1989-2008 азты Хуссар Ирыстоны территорийыл хæстон архайдтыты рæстæджы инвалидтæ чи систы, уыдонæн æххуысы фонды президент Плиты Мадинæ ацы бонты æрæздæхт Мæскуыйæ кусæгон балцæй. Уырдæм уый хуынд æрцыд Мæскуыйы Æппæтадæмон æхсæнадон фонд «Инвалиды войны Афганистана и всех воин»-ы фæхуындмæ гæсгæ. Ацы æхсæнадон организаци 18-19-æм майы банысан кодта йæ 25 азы юбилей.
Цытджын мадзалмæ хуынд æрцыдысты 70 регионы минæвæрттæ. Цæгат Ирыстонæй ацы цытджын мадзалмæ хуынд æрцыд «Афганистаны хæсты инвалидты» фонды сæргълæууæг Джаджиты Виталик .
Ирыстонæй уазджыты йæхимæ райста Мæскуыйы æхсæнрегионалон «Реабилитацион æмæ интеграцийы центр»-ы генералон директор, фыццаг къорды хæстон инвалид, Æдасдзинады федералон службæйы хистæр лейтенант Галина Филипова. Уый ма у ОООИВА «Инвалиды войны по разрешению споров в сфере реабилитации»-йы этникон къамисы уæнг дæр.
Галина Филиппова фембæлды рæстæджы стыр бузныджы ныхæстæ загъта Плиты Мадинæйæн йæ ахсджиаг куысты тыххæй. «Хæсты фæцæфуæвæг инвалидтæм æппынæдзух дæр хъус кæй дарыс, дæхæдæг инвалид уæвгæйæ, уыдоны хæрзæбоныл кæй хъуыды кæныс, уый тыххæй мын айс мæ иууыл зæрдæбындæр арфæтæ. Ам махмæ, горæт Рузайы, цы реабилитацион центр ис, уырдæм хуынд арæх æрцæуынц Хуссар Ирыстоны инвалидтæ, цæмæй се ‘нæниздзинад æрнывыл кæной. Уыдон алы хатт дæр æндæр инвалидтæй фæхицæн кæнынц се ‘мбаргæдзинад æмæ уæздан ахастæй. Уымæ гæсгæ, ам махмæ, кæддæриддæр бынат уыдзæнис Хуссар Ирыстоны инвалидтæн», – дзырдта «Центр реабилитаци и интеграции инвалидов войны»-йы генералон ди-ректор Галина Филиппова.
Плиты Мадинæ дæр зæрдæбын арфæтæ загъта Æппæтадæмон æхсæнадон фонд «Инвалиды войны Афганистана и всех воин»-ы къухдариуæггæнджытæн: «Æгас Уæрæсейы Федерацийы ис сæдæ минæй фылдæр хæстон инвалиды. Фæлæ, сымах уæддæр ссарут уавæртæ, цæмæй Хуссар Ирыстонæй æрцæугæ инвалидтæн ссарат бынæттæ уæ реабилитацион центры. Уыдон æрвылхатт дæр Ирыстонмæ æрæздæхынц бузныгæй. Мæхи æмæ уын æппæт Ирыстоны номæй бузныг зæгъын кæй нæ рæвдаут, кæй ныл аудут», – дзырдта «Хæсты фæцæфуæвджытæн æххуысы фонд»-ы хистæр Плиты Мадинæ.
18-æм майы ма Плиты Мадинæйæн ноджыдæр уыд цалдæр кусæгон ахсджиаг фембæлды.
19-æм майы цытджын церемони райдыдта Кремлы «Æнæзонгæ салдат»-ы цырты раз дидинджытæ сæвæрынæй. Уырдыгæй уазджытæ ацыдысты Мæскуыйы областы горæт Рузайы уагъдцæуæг Æппæтуæрæсейаг зонадон-практикон конференцимæ, кæцы уагъд цыд ахæм темæйыл «Социальные и правовые основы государственного признания общественно значимой деятельности ОООИВА-Инвалиды войны, по реабилитации и патриотическому воспитанию граждан Российской Федерации».
Конференцийы раныхас кодта Плиты Мадинæ дæр. Уый йæ доклады æрдзырдта, Уæрæсейы Федераци цы стыр æххуыс кæны Хуссар Ирыстонæн, уыцы фарстытыл. Уый фæстæ Президент Тыбылты Леониды номæй Æппæтадæмон æхсæнадон организаци «Инвалиды войны Афганистана и всех воин»-ы сæргълæууæг Андрей Чепурнойы схорзæхджын кодта “Республикæ Хуссар Ирыстоныл 25 азы сæххæсты” майданæй.
Плиты Мадинæ ма РХИ-йы Президенты номæй Андрей Чепурнойæн загъта: «2012 азæй Хуссар Ирыстоны хæсты фæцæф-уæвæг инвалидты фонд»-имæ æмгуысткæнынады тыххæй уæ къухтæ куы æрфыстат, уæд загътат ахæм фразæ «Мы, воины инвалиды сильны духом и будем подставлять плечо друг-другу!». Уыдон æрмæст ныхæстæ нæ уыдысты. Сымах хъуыддагæй равдыстат уыцы ныхæсты тых. Нæ инвалидтæн æххуыс кæнут, æппынæдзух сæ фæхонут уæ реабилитацион центрмæ, аудут сын се ‘нæниздзинадыл. Инвалидтæ уæвгæйæ, ныр цалдæр азы фæдфæдыл æрцыдыстут Хуссар Ирмæ, немæ иумæ хъыг кæнут нæ хъыгыл, цин кæнут нæ цинагыл. Æрæджы, 5-æм скъолайы кæрты, цыран æнцойад ссардтой нæ хъайтар лæппутæ, уæ номæй сын сæвæрдтат номарæн цырт. Æппæт ацы хæрзиуæгон хъуыддæгты тыххæй уын зæгъæм бузныг», – загъта Плиты Мадинæ Андрей Чепурнойæн, РХИ-йы Президенты номæй.
Андрей Чепурной дæр зæрдиаг арфæтæ ракодта Хуссар Ирыстоны адæмæн «Хуссар Ирыстоны Президент стыр инициативæ кæй равдыста 2014 æмæ 2015 азы Луганск æмæ Донецкы республикæтæм гуманитарон æххуыс 2 КАМАЗ-ы минералон дон æмæ æндæр хæлцадон продукттæ кæй арвыста, уый тыххæй. Уæ фонд сорганизаци кодта ацы хæрзаудæн хъуыддаг æмæ баиу Цæгат Ирыстоны уæ организацийæн цы филиал ис, уыимæ. Сымах хорз æмбарут хæст цы у, уымæн æмæ уæхæдæг дæр уыцы фæндæгтыл рацыдыстут», – загъта йæ ныхасы кæрон Андрей Чепурной.
Уæ зæрдыл уын лæууын кæнæм, ацы мадзал уагъд кæй æрцыд Мæскуыйы 18-19 майы, иумæйаг уæрæсейаг æхсæнадон организаци, “Инвалиды войны в Афганистане и всех воин”-ыл 25 азы кæй сæххæст, уый цытæн.
УАЗÆГТЫ Марфæ
Comments are closed, but trackbacks and pingbacks are open.