20 январы Хетæгкаты Къостайы номыл Хуссар Ирыстоны паддзахадон драмон театрмæ æрбацыд бирæ адæм, залы иунæг афтид бынат дæр нал баззад. Ам æвдыст цыдис зындгонд драматург Уильям Шекспиры уацмыс «Хивæнд чызг»-мæ гæсгæ æвæрд комедион спектакль. Ирон æвзагмæ йæ ратæлмац кодта Джусойты Нафи.

Спектакль бацæттæ кæнын æмæ йæ адæмы размæ рахæссыныл, спайда кæнгæйæ, хорз бакуыстой театры аивадон къухдариуæггæнæг, РХИ æмæ РЦИ-Аланийы аивады сгуыхт архайæг Дзуццаты Тамерлан, æвæрæг-режиссер Чилæхсаты Эдуард, нывгæнæг Санахъоты Мадинæ, кæфтыты æвæрæг Чилæхсаты Георги, режиссеры æххуысгæнæг Терашвили Тамарæ æмæ æндæртæ. Сæйраг ролтæ спектаклы сæххæст кодтой Хаситы Сослан æмæ Чохели Натия, афтæ ма дзы архайдтой Цоциты Никъала, Бестауты Мирослав, Дыгъуызты Жаннæ, Джиоты Сослан, Мæргъиты Ингæ, Тедеты Андрей, Гаглойты Эдуард, Куымæридтаты Батрадз, Элбачиты Рамаз, Пæррæстаты Дмитри æмæ ма нæ университеты театралон факультеты студенттæй цалдæр.

Нæ артистты архайдæй сценæмæкæсджыты зæрдæтæ кæй барухс сты, радон хатт та æнтыстджынæй кæй равдыстой сæ арæхстдзинад, уый ма бæрæг уыд уымæй дæр æмæ сын залы уæвджытæ рæстæгæй-рæстæгмæ кæй кодтой дæргъвæтин къухæмдзæгъдимæ.

Йæ хъуыды нын спектаклы тыххæй раргом кодта сценæмæкæсджытæй сæ иу — Æлборты Анжелæ. Уый банысан кодта, зæгъгæ, спектакль, рауад тынг цымыдисон, бирæ дзы уыдис хъуыдыджын æмæ хъæлдзæг фæлгонцтæ.

«Мах не ‘ппæт дæр сæрыстыр æнкъарæнтимæ арфæйы ныхæстæ дзурæм æвæрæг — режиссер, артисттæ æмæ ма спектакль бацæттæ кæныны хайад чи райста, æппæт уыдонæн»,- зæгъы театрдзау.

Банысан ма хъæуы, уый дæр, æмæ дарæс цæттæгæнæг Коцты Татьянæ дæр кæй равдыста æппæт йæ арæхстдзинад. Артисттыл сæ дарæс фидыдта хорз æмæ æвдыст цыдис, уацмыс цы рæстæг фыст æрцыдис, уыцы рæстæг.

                                                                                            ГÆЗЗАТЫ Иван