Хъæбатырдзинад æмæ удыхъæды фидардзинады бон

Республикæйы æхсæнад банысан кодта Хæдбардзинад банымайыны бон

Уæрæсейы Федераци Республикæ Хуссар Ирыстоны Паддзахадон хæдбардзинад куы банымадта, ууыл фараст азы сæххæсты цытæн цытджын æмбырд уагъд æрцыд Парламенты æмбырдгæнæн залы.

Ацы бæрæгбоныл немæ иумæ радысты уазджытæ Уæрæсейы Федерацийæ – Хуссар Ирыстон æмæ Абхазимæ социалон-экономикон æмгуыстады фæдыл Уæрæсейы Федерацийы Президенты Департаменты управленийы сæргълæууæджы хæдивæг Алексей Филатов, Республикæ Цæгат Ирыстон-Аланийы делегаци Битарты Вячеславы сæргълæудæй, УФ-йы Федералон æмбырды Паддзахадон Думæйæ депутат Тайсауты Хъазбеджы сæргълæудæй, Приднестроваг Молдаваг Республикæйæ Хицауады Сæрдары хæдивæг Алексей Цукановы сæргълæудæй, Республикæ Абхазæй бæстæйы Уæлвæткон уавæрты министр Левæ Квицинияйы сæргълæудæй, Республикæ Мæхъæлæй Республикæйы Сæргълæууæджы уынаффæгæнæджы æххуысгæнæг Артем Перехристы сæргълæудæй, Донецкы Адæмон Республикæйæ бæстæйы Адæмон Советы депутаттæ Екатеринæ Мартьянова æмæ Александр Яровиковы сæргълæудæй, Хъæрæсе-Черкесийы Республикæйæ, Национ хъуыддæгтæ, массон коммуникацитæ æмæ мыхуыры фæдыл министр Ислам Хубиевы сæргълæудæй, Кæсæг-Балхъарты Республикæйæ, Хицауады Сæрдары хæдивæг Мурат Кардановы сæргълæудæй, УФ-йы Хъахъхъæнынады министрады делегаци, УФ-йы Уæлдæфон-космикон тыхты дардмæтæхæг авиацийыл командæгæнæг, инæлар-лейтенант, Уæрæсейы хъайтар Сергей Кобылашы сæргълæудæй.

Цытджын мадзалы райдиан æмбырдгæнæн залмæ Хъахъхъæнынады министрады цытджын караул æрбахастой Хуссар Ирыстон æмæ Уæрæсейы Федерацийы Паддзахадон тырысатæ. Айзæлыдысты дыууæ бæстæйы паддзахадон гимнты зæлтæ.

Æрæмбырдуæвджыты раз ацы нысаниуæгджын боны тыххæй раныхас кодта  æмæ йæ адæмæн раарфæ кодта бæстæйы сæргълæууæг Бибылты Анатоли. (Раныхас мыхуыр æрцыд нæ газеты ивгъуыд номыры).

УФ-йы Президенты Департаменты управленийы къухдариуæггæнæджы хæдивæг Алексей Филатовы цæст нæ Республикæйы адæмæн бауарзта сабырад, хæлар æмæ размæцыд. Ацы бон, зæгъгæ, æнæдызæрдыгæй у бæстæйы нырыккон историйы ахсджиаг зæрдылдарæн бон.

«Абон Хуссар Ирыстон æнтыстджынæй скъуыддзаг кæны паддзахадон арæзтады æмæ социалон-экономикон райрæзты фæдыл егъау хæстæ. Рæстæгæй сбæлвырдгонд нæ бæстæты ‘хсæн хæларад æмæ æмцæдисады ахастытæ ныртæккæ сты интеграцийы ног ‘гъæдджын  æмвæзадыл. Уæрæсе дарддæр дæр кæндзæн алыварсон æххуыс æмæ æмархайд æфсымæрон Республикæйæн», – дзырдта ныхасгæнæг.

