Фæфылдæр уыдзысты хъахъхъæнынады министрады службæгæнджыты мыздтæ
Хицауады рабадты рæстæджы РХИ-йы хъахъхъæнынады министр Марат Павлов уынаффæмæ раразмæ кодта къорд документы, кæцыты нысан сты, Хъахъхъæнынады министрады æфсæддонтæн сæ мыздтæ этапгай фылдæр кæныны тыххæй ивгъуыд аз Уæрæсейы Федерациимæ сæ къухтæ цы сразыдзинадыл æрфыстой, уый реализацийы фарстатæ.
Документты дзырд цæуы министрады службæгæнджыты мыздтæ фæфылдæр кæныны тыххæй уынаффæтæм ивындзинæдтæ бахæссыныл.
Министры ныхæстæм гæсгæ, ивгъуыд азы дæр райстæуыд ахæм уынаффæтæ, кæцыты фæстиуæгæн мыздтæ фæфылдæр сты 20 проценты. Сразыдзинады практикон реализаци уæрæсейаг фарс кæй æххæст кæны, уый фæстиуæгæн республикæйæн финансон хæрдзтæ нæ уыдзæн.
Сфидар кодтой цæрынæн хъæуæг минимум
Хуссар Ирыстоны цæрынæн хъæуæг минимумы бæрц 2023 азы фыццаг кварталы уыд 15 мин 192 сомы.
Экономикон рæзты министр Тадтаты Дзамболат куыд радзырдта, афтæмæй 2022 азы цыппæрæм кварталимæ абаргæйæ, цæрынæн хъæуæг минимум фæфылдæр 569 сом, кæнæ 3,8 проценты.
Цæрджыты удтæм æмæ социалон-демографион къордтæм гæсгæ, цæрынæн хъæуæг минимумы бæрц республикæйы уыд: куыстхъом адæймæгтæн – 16237 сомы, пенсиисджытæн – 12364 сомы, сывæллæттæн – 16102 сомы.
Цæрынæн хъæуæг минимум фидаргонд цæуы æрвылквартал дæр, æргътæ куыд ивынц, уымæ гæсгæ.
Снысан кодтой ног кадртæ
Министрты кабинет Знауыры районы администрацийы сæргълæууæджы хæдивæгæй снысан кодта Цхуырбаты Асанбеджы, Шавердаты Мараты йæ бынатæй кæй ссæрибар кодтой, уый тыххæй.
Бастдзинад æмæ массон коммуникациты фæдыл комитеты сæрдары хæдивæгæй снысан кодтой Битеты Сæрмæты. Йæ бынатæй ссæрибар кодтой Арæзтад, архитектурæ æмæ цæрæнуатон-коммуналон хæдзарады министры хæдивæг Гуыцмæзты Ильяйы.
2022 азы паддзахадон бюджет
Хицауады рабадты хорзыл банымадтой «2022 азы Республикæ Хуссар Ирыстоны Паддзахадон бюджет æххæст кæныны тыххæй» закъоны проект æмæ йæ арвыстой Парламентмæ.
Финансты министр Цæрикъаты Хъазбег куыд банысан кодта, афтæмæй республикæйы бюджет æххæст кæныны сæйраг параметртæ сты ахæм: æфтиæгтæ – 9331199,13 мин сомы, хæрдзтæ – 9592259,50 мин сомы, æфтиæгтæй хæрдзтæ фæфылдæр сты 261060,37 мин сомы.
Ивындзинæдтæ — хъалонты закъондæттынадмæ
Министрты кабинет хорзыл банымадтой «Республикæ Хуссар Ирыстоны Хъалонты кодексы дыккаг хайы 166 статьямæ ивындзинæдтæ бахæссыны тыххæй» закъоны проекты.
