Адæймаджы скондæй диссагдæр, æвæццæгæн, ницы ис дунейыл. Стыр Хуыцау ын цы цардвæндæгтæ сныв кæны, уыдоныл фæцæуы, йæ хъысмæт æй  цы царды зилдухæнты баппары, уыдон  цадæггай иуварскæнгæйæ.  Ацы зилдухæнтæ цас фылдæр вæййынц, уыйас адæймагæн йæ миддуне вæййы хъæздыгдæр, йæ удыхъæд та фидардæр. Хъæздыг миддуне æмæ фидар удыхъæд уыд мæ уацы хъайтар, Ирыстоны аккаг фырт, сгуыхт журналист, Стыр Фыдыбæстæйон хæсты æмæ куысты ветеран дзæнæттаг Плиты Согратæн дæр.

Плиты Сограт Владимиры фырт райгуырд 1915 азы 2 апрелы Знауыры районы Уахтанайы хъæуы. Дæс азы дæр ыл нæма цыд, Гуырдзыстоны меньшевиктæ Хуссар Ирыстонæн фыццаг геноцид куы сарæзтой, уæд. Чысыл лæппу йæ ныййарджытæ æмæ æмхъæуккæгтимæ фæлыгъдысты Цæгат Ирыстонмæ. Сограт йæ чысыл удæй  бавзæрста лигъдоны хъизæ-мæрттæ. Лигъдæттæ фæндæгтыл мардысты алыгъуызон низтæй, уазал æмæ стонгæй. Фæ-рынчын чысыл Сограт дæр, фæлæ Хуыцауы фæрцы аирвæзт мæлæты дзæмбытæй.

Фæскъæвда алы хатт дæр ракæсы хур. Хур ракаст Хуссар Ирыстоны адæмыл дæр. Гуырдзыстоны меньшевиктæ сырд æрцыдысты æмæ адæм фæстæмæ æрыздæхтысты сæ цæрæн бынæттæм. Æрыздæхтысты Сограты ныййарджытæ дæр сæ райгуырæн хъæу Уахтанамæ.    Йæ райгуырæн хъæумæ æрыздæхгæйæ, Соргат æрлæууыд йæ ный-йарджыты фарсмæ æмæ йæ бон куыд уыд, афтæ сын æххуыс кодта сæ пырх хæдзар æндидзын кæныны, карста хос, цыд фыййау, йæ ныййарджытæн уыд стыр æххуыс æмæ дзы уыдон дæр буц уыдысты.

Куыстæй дарддæр Сограт æвзыгъд уыд ахуырмæ дæр.  Каст фæцис сæ хъæуы райдиан скъола. Уый фæстæ йæ ахуыр адарддæр кодта Хъорнисы авдазон скъолайы. Каст æй куы фæцис, уæд ахуырмæ бацыд Цхинвалы педтехникуммæ. Фыццаг курс куы сæхгæдта, уæд ахуырмæ бацыд Тбилисы педагогон ахуыргæнæндонмæ æмæ йæ æнтысгæйæ каст фæцис. Æрыздæхт йæ райгуырæн хъæумæ æмæ кусын райдыдта ахуыргæнæгæй.

Плийы фыртæн йæ зæрдæмæ тынг цыд журналистикæйы дæсныйад æмæ ахуыргæнæгæй кусгæйæ, уацтæ фыста газет «Хурзæрин»-мæ. Фæстæдæр Знауыры районон газет «Колхозон цард» мыхуыры цæуын куы райдыдта, уæд Сограт ссис йæ уацхæссæг. Йæ фыццаг литературон уацмыстæ дæр уæд фæзындысты мыхуыры. Йæ радзырдтæ æмæ æмдзæвгæтæ мыхуыр цыдысты æрмæст «Колхозон цард»-ы фæрстыл нæ, фæлæ газет «Хурзæрин»-ы æмæ журнал  «Фидиуæджы» фæрстыл. 1950 азы йæ радзырд «Днестровские рыбаки» мыхуыр æрцыд ССР Цæдисы æвзонг фысджыты иумиаг æмбырдгонды.

Сограт æдзух куыста йæхиуыл, тырныдта зонындзинæдты бæрзæндтæм æмæ фæсаууонмæ ахуырмæ бацыд Тбилисы паддзахадон университеты литературон факультетмæ, фæлæ дзы кæронмæ нæ фæцахуыр кодта, Сырх Æфсады рæнхъыты службæмæ йæм кæй æрсидтысты, уый тыххæй. Службæ кодта украинаг горæт Львовы. Æфсады рæнхъыты службæ кæнгæйæ, хæст райдыдта Советон Цæдис æмæ Финляндийы ‘хсæн. Æхсарджын æфсæддон куырдиат балæвæрдта йæ командакæнынадмæ, цæмæй йæ хæстмæ арвитой. Бархионты къордимæ Плийы фырт ацыд фронтмæ, фæлæ Финляндийы хæст кæй фæцис, уый фæстиуæгæн сæ фæстæмæ рарвыстой.

