ХИПУ-йы исæн къамис райдыдта йæ куыст

Хуссар Ирыстоны Паддзахадон Университеты исæн къамис æрæвнæлдта абитуриенттæй куырдиæттæ исыны куыстмæ, — фехъусын кодта исæн къамисы бæрнон нымæрдар Генриетта Намшуридзе. «Знон 10 сахатыл мах æрæвнæлдтам, иу кæнæ иннæ дæсныйады фæдыл ахуыр кæныны фæнд кæмæ ис, уыдон куырдиæттæ исынмæ, — загъта къамисы нымæрдар. — Мах фæндон у, цæмæй нæм цæттæгонд абитуриенттæ æрбацæуой, сæ зæрдæйы фæндиаг дæсныйад равзарой, цæмæй фидæны хорз специалисттæ суой».

Уый банысан кодта, зæгъгæ, документтæ ист цæуынц боны æмæ фæсаууоны ахуыртæм.

«Боны ахуырмæ мах хонæм абитуриентты ахæм дæсныйæдтæм: «биологи æмæ хими», «Журналистикæ (ирон æвзаджы бындурыл), «фæсарæйнаг æвзаг» (англисаг æвзаг), «истори», «æхсæнадæмон ахастыты истори», «прикладон математикæ æмæ информатикæ», «ирон æвзаг æмæ литратурæ», «уырыссаг æвзаг æмæ литературæ», «райдиан ахуырады педагогикæ æмæ методикæ», «психологи», «кондадон æмæ æмбæстагон арæзтад», «арæзтады механизаци æмæ автоматизаци», «куыстуатты экономикæ æмæ разамынад („кризисы ныхмæ разамынад“-ы специализаци), „юриспруденци“, (коммерцион бындурыл)», — радзырдта Генриетта Нашмуридзе.

Уый ныхæстæм гæсгæ, фæсаууонмæ ахуыры нысангонд ис куыд бюджетон, афтæ коммерцион бындурыл ахуыр дæр. «Бюджетон бындурыл равзарæн ис ахæм дæсныйæдтæ, куыд: «биологи, скъолайы агъоммæйы педагогикæ» «ирон æвзаг æмæ литературæ», «уырыссаг æвзаг æмæ литературæ», «физикон хъомылад», «райдиан ахуырады педагогикæ æмæ методикæ», — бæлвырдæй загъта къамисы нымæрдар. Фæсаууонмæ ахуыры фидгæ дæсныйадтæм хауынц: «ПМУ — Паддзахадон муниципалон управлени» (астæуккаг æмæ уæлдæр ахуыры бындурыл), «финанстæ æмæ кредит» (уæлдæр ахуыры бындурыл), «истори» (уæлдæр æмæ астæуккаг ахуыры бындурыл), «æхсæнадæмон ахастытæ» (уæлдæр ахуыры бындурыл). Уымæй дарддæр ма нæм ис ахæм дæсныйадтæ, куыд: «автомобиль æмæ автомобилон хæдзарад» (уæлдæр æмæ астæуккаг ахуыры бындурыл), «арæзтад» ( уæлдæр æмæ астæуккаг ахуыры бындурыл), «фармаци» (уæлдæр æмæ астæуккаг ахуыры бындурыл), «юриспруденци» (уæлдæр æмæ астæуккаг ахуыры бындурыл), «психологи» (уæлдæр æмæ астæуккаг ахуыры бындурыл).

 

Comments are closed, but trackbacks and pingbacks are open.