Республикæ Хуссар Ирыстоны Хицауады Сæрдар Пухаты Эрик фембæлд РХИ-йы æнæниздзинад хъахъхъæныны министр Тотчиты Георгиимæ. Фембæлды сæйраг темæ уыд республикæйы районты медицинон ифтонгад.

«Æрбалæугæ азы мах фæфылдæр кодтам хæрдзтæ хосты ифтонгады фæдыл 120 милуан сомæй 150 милуан соммæ. Ахсджиаг у, цæмæй æрмæст столицæйы медицинон уагдæттæ нæ, фæлæ республикæйы фельдшерон-акушерон пункттæ дæр ифтонг цæуой хостæй æххæст гуырахстæй», – банысан кодта Хицауады Сæрдар æмæ бахæс кодта Тотчиты Георгийæн, цæмæй фельдшерон-акушерон пунктты уавæрмæ йæ хъус дара, афтæ ма хостæй пайда кæныны уавæрмæ дæр.

Уымæй дарддæр ма уынаффæ кодтой, цæмæй медико-социалон реабилитацион центр паллиативон æххуысы хайадимæ лæвæрд æрцæуа РХИ-йы æнæниздзинад хъахъхъæныны юрисдикцимæ.

Ныртæккæ агъуыст цæттæ у эксплуатацимæ, Юстицийы министрад æнæмæнгхъæуæг документтæ бацæттæ кодта балансмæ йæ радтыны тыххæй.

Пухаты Эрик Æнæниздзинад хъахъхъæныны министрады сæргълæууæгæн бахæс кодта, цæмæй цыбыр æмгъуыдмæ аскъуыддзаг кæной  ресурстæй   ифтонггæнæг организацитимæ бадзырдтæ саразыны фарст, цæмæй центр æввахс рæстæджы скуса.

Фембæлды рæстæджы уынаффæ кодтой æндæр фарстатыл дæр, сæйраджыдæр, гемодиализы хайад æмæ тугдæттæн станц байгом кæныныл.

Республикæ Хуссар Ирыстоны Хицауады пресс-службæ

Comments are closed, but trackbacks and pingbacks are open.