Нæ фыдæлтæй нæм цы ‘гъдæуттæ баззад, уыдоныл, Райгуырæн бæстæйыл æмæ мадæлон æвзагыл рæзгæ фæлтæр хъуамæ уой æнувыд, уарзой сæ æмæ сæ ма рох кæной.  Нæ фæсивæд сты нæ фидæны ныфс, уыдонмæ кæсы ирон æвзаг æмæ нæ фыдæлты æгъдæуттæ бахъахъхъæнын  æмæ  фидæны  фæлтæртæм адæттын. Ӕмæ цæмæй афтæ уа, уый тыххæй абон мах раз лæууы, уыцы удварнон хæзнатæ нæ кæстæртæм адæттыны ахсджиаг хæс. Мах сын хъуамæ бауарзын кæнæм нæ национ æргъæдтæ афтæ, æмæ сыл æрхъæцмæ дæр куыднæ лæууой.

Ныртæккæ мæ дзырды сæр у, миддунейæ дæр æмæ æддаг бакастæй дæр, йæ алы дзырды æмæ фезмæлдæй дæр ирондзинад чи æвдисы, йæ мадæлон æвзагмæ уарзондзинад йæ зæрдæйы арфы æвæрд кæмæн ис, ахæм чызг, РХИ-йы Паддзахадон педагогон университеты ирон – уырыссаг æвзаг æмæ литературæйы факультеты 2-æм курсы студенткæ Сиукъаты Виктория. Викторияимæ чысыл рæстæг аныхасгæнгæйæ дæр ис рахатæн, йæ хъуыдыкæнынад, йæ ныхасы равæрд амад кæй у æрмæстдæр йæ мадæлон æвзагыл, йе сныхас дæр зæрдыл æмбæлы дзырдтæй аивдзинад æмæ зæлынадæй. Æрыгон чызг астæуккаг скъола каст фæуыны фæстæ, æрмæст уæлдæр ахуырад райсыны охыл нæ бацыд уæлдæр ахуыргæнæндонмæ, фæлæ равзæрста йæ зæрдæмæ æппæты æввахсдæр цы дæсныйад лæууыд, уый бæстондæр базонын. Райдайæн кълæсты ахуыргæнгæйæ дæр Викæйæн æнцон уыд йæ мадæлон æвзагыл ахуыр кæнын, иннæ предметтæй уæлдай фылдæр хъусдард здæхта ацы предметмæ, йæ хæслæвæрдтæ æххæст кодта кæддæриддæр. Йæхæдæг куыд радзырдта, афтæмæй йæ чысыл зæрдæйы мадæлон æвзагмæ цы уазондзинад уыд, уый йын ноджы фæарфдæр кодта йæ ахуыргæнæг Дыгъуызты  Лианæ.  «7-æм  къласы ма куы ахуыр кодтон, уæд мæхицæн фидарæй дзырд радтон, мæ ахуыр кæй адарддæр кæндзынæн, æрмæстдæр, мадæлон æвзаджы факультеты æмæ дарддæр дæр кусдзынæн ацы хаххыл. Чизоны мæ нæ рауайа, мæхи куыд фæнды, ахæм ирон æвзаджы дæсны, не суон ахуыргонд, фæлæ  мæхиуыл кусдзынæн, цæмæй мæ мадæлон æвзаг æмæ мæ ирон адæмæн иучысыл исты ахъаз фæуон» – зæгъы Виктория.

Кæй зæгъын æй хъæуы, ахуыргæнинагæн йæхи куы бафæнда, куы йын уа иу кæнæ иннæ предметмæ цымыдисдзинад, уæд ахуыр кæндзæн куыд æмбæлы, афтæ. Викæ ирон æвзагмæ ахæм æнувыд ахаст кæй дардта, уый йын ахъаз у, ныртæккæ уæлдæр ахуыргæнæндоны дæр æнтыстджынæй ахуыр кæнынæн. Уыцы хъуыддаджы уый бузныг у, сæйраджыдæр, скъолайы ахуыргæнджытæй, æмæ ныр та университеты лектортæй.  Йæ дарддæры фæндтæ дæр æрмæстдæр йæ мадæлон æвзагыл кусынимæ нывæнды æмæ йæ ныфс ис, йæ фарсмæ кæй балæудзысты ирон æвзаджы дæснытæ, уыдоны æххуысæй кæй райсдзæн æмбæлон зонындзинæдтæ, æмæ йæ ахуыр кæй адарддæр кæндзæн бæрзонд-дæр æмвæзадыл. «Абоны рæстæгæн райсом раздахæн нал ис, – зæгъы Викæ, – æмæ мæн фæнды, ныртæккæ нæ фæсивæдæн цы иттæг хорз уавæртæ ис, уыдонæй æппæтварсонæй дæр спайда кæнын. Нæй афтæ зæгъæн, мадæлон æвзагыл нæ цæуы фаг куыст, зæгъгæ, фæлæ дугтæ ивынц дугты, уыимæ цæуынц ногдзинæдтæ дæр æмæ хорз уаид, ирон æвзаджы рæзтмæ дæр хаст куы æрцæуиккой ахæм ногдзинæдтæ. Сæйраджыдæр мæн фи-дæны фæнды ахæм фарстытыл бакусын».

