Хайад райста æдасдзинады фæдыл конференцийы

23-25 апрелы Мæскуыйы куыста Æхсæнадæмон æдасдзинады фæдыл æстæм мæскуыйаг конференци, кæцы сорганизаци кодта Уæрæсейы Федерацийы Хъахъхъæнынады министрад. Конференцимæ æрцыдысты 111 бæстæйы хъахъхъæнынады министртæ, генералон штабты сæргълæуджытæ, æхсæнадæмон организациты къухдариуæггæнджытæ.

Мадзалы уынаффæ цыд глобалон æмæ регионалон стабилондзинады проблемæтыл.

Хуссар Ирыстонæй форумы хайад райста РХИ-йы Хъахъхъæнынады министр, инæлар-лейтенант Гассеты Ибрагим.

Пленарон рабадты уынаффæйы темæ уыд «Æхсæнадæмон фидауынад: ног амæлттæ æмæ хæстон æмгуысткæнынад».

Хуссарирыстойнаг министр куыд банысан кодта, афтæмæй æвзонг Республикæ Хуссар Ирыстон – Паддзахад Аланийæн фидауынкæнынад ссис скъуыддзаггæнæн фактор, кæцы хуссайраг ирæтты сифтонг кодта сæрибардзинад æмæ æдасдзинадæй.

«1990 азы декабры, уæды закъондæттынад фехалгæйæ, Гуырдзыстоны парламент скуынæг кодта Хуссар Ирыстоны автономон областы статус. Фæстæдæр уый Хуссар Ирыстоны  æркодта бирæнымæц уды зиæнттæм æмæ гуманитатон катастрофамæ», – загъта министр.

Гассеты Ибрагим радзырдта, 2008 азы размæ Хуссар Ирыстоны уавæр куыд уыд, уæрæсейаг фидауынгæнæг тыхты хайадистæй гуырдзиаг боевиктæ Хуссар Ирыстонæй сырд куы баййæфтой,  уыдæтты тыххæй.

«ССР Цæдисы ныппырхы фæстæ гуырдзиаг-ирон конфликт æрбæстон кæнын уыд Уæрæсейы фыццаг фидауынгæнæн операци, – банысан кодта Гассейы фырт.  – Алы адæмæн дæр ис хæдуагæвæрды бар, кæцыйæ спайда кæнын махæн нæ бон нæ бацис Советон Цæдисы ныппырхы фæстæ, Гуырдзыстоны аххосæй».

Хъахъхъæнынады министры фидарæй уырны, зæгъгæ, растдæр Уæрæсейы хихæццæкæнынады руаджы, фæстæдæр та 2008 азы 26 августы республикæйы хæдбардзинады банымайыны руаджы Хуссар Ирыстонæн бантыст сабырæй, сæрибарæй, суверенонæй рæзын.

«Хуссар Ирыстон æмæ Абхазы хæдбардзинæдты Уæрæсе куы банымадта, уый фæстæ сабырдзинады æмбарынад рахызт æндæр æмвæзадмæ», – загъта Хъахъхъæнынады министр.

Æхсæнадæмон æдасдзинады фæдыл мæскуыйаг конференци 2012 азæй фæстæмæ уагъд цæуы æрвылаз дæр. Форумæн азæй азмæ фидар кæны авторитетон фæзуаты йæ роль, цыран фæуынаффæ кæнынц æхсæнадæмон æдасдзинады актуалон проблемæтыл æмæ традиционæй стыр цымыдисдзинад æвзæрын кæны, куыд Уæрæсейы, афтæ фæсарæнты дæр.