Хицауады

2022 азы фыццаг æмбисы Паддзахадон бюджет сæххæcт кæныны тыххæй

Хицауады сæрдар Джуссойты Константины къухдариуæгадæй уагъд æрцыд Хицауады рабадт, цыран æруынаффæ кодтой ацы азы æхсæз мæйы дæргъы республикæйы паддзахадон бюджет сæххæст кæныны тыххæй хыгъдыл.

Финансты министрады хатдзæгтæм гæсгæ 2022 азы январь-июны Паддзахадон бюджеты сæйраг бæрæггæнæнты кассæйон æххæсткæнынад уыд: æфтиæгты фæдыл — 3 507 679,91 мин сомы (планон нысæнттæй 39,1 проценты), хæрдзты фæдыл — 3 450 806,04 мин сомы (планон нысæнттæй 35,4 проценты). Паддзахадон бюджеты профицит уыд 56 873,87 мин сомы.

Финансты министры хæстæ æххæстгæнæг Тыбылты Фатимæ йæ доклады куыд банысан кодта, афтæмæй республикæйы бюджет социалон æгъдауæй у орентацигонд, хæрдзты сæйраг здæхтытæ сты æнæниздзинад хъахъхъæнын, ахуырады фадгуытæ, куыстмыздтæ фæфылдæр кæнын сифтонг кæнын, афтæ ма инвестпроекттæн æмæ æдасдзинады фадыджы хъуагдзинæдтæн æхцайы фæрæзтæ рахицæн кæнын.

Республикæ Хуссар Ирыстоны Хицауады хорзæхты тыххæй

Республикæйы ахуырад æмæ зонады министрады хуыздæр кусджытæ хорзæхджын æр-цыдысты паддзахадон хорзæхтæй.

Цæсгомджын куысты æмæ бæрзонд профессионализмы тыххæй РХИ-йы Хицауады Кады грамотæтæй хорзæхджын æрцыдысты: Ахуырад æмæ зонады министры хæдивæг Лолаты Аслан Датойы фырт^; уæлæмхас ахуырад æмæ хъомылады хайады хистæр Джиоты Эльзæ Герасимы чызг^; ахуырадон уагдæтты материалон-техникон базæйы рæзты хайады консультант Гобозты Замирæ Отары чызг, афтæ ма Гаглойты Элиса Харитоны чызг, кæцы куыста Ахуырад æмæ зонады министры фыццаг хæдивæгæй æмæ сæрибар æрцыд йæхи куырдиатмæ гæсгæ.

Кадрон ивындзинæдты тыххæй

Хуссар Ирыстоны Культурæйы, Ахуырад æмæ зонады министрадты, афтæ ма горæт Цхинвалы æмæ Цхинвалы районы администрациты æрцыд кадрон ивындзинæдтæ.

Культурæйы министры хæдивæгæй нысан æрцыд Мамиты Григори Петры фырт. Уый размæ ацы бынаты куыста Къадзты Филипп Григорийы фырт.

Культурæйы министр Зæгъойты Рада куыд банысан кодта, афтæмæй Къадзты Филиппы йæ бынатæй ссæрибар кæныны уынаффæ ист æрцыд паддзахадон æмбæстагон службæйы куысты йæ кармæ гæсгæ.

«Къадзты Филипп у стыр фæлтæрддзинад æмæ бирæ лæггæдтæ кæмæн ис, ахæм курдит-джын адæймаг æмæ кусдзæн паддзахадон драмон театры», — загъта уый.

Горæт Цхинвалы администрацийы сæргълæууæджы хæдивæджы бынатмæ нысан æрцыд Джуссойты Васили Сергейы фырт. Уый размæ ацы бынаты куыста Джиоты Эндрик.

Цхинвалы районы администрацийы сæргълæууæджы фыццаг хæдивæгæй нысан æрцыд Цхуырбаты Алыксандр Юрийы фырт, æмæ ма ноджы иу хæдивæг ссис Кокойты Маирбег Юрийы фырт.

Уымæй уæлдай ма, Ахуырад æмæ зонады министры хæдивæджы бынатæй сæрибар æрцыд Гаглойты Элиса. Нысангонд æрцыдысты йе сгуыхтдзинæдтæ йæ профессионалон архайды.

Джуссойты Констанин министрадты æмæ ведомствоты къухдариуæггæнджытæй æрдомдта, цæмæй бæрнон ахаст дарой райсгæ кадрон ивындзинæдтæм, æмæ сын зæрдыл æрлæууын кодта республикæйы адæмы раз паддзахадон службæгæнджыты сæрмагонд бæрндзинады тыххæй.

Зæронд хиды æдасдзинады тыххæй

Хицауады уæнгтæ æруынаффæ кодтой горæт Цхинвалы зæронд хид сæхгæныны фарстыл, цæмæй йыл цæуыны бар мауал уа.

Хид æмбæлон нæу техникон регламенты домæнтæн æмæ экспертон хатдзæгтæм гæсгæ нал бæззы эксплуатацийæн.

Хицауады сæрдар Джуссойты Константин куыд банысан кодта, афтæмæй хиды æдасдзинады фарст у тынг ахсджиаг, уый тыххæй бæрндзинад хæссы Хицауад.

«Зæронд хиды æдасдзинады фарст боны фæткы рагæй ис. Цалынмæ кæройнаг уынаффæ райстам, уæдмæ мах фæхуыдтам специалистты, кæцытæ сарæзтой экспертизæ хиды конструкциты æппæт характеристикæтæ хынцгæйæ. Экспертты хатдзæгтæм гæсгæ, уый æмбæлон нал у дарддæры эксплуатацийæн», — загъта Джуссойты Константин, æмæ банысан кодта, зæгъгæ, хидыл æрцæугæ критикон деформацитæм гæcгæ хидæн реставраци æмæ реконструкцигæнæн нал ис.

Банысанчындæуыд, зæгъгæ, уый размæ Фаллагфарсы районы 125 цæрæджы, бахатыдысты Хицауадмæ коллективон куырдиатимæ ног хиды тагъдыл саразыны фæдыл уынаффæ райсыны тыххæй.

Рабадты ма фехъусын кодтой, горæт Цхинвалы администраци æввахс рæстæджы кæй сæхгæндзæн Зæронд хид.

Банысан кæнын хъæуы уый дæр æмæ ног хиды арæзтад, кæцы æддаг бакастæй уыдзæн раздæры хиды хуызæн, хаст кæй æрцыд 2022 азы Инвестпрограммæмæ.