Хæрзаудæн фонд «АМОНД» (йæ саразæг – г. Самарайы амалгæнджыты компани «Амонд»-ы минæвар – Хуыгаты Ростик, йæ директор – Челæхсаты Хъазбег) сиды конкурс зынгæ ирон фыссæг æмæ ахуыргонд, Хетæгкаты Къостайы номыл премийы лауреат, филологон зонæдты доктор Джусойты Нафийы номыл национ литературон преми райсыны тыххæй 2017-2018 азтæн.

Конкурсы, афтæ ма премийы фæдыл нæ уацхæссæг бахатыд фонды директор Челехсаты Хъазбегмæ, цæмæй йын йæ фарстытæн дзуапп радта.

– Кæд фæзындис Нафийы номыл преми?

– 2015 азы «Амонд»-ы фонды правлени фæндон рахаста, цæмæй  Нафийыл 90 азы кæй сыххæст, уый оххыл лæвæрд цæуа æрвыл аз дæр æртæ премийы, ирон æвзагыл фыст æмæ мыхуыргонд аивадон уыцмыстæн.

– Йæ сæйраг нысан цы у?

– Премийы бындурæвæрджытæ æмæ расидджытæн сæ сæйраг нысан у, ирон æвзагыл чи фыссы уацмыстæ, уыдонæн сæ курдиатджындæрты фарс балæууын, цæмæй сын Фонды премийы руаджы æххуыс цæуа уацмыстæ фæлдисынæн æмæ сæ мыхуыры рауадзынæн.

– Цахæм у преми райсыны уагæвæрд?

– Нафийы номыл преми райсынмæ кандидаты хъуамæ бавдисой сфæлдыстадон цæдистæ, зонад-иртасæг уагдæттæ æмæ сæ фæндиæгтæ хæссой премийы Фондмæ ахæм информаци бавдисгæйæ:

– премимæ кæй æвдисынц, уый цыбыр сфæлдыстадон биографи;

– фæстаг азты цы уацмыстæ сфæлдыста, уыдон нæмттæ, кæм æмæ кæд æрцыдысты мыхуыр æмæ сын мыхуыры цы аргъ æрцыдис литературон критикæйы.

– премимæ æвдыст цæуынц романтæ, уацаутæ, радзырдты æмбырдгондтæ, драмон æмæ поэтикон чингуытæ.

– премимæ æвдисæг организаци йæ фыстæгимæ хъуамæ бавдиса ноджы, сфæлдыстадон Цæдисы уынаффæ цы Суагъæйы уа, уый халдих. Фыстæгимæ хъуамæ уа фыссæджы уацмысы мыхуыргонд оригинал.

– бавдыст цæуынц иу авторы уацмыстæ. Коллективон фыст уацмыстæ премийы къамис тæрхонмæ нæ хæссы.

– премимæ бавдисæг уацмысы автор цы бынаты цæры, кæнæ цы бæстæйы æмбæстаг у, уымæн ницы нысаниуæг ис.

– премимæ бавдисæн ис æрмæст сæрæгас фысджыты куыстытæ.

– Премиты бæрцтæ цас  уыдзысты?

– Фыццаг преми уыдзæн 150 мин сомы, дыккаг преми – 100 мин сомы æмæ æртыккаг преми та – 50 мин сомы.

Конкурсы чи фæуæлахиз уа, уыдонæн лæвæрд цæудзæн премиимæ иумæ лауреаты диплом æмæ майдан Джусойты Нафийы хуызистимæ.

– Конкурсы жюрийы та чи сты?

– Конкурсы Жюрийы сконды сты Цæгат æмæ Хуссар Ирыстоны фысджытæ æмæ журналисттæ, зонадон интеллигенцийы минæвæрттæ, хæрзаудæн фонд «Амонды» кусджытæ. Уæлахиздзаутæ бæрæг цæудзысты сусæг хъæлæсæппæрстæй.

– Фæуæлахизуæвджытæ кæд райсдзысты сæ премитæ?

– Преми лæвæрд цæфудзæн 2018 азы сентябры мæйы кæрон, цытджын уавæры, æхсæнадон кусджыты, дзыллон информацийы, культурæ æмæ зонад, литературæ æмæ аивады зынгæ минæвæртты раз.

Фæнды ма мæ зæгъын уый дæр, æмæ  уыцы бон лæвæрд кæй цæудзысты номдзыд ирон поэт Плиты Грисы номыл премитæ. Сæ иу – ирон æвзаг æмæ литературæйы хуыздæр ахуыргæнæгæн (50 мин сомы) æмæ дыууæ преми та-ХИПУ-йы ирон филологийы факультеты хуыздæр студенттæн (фæйнæ 25 мин сомы).

 

Уацмыстæн премимæ бавдисæн ис 2018 азы 12-æм сентябр-мæ мæнæ ахæм адрисыл: г. Цхинвал, Исахъы уынг, 47 агъуыст, 2-аг уæладзыг, хæрзаудæн фонд «Амонд».

Тел: 8-929-805-30-94

Comments are closed, but trackbacks and pingbacks are open.