УФ президентон æвзæрстыты рæстæджы Къуайсайы байгом уыдзæн уæлæмхас фадыг

 

Республикæ Хуссар Ирыстоны æмбæстæгтæй уæрæсейаг æмбæстагдзинад кæмæ ис, уыдон  Уæрæсейы  Федерацийы президентон æвзæрстыты хайад кæй райсдзысты, уымæ гæсгæ йæм Хуссар Ирыстон дæр йæхи цæттæ кæны.

Уæрæсейаг æмбæстæгтæ бирæ кæй сты, уый тыххæй скъуыддзаг æрцыд Хуссар Ирыстоны территорийыл 9 æвзарæн фадыг байгом кæнын. Фæлæ ныр сæ нымæц-иу фæфылдæр.  Хуссар Ирыстоны уæрæсейаг минæварад куыд фехъусын кодта, афтæмæй ног – дæсæм фадыг бакондæуыдзæн горæт  Къуайсайы культурæйы хæдзары. Фондз фадыджы баконд æрцæудзысты горæт Цхинвалы, уыдонæй иу уыдзæн уæрæсейаг минæварады  территорийыл, иннæтæ – 1, 5, 6 скъолаты æмæ – Профцæдисты хæдзары.

Æвзарæн фадгуытæ бакондæуыдзæн Знауыр, Дзау æмæ Ленингоры райцентрты дæр. Иу æвзарæн фадыг та байгом уыдзæн Цхинвалы районы Дменисы хъæуы.

«Æвзæрстыты процесс сорганизаци кæныны фæдыл Уæрæсейы Федерацийы Централон æвзарæн къамис ныридæгæн æххæст кæны мадзæлтты комплекс Уæрæсейы Федерацийы закъондæттынадмæ гæсгæ. Уæрæсейаг минæварады ныфс ис, Хуссар Ирыстоны территорийыл цæрæг уæрæсейаг æмбæстæгтæ активондзинад кæй равдисдзысты хъæлæс дæттыны рæстæджы», – банысан кодтой уæрæсейаг дипломатон минæварады.

Амæйразмæ паддзахады сæргълæууæг Бибылты Анатоли æрсидт, республикæйы цæрджытæй уæрæсейаг æмбæстагдзинад кæмæ ис, уыдонмæ, цæмæй сæххæст кæной се ‘мбæстагон хæс æмæ хайад райсой Уæрæсейы Федерацийы президентон æвзæрстыты.

Хуссар Ирыстоны къухдариуæгад дæр мадзæлттæ исы æвзарæн фадгуыты æдасдзинады æмæ организацион фарстатæ скъуыддзаг кæныны фæдыл.

Бæрæг куыд у, афтæмæй УФ-йы Федерацийы Советы 2017 азы 15 декабры уынаффæмæ гæсгæ Уæрæсейы Федерацийы президентон æвзæрстытæ нысан æрцыдысты 2018 азы 18 марты.