Хъомыладон фарстатыл дзургæйæ, Викæ зæгъы, бинонты ‘рдыгæй æндæвдадæн кæй ис стыр нысаниуæг. Уыдоны амындтытæ сабитæ  арфдæр айсынц сæ зæрдæмæ. Скъолайы ахуыргæнджытæй дарддæр ма Викæйæн  мадæлон æвзаг бауарзын кæнынæн ахъаз фесты йæ бинонтæ  дæр. Уыдон кæддæриддæр ирон æгъдæуттæ æмæ культурæ уарзын кæнынц сæ кæстæртæн, сты ирондзинадыл хæст бинонтæ. «Скъолайы ма куы ахуыр кодтон, уæд-иу уыд афтæ, æмæ-иу сæ мæ хæслæвæрдтæ æххæстгæнгæйæ бафарстон цæмæйдæрты. Уыдон-иу кæддæриддæр уыдысты цæттæ мæ фарстытæн сдзуапп кæнынмæ. Уымæн æмæ сæхæдæг дæр уарзынц сæ мадæлон æвзаг, зонынц ирон адæмы истори, аргъ кæнынц, цыдæриддæр уыимæ баст æргъæдтæ ис, уыдонæн. Кæй зæгъын æй хъæуы, ныртæккæйы цард бирæбæрцæй баст у материалон уавæримæ, фæлæ мæнмæ гæсгæ, махæй алчидæр куы равзара уыимæ баст дæсныйæдтæ, уæд сæфы нæ ирондзинад, нæ мадæлон æвзагыл фидæны чи куса, чи йæ размæ кæна, ахæм фæлтæртæ та мах хъæуы æнæмæнгæйдæр, уымæн æмæ мадæлон æвзаг у иу, уымæн баивæн ницæмæй ис», – зæгъы æрыгон чызг.

Викæйы хъуыдытæ арф æмæ дардыл кæй сты, хæлардзинад æмæ адæмы уарзондзинадæй йе ‘рыгон зæрдæ хæлбурц кæй кæны, ууыл дзурæг ма у, ныртæккæ не’хсæнады кæрæф, хиуарзондзинад æмæ æнæ-цæстуарзондзинад, ын æнцойдзинад кæй нæ дæтты, уый. «Ныртæккæ бирæтæ фæхъуыды кæнынц æрмæстæд сæхи гуылы бын бандзарыныл, ома, уæт æрмæстдæр мæнæн, иннæтæ та куыдфæнды дæр фæуæнт. Мæнмæ ацы хъуыддаг раст нæ кæсы. Алы адæймаг дæр хæсджын у, цæмæй йæ йæхицæн куыд фæнды хæрзиуджытæ, афтæ йæ фæнда адæмæн дæр. Ахæм хæларзæрдæ ахаст куы дарæм кæрæдзимæ, уæд нын цыфæнды тохты дæр æмæ цыфæнды зын уавæрты дæр тыхгæнæг тых нæ ракæндзæн», – зæгъы йæ хъуыдытæ Викæ.

Мадæлон æвзагыл зæрдæ ивæн нæй, зæгъ-гæ, сиды Викæ нырыккон ирон фæсивæдмæ æмæ цыфæнды дæсныйад ма равзарай, уæддæр хъуамæ æппæты фылдæр аргъ кæнай дæ мадæлон æвзагæн, культурæйæн, зонай ирон æгъдæуттæ æмæ кæддæриддæр уай нæ рагфыдæлты уæздандзинад æмæ сæрыстырдзидадæй æххæст.

Викæ кæд нырма æрыгон чызг у æмæ йын æнтысгæ дæр бирæ ницыма бакодта, уæддæр зæгъæн ис, кæй у курдиатджын, æмæ йе уонджы алы дадзинæй дæр ирондзинад чи æнкъары, йæ сæйраг хъуыддагыл райгуырæн бæстæмæ уарзондзинад чи нымайы æмæ уый сæраппонд йæ рæзгæ цард нывонд кæнынмæ цæттæ чи у, ахæм суинаджы кæстæр. Нæ фæсивæды ‘хсæн кæд тынг бирæ ис алыварсон курдиатджын кæстæртæ, уæддæр Викæйы хуызæттæ та сты хæрз цъус æмæ сæ алкæйы фарс дæр хъæуы фидар цæджындзау æрбалæууын, цæмæй ма банымæг уа сæ зæрдæты мадæлон æвзагмæ цы цæхæр су-дзы, уый.

Уæнт дын, Викæ, æнтыстытæ æмæ æххæст кæнæнт дæ фидæны фæндтæ.

Хуыгаты Милена

Comments are closed, but trackbacks and pingbacks are open.