25 апрелы уыд Хицауады æмбырд Президент Гаглойты Аланы къухдариуæгадæй. Хайад дзы райстой Хицауады Сæрдар Джуссойты Константин, йæ хæдивæг – Экономикон рæзты министр Тадтаты Дзамболат, Уæрæсейы Федерацийы Хуссар Ирыстоны базарады минæвар Гогинов Таймураз, районты администрациты сæргълæуджытæ æмæ æндæр официалон адæймæгтæ.
Министрты кабинет уынаффæ кодтой Кавказы инвестицион равдысты Хуссар Ирыстоны хайадисты тыххæй. Равдыст уыдзæн 3-4 майы горæт Минводы. Йæ хайадисджытæ базонгæ уыдзысты нырыккон тенденцитæ æмæ уæрæх инфраструктурон æмæ инновацион проекттæ æмæ программæты реализацийы фадыджы перспективæтимæ. Равдысты нысан у Цæгат Кавказы федералон зылды регионтæм, Абхаз æмæ Хуссар Ирыстонмæ ног инвесторты æрбакæнын.
Экономикон рæзты министр Тадтаты Дзамболат куыд банысан кодта, афтæмæй ацы равдысты Хуссар Ирыстоны хайадистыл бакуыстой бæстæйы сæргълæууæг Гаглойты Аланы бахæсмæ гæсгæ.
«МинводыЭКСПО»-йы фæзуатыл равдисдзысты Цæгат Кавказы федералон зылды регионты инвестицион фадæттæ. Хуссар Ирыстонæн дзы уыдзæн йæхи национ экспозици. Уый тыххæй сын рахицæн кодтой 25 квадратон метры фæзуатимæ хатæн, цыран æвдисдзысты сæ продукци æмæ уадздзысты бадзырдтæ.
Уæрæсейы Федерацийы Республикæ Хуссар Ирыстоны базарадон минæвар Гогинов Таймуразы ныхæстæм гæсгæ, равдысты руаджы гæнæн уыдзæн нæ республикæйы экономикон фадæттæ равдисынæн, уыимæ иумæ фыццаг къахдзæфтæ чи райдыдта, хуссарирыстойнаг уыцы æвзонг амалиуæггæнджытæ дæр базонгæ уыдзысты сæ уæрæсейаг коллегæтимæ. Сæхи равдисынæн сын уый уыдзæн хорз рекламæ. Ацы равдыст фæахъаз уыдзæн Хуссар Ирыстоны экономикæйы рæзтæн.
Æрвитгæ та йæм акæндзысты 14 экспонаты.
Минводмæ æрвитынвæнд кæнынц кондад «Иронсан»-ы, «Хæххон Хъелы бæгæныфыцæн» заводы продукци. Уымæй дарддæр равдыстмæ бахаудзысты цалдæр хæдзарады рауадзгæ продукци, сувениртæ, минералон дон «Багиата» æмæ суадоны дон «Edis».
Гогиновы ныхæстæм гæсгæ, дон у, сæйраг акцент цæуыл æвæрæм, нæ иунæг ахæм продукт.
Видеороликы руаджы Цæгат Кавказы регионты базонгæ кæндзысты Хуссар Ирыстоны тыххæй ног рауагъд фæндагамонæнимæ, туризмы тыххæй информациимæ.
Гаглойты Алан банысан кодта, зæгъгæ, «Минводы ЭКСПО»-йы фæзуатыл Хуссар Ирыстоны хайадисты тыххæй развæлгъау фехъусын кодтам, цæмæй хайад райсын кæй фæнды, уыдон сæхи бацæттæ кодтаиккой, хайад райсыны тыххæй куырдиæттæ балæвæрдтаиккой, уый тыххæй.
«Нæ нысан у, сæ продукци равдисыны фæрцы нæ амалиуæггæнджытæн фадат радтын», – бахахх кодта Президент Гаглойты Алан.
Джуссойты Константин фæндон бахаста, цæмæй бакусой базальты заводы продукци дæр экспозицийы равдисыныл.
Нæ уацх.
Ацы æрмæджытæ дæр бакæс:
БОНЫ ФÆТКЫ – 2020-2022 АЗÆН ИНВЕСТИЦИОН ПРОГРАММÆ РЕАЛИЗАЦИ КÆНЫНЫ ФАРСТЫТÆ
Бафиддзысты бафыстытæ, райсдзысты æххуыс
Хицауады Сæрдар æркаст, хъæууонхæдзарадон тыллæг реализацийы рæстæджы цы ныхдуртæ фæзыны, уыдонмæ
РХИ-йы Хицауады Сæрдар Хъуылымбегты Доментийы хыгъд парламенты сессийы 2015 азы бакæнгæ куысты тыххæй
Фембæлд хуссарирыстойнаг скъолаты рауагъдонтимæ