Цасдæр рæстæджы фæстæ та райдыдта Стыр Фыдыбæстæйон хæст. Немыцаг фашист-ты ныхмæ Сограт хъæбатырæй тох кодта Украинæйы фронты танкты ныхмæ дыккаг бригадæйы 8-æм танкон полчы артиллерион батареяйы сконды. Хистæр сержанты чины командæ кодта бастдзинады отрядæн æмæ бастдзинадæй ифтонг кодта Советон Æфсады алы æмæ алы къордты.

Хъыгагæн, хæсты фыццаг аз Сырх Æфсад фæстæмæ алæууыд. Райгуырæн бæстæйы уæйгæнæг инæлар-лейтенант Власов æдзæсгомæй йе ‘фсады радта немыцаг командæкæнынады къухтæм. Ацы цау ныфсы базыртæ басагъта фашисттыл æмæ ноджы активондæрæй бырстой размæ. Иухатт немыцаг æмæ советон танкон тыхтæн карз тох куы бацайдагъ, уæд Сограт уыд танчы экипажы уæнг, уыцы-иу рæстæджы уыд бастдзинады службæгæнæг дæр æмæ æфтиндзæг дæр. Йæ раст æмæ дæсны архайдтытæй экипажы къухы бафтыд знаджы танктæй цалдæры скуынæг кæнын. Фæлæ уæдмæ фæзындысты немыцаг хæдтæхджытæ æмæ сыл æрызгъæлстой бомбæтæ. Ссыгъд Плийы фырты танк дæр, салдæттæ бæргæ сгæппытæ кодтой судзгæ танкæй, фæлæ сæ фашисттæ æхсын райдыдтой. Фæцæф Сограт дæр æмæ бахауд госпиталмæ. Кæронмæ не сдзæбæх, афтæмæй та араст тохы быдырмæ.

Карз тохтæ цыд Корсунь-Шевченкойы здæхты. Сограт цы дæлхайы службæ кодта, уый æрлæууыд  иу стыр сæндоны территорийыл. Хæстонтæ сæхи цæттæ кодтой тохмæ. Плийы фырт бацыд фæткъуыбæласы бынмæ æмæ уырдыгæй фæлгæсыд йæ алфæмблаймæ. Бастдзинады службæгæнæг чызджытæй иу ацыд сæндоны астæумæ. Фæстæмæ куы рацæйздæхт, уæд Сограт ауыдта, немыцаг фашист сæндонæй куыд сыстад, йæ фæстæ ноджы æртæ немыцаджы. Уый чызгыл хъуамæ фехстаид кард, фæлæ Сограт фæцырд æмæ цыппар фашисты дæр скуынæг кодта. Куыд рабæрæг, афтæмæй ацы фашисттæ уыдысты немыцаг десантонтæ. Ацы сгуыхтдзинады тыххæй Сограт хорзæхджын æрцыд «За отвагу»-йы майданæй.

1943 азы Плийы фырт бацыд Коммунистон партийы рæнхъытæм æмæ йæ амæлæты бонмæ цытимæ хаста коммунисты ном.

Не ‘мзæххон хайад иста Венгрийы территори немыцаг фашисттæй ссæрибар кæныны тохты. Горæт Вацы уынгты тохты рæстæджы Сограт уæззау цæф фæцис. Хос кæнынмæ йæ нырма Мæскуыйы госпиталмæ арвыстой, уый фæстæ та – Читайы госпиталмæ. Уым ын хос кодтой фæлтæрд дохтыртæ, сарæзтой йын цалдæр операцийы, фæлæ йæ хъæдгæмттæ бирæ рæстæджы дæргъы нæ гас кодтой æмæ 1945 азы марты мæйы – Стыр Уæлахизмæ ма дыууæ мæйы куы хъуыд, уæд демобилизацигонд æрцыд йе ‘нæниздзинадмæ гæсгæ.

Сограт йæ райгуырæн Ирыстонмæ æрыздæхгæйæ, кусын райдыдта областон газет «Къоммунист»-ы редакцийы литкусæгæй, фæстæдæр та – техредакторæй, Дзауы æмæ Знауыры районтæй сæрмагонд уацхæссæгæй, хайады хистæрæй, бæрнон нымæрдары хæдивæгæй, типографы директорæй. Уыцы азты ноджы ирддæрæй фæбæрæг йæ жур-налисты æмæ фыссæджы дæсныйад. Йæ очерктæ, фельетонтæ, уацтæ æмæ литературон æрмæг кæддæриддæр уыдысты цымыдисон æмæ актуалон темæтыл æмæ дуджы домæнтæм гæсгæ фыст æмæ йын сæ газет-кæсджытæ стыр цымыдисимæ кастысты.

