19-æм октябры Республикæ Хуссар Ирыстоны Президент Тыбылты Леонид йæхимæ райста æмæ йын йæ 75 азы юбилейы цытæн раарфæ кодта сывæллæтты фыссæг, курдиатджын прозаик, æхсæнадон кусæг, полиграфион рауагъдад «Хуссар Алани»-йы сæргълæууæг, бирæ хорзæхты æмæ куысты ветераны кадджын номы хицау Тедеты Валяйы.

Тедеты Валяйы ном чи нæ фехъуыста республикæйы, ахæм адæймæгтæ стæм разындзæн. 32 азы дæргъы йæ цæсгомджын æмæ æнæзæрдæхудт куыстæн æвдисæн сты йæ бирæнымæц Кады грамотæтæ æмæ арфæйы гæххæттытæ. Ныр йæ бирæ хорзæхтæм бафтыд, знон æй РХИ-йы Президент цы «Хæлардзинады орден»-æй схорзæхджын кодта, уый дæр.

Президент цыбыртæй æрдзырдта Тедеты Валяйы сфæлдыстадон фæндагыл: «Тедеты Валя Ирыстоны канд сабиты фыссæгæй хъуыстгонд нæу, фæлæ ма рауагъдады бирæ чингуытæ кæй фæрцы рауагъд цыдысты, Ирыстонæн уæззау рæстæджытæ куы уыд æмæ алы къапекк дæр нымад куы цыд, уæд, уыцы дуджы фæлтæрдджын кусæгыл. Ноджы йын стырдæр куыст бакæнын бантыст Хуссар Ирыстоны геноцидты бæлвырдгæнæнтæ æмæ историон цауты æрмæджытæ æрæмбырд кæнын æмæ сæ чиныг саразын йæ къухы куы бафтыд, уæд. Йæ чингуытæ «В Южной Осетии и снег горел»-æй цы 2 томы рацыд, уым документалонæй æвдыст æрцыд бирæ вазыгджын цаутæ. Адæймаг цасфæнды ма фæцæра, уæддæр йæ сæйраг хæзна вæййы, йæ адæмы хæрзæбонæн ын цы хæрзиуджытæ саразын бантыст, уыцы ахсджиаг  хъуыддаг. Дæуæн, Тедион, дæ хæрзтæ бирæ сты æмæ дын мæ зæрдæ зæгъы канд бирæ азты цæрæнбон нæ, фæлæ ноджыдæр бирæ сфæлдыстадон куыстытæ рафæлгъауын», – дзырдта республикæйы сæргълæууæг.

Тедеты Валя стыр бузныг загъта Президентæн, ахæм стыр кад ын кæй скодта, уый тыххæй. «Æз æнхъæл нæ уыдтæн, бæстæйы сæргълæууæджы абон мæнмæ кæй равдæлдзæн. Зонын, æрвылбон дæр куыд бирæ вазыгджын, политикон æмæ социалон фарстытæ скъуыддзаг кæныс. Уыимæ иумæ нæ рох кæныс, не ‘мбæстæгтæй чысыл хъуыддаджы дæр чи басгуыхы, уыдоны официалонæй дæхимæ райсын æмæ сын скад кæнын. Бузныг дæ стæм дæ ахæм адæймагдзинады тыххæй!

Ныртæккæ æз кусын чингуытæ «В Южной Осетии и снег горел»-ы цыппæрæм томыл. Уыдонæй чиныгкæсæджы къухты ис чиныджы дыууæ томы, æртыккаг том дæр ацы бонты рацæудзæн мыхуыры. Цыппæрæм том дæр цæттæ у мыхуырмæ. Чингуытæ уагъд цæуынц рауагъдад «Хуссар Аланийы», – дзырдта Тедеты Валя РХИ-йы Президентæн.

Тыбылты Леонид уæлдай хатт раарфæ кодта Тедионæн æмæ йын ныфс бавæрдта, «В Южной Осетии и снег горел»-ы цыппæрæм том рауадзынæн ын æхцайы фæрæзтæй кæй баххуыс кæндзæн.

Уазæгты М.

Comments are closed, but trackbacks and pingbacks are open.