгæ у ирон адæмы хайбавæрд Уæлахизы хъуыддагмæ. Уымæн æмæ тохы быдырты сæхи æвдыстой хъæбатырæй. Рейхстагыл сæ къухфыстытæ чи ныууагъта, уыдон æхсæн уыдысты не ‘мфыдыбæстæйонтæ дæр. Стыр Фыдыбæстæйон хæст фæивта Советон Цæдисы цæрæг адæмты цард, бандæвта алы бинонтыл дæр.

Бузныг æмæ сæрыстыр дæн, сæрибар нын чи æрхаста, уыцы ветерантæй. Ирыстоны бирæ ис ахæм бинонтæ, кæцытæй хæсты быдырмæ ацыдысты æмæ сæрæгасæй нал æрыздæхтысты фæндзгай æмæ æвдгай æфсымæртæй дæр.

Стыр Фыдыбæстæйон хæсты хайад иста мæ мады фыд Гæгойты Дауыт æмæ йе ‘фсымæры цыппар фырты – Дауыт, Зураб, Мате æмæ Семен. Уыдон хæсты быдырмæ ацыдысты Ленингоры районæй. Хъæуы хистæр кары адæмы ныхæстæм гæсгæ, мæ мады фыд  Дауыт ныххæццæ Керч æмæ Белоруссийы онг. 1942 азы уый рарвыста фæстаг фыстæг хæдзармæ, уæдæй абоны онг Гæгойты хæдзарвæндагæй хæстмæ чи ацыд, уыдонæй ницы бæрæг ис. Ацы аз ныр фæндзæм хатт уыдон къамтæ рахæсдзыстæм «Æнæмæлгæ полчы» рæнхъыты, цæмæй та радон хатт ссарæм, уыцы æвирхъау хæсты быдыры чи фæмард æмæ фесæфт, уыдоны рухс нæмттæ. Афтæмæй мах кад кæнæм иумæйаг Уæлахизмæ стыр хайбавæрд чи бахаста, уыдонæн.

Цхуырбаты Татьянæ – Сывæллæтты барты фæдыл Президенты цур æххæстбарджын минæвар:

– 9 май мæнæн, иннæ бæрæгбонтæм абаргæйæ, у иууыл ахсджиагдæр æмæ зынаргъдæр,   æз æнкъарын сæрыстырдзинад æмæ нæ зынаргъ ветеранты сгуыхтдзинад. Нæ ветерантæм кæсгæйæ зæрдыл æрлæууы сæ хъæбатыр тох фашизмы ныхмæ, хæстон мелодитæ æмæ кино-нывтæм кæсгæйæ адæймаг ноджыдæр зæрдæйæ банкъары уæды уæззау хæстон азтæ. Уымæ гæсгæ æз ацы бæрæгбон нымайын сæрыстырдзинады бæрæгбоныл.

Азæй азмæ кадавар кæнынц Фыдыбæстæйон хæсты хайадисæг ветерантæ æмæ уый цахæмдæр уæззау уаргъ æвæры адæймагыл. Уыдон хъæбатырдзинад кæд чингуыты æмæ информацион фæрæзты фыст цæуы, уæддæр æй сæхи дзыхæй дзургæйæ адæймаг фылдæр æнкъары, уыцы морæгъуыз емынæйы ныхмæ тох.

Æз æрвылаз дæр, сæрибардзинад нын чи æрхаста, нæ уыцы буц ветерантæн кады нысанæн, мæ сывæллæттимæ рацæуын æмæ хайад райсын Æнæмæлгæ полчы.

Уазæгты Юри – Президенты Администрацийы Информацион-аналитикон управленийы сæргълæууæг:

– Ирыстон иумæйагæй, куыд йæ хуссар хайы, афтæ цæгаты дæр – баййæфта егъау зиæнттæ хæсты фæстиуæгæн. Фронтмæ цы ирон сагсур лæппуттæ фæцыд, уыдонæн сæ фылдæр нал æрыздæхт фæстæмæ.

Мæ бинонтæн цы зиæнттæ æрхаста Стыр Фыдыбæстæйон хæст, ууыл дзургæйæ мæ бон зæгъын у, æмæ мæ дадайы хистæр æфсымæр Абел фæмард 1944 азы Украинæйы Херсоны область сæрибаргæнгæйæ. Уый дæргъвæтин рæстæджы нымад цыд æбæрæг сæфтыл. Æмæ уый хынцгæйæ, æз ахсджиагыл нымайын, Æнæмæлгæ полчы куыст адарддæр кæнын, æбæрæгæй сæфт фронты хайадисджыты агурыны тыххæй. Иумиагæй сисгæйæ, ацы проект у тынг актуалон, фадат дæтты махæн не ‘ппæтæн дæр, цæмæй нæ хистæр фæлтæрты сгуыхтдзинæдтæ ма рох кæной æмæ ноджыдæр зæрдыл лæууын кæной, фашизмыл уæлахиз нæ къухты цахæм аргъæй бафтыд, уый.

Стыр Фыдыбæстæйон хæсты истори сфальсификацимæ бафæлвæрдтытæн æмæ Советон Æфсадæн саргъ кæныны хъуыддаджы уый тынг ахсджиаг у.

Æнæмæлгæ полчы проекты фæлгæтты цы акцитæ уагъд фæцæуы, уыдон æнæмæнгхъæуæг сты, цæмæй рæзгæ фæлтæр зонгæ кæной Стыр Фыдыбæстæйон хæсты хъайтартæ æмæ цаутимæ. Мах хæс ноджыдæр у, цæмæй нæ кæстæртæн æмбарын кæнæм нæ ветеранты сгуыхтдзинæдтæ, фылдæр информаци сын дæттæм уыцы хæсты тыххæй. Æрмæстдæр афтæмæй бахъахъхъæндзыстæм, тохы быдырты чи фæмард, уыдоны мысынад.

КЪÆБУЛТЫ Маринæ

ТАНДЕЛАТЫ Виленæ

Comments are closed, but trackbacks and pingbacks are open.