Уыдзæн хосгæнæндон Згъуыбиры

Ныртæккæ нæ республикæйы территорийыл ис æхсæз куыстуаты, кæцытæ кæнынц суадоны æмæ минералон дæттæ уадзыны куыст – «Бæгъиат», «Аландон», «Санай», «Дзимыр», «Осетинская» æмæ «Едыс».

«Бæгъиат»-ы суаруадзæн завод у паддзахадон куыстуат, иннæты кусын кæнынц хицæн амалиуæггæнджытæ. Ацы куыстуæттæ арæзт æрцыдысты инвестициты фæрцы æмæ инвестортæ куыд зæгъынц, афтæмæй сæ нысан у дон, сæйраджыдæр, Уæрæсейы базармæ ласын.

Уыдонæй сæ иу «Аландон»-ы бындурыл сæрды райдианы баконд æрцæудзæн хосгæнæндон, Згъуыбиры суармæ   хæстæг.

Амалиуæггæнæг Босыкты Владимир куыд зæгъы, афтæмæй Згъуыбиры донæй уый цалдæр азы размæ ахаста Пятигорскы курортологийы зонад-иртасæн институтмæ  иртасынмæ. Уыдон лæмбынæг сахуыр кодтой доны пайдайы æууæлтæ æмæ æрцыдысты ахæм хатдзæгмæ, зæгъгæ, дон  «Ессентуки», «Кисловодск» æмæ æндæр æнгæс дæттæй бирæ хуыздæр у. «Ацы дон цæуы Кавказы хохы рагъæй Згъуыбирмæ. Никæцы дон æм схæццæ вæййы. Специалисттæ куыд амонынц, афтæмæй артроз, диабет æмæ цармы низтæн у тынг хорз. Уымæ гæсгæ æз сфæнд кодтон ацы суадоны бындурыл саразын хосгæнæндон. Куыд зонæм, афтæмæй Советон дуджы дæр ацы донмæ хæстæг план цыд егъау завод саразын, фæлæ йæм стæй йæ хъус ничиуал æрдардта», – зæгъы Босыкты Владимир.

Амалиуæггæнæджы ныхæстæм гæсгæ  бæстыхай ныридæгæн цæттæ у. Цы бакæнинаг куыстытæ ма дзы ис, уыдон фæуыдзысты июны мæймæ æмæ уæд хосгæнæндон йæ дуæрттæ байгом кæндзæнис 8 пациентæн, кусдзæн сæрдæй-зымæгæй. Йæ лæггæдты æмвæзад уыдзæн цыппарстъалыйон æмвæзадыл. Хосгæнæндон ифтонг уыдзæн, улæфæн зонæйы цы хиирхæфсæнтæ вæййы, уыдонæй. Хосгæнæндон амалиуæггæнæджы ныхæстæм гæсгæ ис денджызы æмвæзадæй 1551 м  бæрзонддæр. Ам Згъуыбиры цы дыууæ суаргуырæны ис, уыдонæй сæ иуыл Босыкы фырт сарæзта завод æмæ ныр цалдæр азы  «Аландон»-ы продукци 1,5 литруат пластикон мигæнæнты уæй цæуы, куыд бынæттон магазинты, афтæ Цæгат Ирыстон æмæ Уæрæсейы цалдæр горæты.

Босыкты Владимир куыд зæгъы, афтæмæй йæ Згъуыбиры доны хосгæнæн миниуджытæ тынгдæр бауырныдтой, нæ горæты цалдæр адæймаджы уымæ куы бахатыдысты, ома, нын бынатæй лас суадоны дон хос кæныны нысанæн. Уыдон Згъуыбиры доны уымæл хæцъилтæ æвæрдтой артрозæй низæфхæрд бынæттыл æмæ сын сæ низтæн схос кодта ацы диссаджы суадон.

Хосгæнæндоны проект реализаци цæуы амалиуæггæнæгæн йæхи сæрмагонд фæрæзтæй. Ам чи улæфа, уыдоны хæрзиуæгæн арæзт æрцæудзæн сæрдыгон бонты тезгъогæнæн бынæттæ. Кæй фæнда, уый та бæхтыл бадгæйæ экскурситæ араздзæнис Урстуалтæм. Зымæгон бонты куыд сывæллæттæ, афтæ хистæр кары адæмæн дæр сæ бон уыдзæн лыжæтыл бырын Згъуыбиры хъæуы. Фæстæдæр санаторимæ хæстæг арæзт æрцæудзæнис къахдзоныгътæй бырæн дæр. Амалиуæггæнæг хъавы бынаты фермерон хæдзарад бакæнын дæр, цæмæй санаторийы цы пациенттæ улæфой, уыдон хæрой экологион æгъдауæй сыгъдæг продукттæ.

УАЗÆГТЫ Марфа