Республикæ Цæгат Ирыстон-Аланийы Сæргълæууæг Битарты Вячеслав йæ раныхасы банысан кодта, ацы бон кæй у хъæбатырдзинад æмæ удыхъæды фидардзинады бон. Фæлæ сæйраг, нæ ныфсытæ ацы бон бæттæм нæ рухс фидæныл. Битарты Вячеслав ма банысан кодта, Хуссар Ирыстоны адæм цы историон равзæрст сарæзтой, уый хуымæтæджы кæй нæ уыд.

«Мах сæрыстыр стæм уымæй, æмæ Уæрæсе фыццаг кæй банымадта Хуссар Ирыстоны паддзахады хæдбардзинад. Ныфс мæ ис æмæ  дуне бамбардзæн йæ мадзурайæ æнæраст ми кæй кæны æмæ бафæзмдзæн Уæрæсейы арфæйаг къахдзæф», – банысан кодта ныхасгæнæг.

Ирыстоны цæгат хайы Сæргълæууæджы ма бафæндыд, цæмæй Ирыстоны дыууæ хайы не ‘взаг дæр, не ‘гъдау дæр ноджы рæсугъддæр кæна. Ирыстоны зæххыл, зæгъгæ, кæддæриддæр сабырдзинад уæт.

Паддзахадон Думæйы 450 депуаты номæй, къухдариуæгады номæй бæрæгбонон арфæтæ ракодта депутат Тайсауты Хъазбег. Банысан кодта, зæгъгæ, Хуссар Ирыстоны адæм рацыдысты ахæм гуыргъахъ фæндæгтыл, цæмæй абон аккаг цард кæной райгуырæн зæххыл. Уый тыххæй абон æмбæлон куыст кæны Республикæйы къухдариуæгад дæр. Депутаты ныхæстæм гæсгæ сæ Паддзахадон Думæйы ирæтты æнгом кæны, Хуссар Ирыстонмæ хауæг фарстытыл дзырд куы цæуы, уыцы хъуыддаг.

Цытджын æмбырды хайадисæг, УФ-йы Хъахъхъæнынады министрады Дардмæтæхæг авиацийыл командæгæнæг Сергей Кобылаш 2008 азы августы хæстон агрессийы рæстæджы Ирыстоны хъахъхъæдта уæлдæфæй. Хорзæхджын æрцыд Уæрæсейы Федерацийы Хъайтары стъалыйæ.

Йæ раныхасы банысан кодта, зæгъгæ, 2008 азы августы цауты Уæрæсейы Гарзджын тыхтæ уæды Гуырдзыстоны къухдариуæггæнæг Михаил Саакашвилийæн цыппæрæм бон йæ галстук баууилын кодтой, фæндзæм бон та агресси-йыл нал сразы.

«Æфсымæрон Уæрæсейы Федерацийы æмæ Хуссар Ирыстоны адæмтæ иумæ уæхски-уæхск бар нæ ратдзысты никæцы агрессорæн се ‘нцойад фехалын, сæ зæхмæ æрбацæуынæн», – банысан кодта Сергей.

Абхазы Президент Рауль Хаджимбайы арфæйы фыстæг цытджын æмбырды бакаст Левæ Квициния. Арфæйы дзырдæуы, зæгъгæ, ирон адæм сты сæ фыдæлты фæрныг зæххыл цæрыны аккаг…

Цытджын æмбырды рæстæджы ма арфæйы фыстæджытæ фарст цыдысты Приднестроваг Молдаваг Республикæйы Президент Вадим Красносельскийы номæй, Мæхъæлы Республикæйы сæргълæууæг Юнус-Бек Евкуровы номæй, Хъæрæсе-Черкесийы бæстæйы сæргълæууæг Рашид Темрезовы номæй, Кæсæг-Балхъарты бæстæйы сæргълæууæг Юри Коковы номæй, Донецкы Адæмон Республикæйы сæргълæууæг Александр Захарченкойы номæй.

Мадзалы официалон хайы фæстæ Парламенты бæстыхайы раз уагъд æрцыд бæрæгбонон хиирхæфсæн концерт.

Къæбулты М.