10 июны Цхинвалы уыдис официалон цытджын  химæрайст Уæрæсейы боны — 12 июны бæрæгбоны цытæн, кæцыйы сорганизаци кодта Хуссар Ирыстоны Уæрæсейы Федерацийы минæварад.

Мадзалы хайад райстой РХИ-йы Президент Тыбылты Леонид, Хицауады Сæрдар Хъуылымбегты Доменти, Парламенты Сæрдар Бибылты Анатоли, республикæйы зонадон æмæ сфæлдыстадон интеллигенцийы минæвæрттæ, Хицауады, Парламенты уæнгтæ, æндæр официалон адæймæгтæ.

Республикæ Хуссар Ирыстоны Уæрæсейы Федерацийы Уæлвæткон æмæ æххæстбарджын минæвар Къарджиаты Эльбрус раарфæ кодта мадзалы хайадисджытæн бæрæгбоны — Уæрæсейы боны цытæн. «Абон Уæрæсе ис вазыгджын проблемæтæм рахизыны æмæ адаптацийы стадийы, кæцытæ сæвзæрдысты экономикæйы, дунеон финансты, политикæйы къабазы, — загъта минæвар. Фæлæ уæддæр ацы рæстæгыл мах хизæм фæдфæдылонæй, æдыхстæй æмæ аккагæй æмæ иттæг бæлвырд у, æввахс рæстæджы Уæрæсе кæй рахиздзæн фидар рæзты фæндагмæ». Йæ ныхæстæм гæсгæ Хуссар Ирыстоны кæддæриддæр стыр цытимæ нысан кодтой Уæрæсейы бон — 12 июнь. «Махæн уæлдай æхсызгон у дзурын уый тыххæй, æмæ æфсымæрон хæларадон бæстæ Хуссар Ирыстоны 12 июнь кæй у паддзахадон бæрæгбон, кæцыйы Хуссар Ирыстоны æппæт адæм нысан кæнынц Уæрæсемæ стыр цыты, уарзты æмæ бузныджы æнкъарæнтимæ. Уый тыххæй стыр бузныг Хуссар Ирыстоны разамынад æмæ республикæйы адæмæн».

Тыбылты Леонид дæр йæ рады раарфæ кодта æрæмбырдуæвджытæн Уæрæсейы боны сæраппонд. «Абон мах сымахимæ æрæмбырд стæм уый тыххæй, цæмæй кæрæдзийæн раарфæ кæнæм, Уæрæсейы 12 июны нысан чи цæудзæнис, уыцы стыр бæрæгбоны сæррапонд. Уый æрмæст Уæрæсейы нæ цæуы нысан, фæлæ бирæ æндæр рæтты дæр, кæцытæ хауынц, куыд фæзæгъынц, уырыссаг дунемæ æмæ ам дæр, кæй зæгъын æй хъæуы, мах сымахимæ, Хуссар Ирыстоны цæрджытæ дæр нысан кæндзысты ацы бон, уымæн æмæ мах дæр стæм уырыссаг дунейы иу чысыл хай æмæ нæ адæм æмæ республикæйы разамынад дæр кæддæриддæр кусдзысты Хуссар Ирыстоны территорийыл уырыссаг дуне фидардæр кæныныл». Уæрæсейы бон, Тыбылты Леониды ныхæстæм гæсгæ, у æппæтадæмон бæрæгбон. «Уый у Уæрæсейы стыр тыгъдады цæрæг æппæт адæмты национ бæрæгбон, кæцытæ иугонд сты хъысмæты историон иугъуызондзинад æмæ фидæнмæ тырнындзинадæй, — банысан кодта Президент. — Æмæ абон мæнæн мæ бон у фидарæй зæгъын, ацы фадат, ацы ресурстæ æмæ потенциал кæй сты стыр Уæрæсейы сæйрагдæр тых æмæ, кæй зæгъын æй хъæуы, бындур — паддзахады рæзтæн».

Президент ма банысан кодта, зæгъгæ, «хуссарирыстойнаг æмæ уæрæсейаг адæмты хæлардзинады тых Хуссар Ирыстоны цæрджытæн баххуыс кодта, цæмæй 2008 азы фервæзтаид морæгъуыз емынæйæ». «Æмæ мах сымахимæ иууылдæр цæрын райдыдтам сæрибар, нымад республикæйы æмæ, кæй зæгъын æй хъæуы, Уæрæсеимæ иумæ мах фидардæр кæнæм уыцы ахастытæ, кæцытæ махæн сты тынг зынаргъ æмæ кæцыты уæрæсейаг æмæ хуссарирыстойнаг фæрстæ исынц уæлдæрæй уæлдæр æмвæзадмæ», — кæронбæттæны загъта Тыбылты Леонид.

Дарддæр мадзалы хайадисджытæн организаци æрцыд бæрæгбонон фуршет.

Comments are closed, but trackbacks and pingbacks are open.