Финансты министр Цæрикъаты Хъазбег куыд загъта, афтæмæй закъоны проекты руаджы нормæмæ æркондæуыдзысты Хъалонты кодексы дыккаг хайы 166 статьяйы 5-æм пунктмæ гæсгæ Хъалонты кодексы дыккаг хайы 166 статьяйы 2, 3 пункттæ. Сфидаргонд ивындзинæдтæм гæсгæ, товартæ республикæмæ æрбаласгæйæ, НДС фыст цæудзæн æххæст бæрцæй иу рæстæджы.
Материалон æххуыс
Хицауады уæнгтæ аскъуыддзаг кодтой РХИ-йы Хицауады Фæсауæрцон фондæй æхцайы фæрæзтæ рахицæн кæнын, горæт Цхинвалы цæрæг Æлборты Муразик Отары фыртæн материалон æххуыс бакæныны нысанæн. Уымæн йæ исад бабын 2023 азы 19 марты зынгсивæрзты рæстæджы.
Районон администрациты бæстыхæйтты цалцæджы тыххæй фæткойтæ
Министрты кабинет сфидар кодта «Республикæ Хуссар Ирыстоны районты æмæ горæтты администрациты бæстыхæйтты æмæ арæзтæдты пъланон æмæ капиталон цалцæ-джы тыххæй куыстытæ сорганизаци æмæ æххæст кæныны фæткойтæ сфидар кæныны тыххæй» Хицауады уынаффæйы ивындзинæдтæ.
Арæзтад, архитектурæ æмæ цæрæнуатон-коммуналон хæдзарады министр Елдзарты Константин куыд банысан кодта, афтæмæй ивындзинæдтæ хъæуынц Уынаффæйы фæлгæтты куыстыты процесс фæхуыздæр кæныны тыххæй.
Сæрмагонд дарæс æмæ хицæнгæнæн нысæнттæ
Юстицийы министр Гаглойты Олег куыд банысан кодта, афтæмæй Тæрхондоны приставты службæйы кусджытæ 2022 азы паддзахадон службæйы ног хуызмæ кæй рахызтысты, уый фæстиуæгæн сæ формæйон дарæс дæр æмæ сæрмагонд чинтæм гæсгæ хицæнгæнæн нысæнтты дæр фидар кæны республикæйы Хицауад.
Уый бахынцгæйæ Хицауад сфидар кодтой РХИ-йы тыхæй æххæстгæнæн органы кусджыты формæйы дарæс, хицæнгæнæн нысæнттæ æмæ дзаумæйон исадæй ифтонгкæнынады нормæты тыххæй» Хицауады уынаффæйы проект.
Гуырдзыстонимæ арæныл хизын фæхуымæтæгдæр кæнын
Хицауад ивындзинæдтæ бахаста «Гуырдзыстонимæ Хуссар Ирыстоны паддзахадон арæныл хизыны фæтк фæхуымæтæгдæр кæнын сорганизаци кæныны тыххæй» Хицауады уынаффæмæ.
Фарсты фæдыл раныхас кодта РХИ-йы Паддзахадон æдасдзинады комитеты сæрдары хæдивæг Алиханты Валери.
«Паддзахадон арæныл хизыны фæстиуæгæн ныртæккæ хуымæтæгдæр хуызы пропуск райсыны тыххæй цæрæн пунктты цæрджытæ куырдиат бадæттынц РХИ-йы Паддзахадон æдасдзинады комитеты районон Аппаратмæ. Куырдиат бадæттыны æмæ пропуск райсыны процесс фæхуымæтæгдæр кæныны нысанæн Комитетмæ растдæр кæсы, куырдиæттæ райсын æмæ пропусктæ дæттыны хъуыддаг Дзауы æмæ Ленингоры районон администрацитæн бахæс кæнын.
Уыимæ иумæ комитет фæндон бахаста, цæмæй пропусктæ чи дæтты, уыдон мауал домой РХИ-йы æмбæстæгтæй райгуырды тыххæй бæлвырдгæнæнтæ.
Нæ уацх.