Плиты Сограт кæддæриддæр уыд рæстдзинады принциптыл хæст, хæларзæрдæ, куыста, йæхиуыл нæ ауæрдгæйæ, куыд фæзæгъынц – æсчъилдысæй æмæ йæ йе ‘мкусджытæ дæр уыцы миниуджыты тыххæй уарзтой æмæ йын кад кодтой.

Пенсийы ацæуыны фæстæ дæр  Плийы фырт йæ журналистон куыст нæ уагъта, йæ уацмыстæ арæх мыхуыр цыдысты газетты фæрстыл.

1983 азы газет «Советон Ирыстон»-ы уырыссаг дубляж куы райдыдта цæуын, уæд редакцийы коллектив кусынмæ æрбахуыдтой Сограты дубляжы техредакторы бынатмæ æмæ дзы фæкуыста 1994 азмæ.

Куыд йæ бон уыд, афтæ Плийы фырт йæ райгуырæн Ирыстон æмæ йæ уарзон адæмæн лæггад кодта æмæ уымæй иста æхцондзинад. Стыр Фыдыбæстæйон хæсты активон хайад кæй райста, фыдызнаджы ныхмæ хъæбатырæй кæй тох кодта, уый тыххæй  хорзæхджын æрцыд Стыр Фыдыбæстæйон хæсты I къæпхæны орденæй æмæ бирæ майдантæй. Ирон культурæ, ирон мыхуырон æрмæджы рæзтмæ йе стыр хайбавæрды тыххæй хорзæхджын æрцыд ГССР Сæйраг Советы Кады грамотæйæ. Цалдæр хатты та йæ Кады грамотæтæй схорзæхджын кодта Хуссар Ирыстоны раздæры облæххæстком. Фæстæдæр журналистикæйы фадыджы йæ бирæазон фæллойадон архайды æмæ ирон журналистикæйы рæзтмæ йе стыр хайбавæрды тыххæй Плиты Согратæн лæвæрд æрцыд Республикæ Хуссар Ирыстоны сгуыхт журналисты ном.

Нæуæдзæм азтæй фæстæмæ хъизæмайраджы азты рæстæджы Сограт иу къахдзæф дæр нæ акодта йæ райгуырæн Хуссар Ирыстонæй. Йе ‘мбæстæгтимæ иумæ бавзæрста,  хуссайраг ирæттæ цы хъизæмæрттæ бавзæрстой, æппæт уыдон. Уый уыд стыр патриот. Йæ иууыл æвæджиагдæр бæллиц уыд иууон  хæдбар Ирыстоны цæрын, фæлæ йын, хъыгагæн, нал бантыст сæрибар, нымад Ирыстоны ацæрын дæр, йæ цардæй ахицæн, цы Стыр Уæлахизы сæрыл тох кодта, уыцы бæрæгбонмæ ма иу бон куыд хъуыд, уæд – 2003 азы 8 майы.

Сограт кæд бирæ хъизæмæрттæ бавзæрста йæ царды, уæддæр йæхи амондджыныл нымадта. Хæстæй куы æрыздæхт, уæд йæ цард баиу кодта, авд азы йæм цы уарзон чызг æнхъæлмæ каст, уыимæ – Хуыбецты Екатери-нæимæ. Амондджын бинонтæн райгуырд æртæ лæппуйы æмæ иунæг чызг. Схъомыл сæ кодтой æмæ сæ царды фæндагыл æрлæууын кодтой. Уыдон дæр, сæ ныййарджытау, рауадысты намысджын æмæ куыстуарзаг.

Хистæр фырт Валери каст фæцис Хуссар Ирыстоны пединституты физматы факультет. Уый фæстæ та ахуыр кодта Тбилисы политехникон институты, фæлæ йæ 1989 азы ныу-уагъта, гуырдзиæгтæ ирæтты ныхмæ æргомæй куы рацыдысты, сæ райгуырæн зæххæй сæ сурынвæнд куы скодтой, уый аххосагмæ гæсгæ. Созыр дæр Цæгат Ирыстоны каст фæцис Хъæууонхæдзарадон институт, райста  инженеры дæсныйад, службæ кодта Хъахъхъæнынады министрады, кæстæр фырт Ана-толи æмæ йæ иунæг сылыстæг хъæбул Юза та каст фесты Ломоносовы номыл Мæскуыйы паддзахадон университет, Анатоли  – юридикон факультет, дзæнæттаг Юза та – историон факультет. 

Абон не ‘хсæн нал ис Плиты Сограт, фæлæ йæ фидар уды фарн баззад йæ цотæн æмæ йæ хæстæджытæн.

Осиаты Индира

Comments are closed, but trackbacks and pingbacks are open.