Уанат-Цхинвалы магистралон донæмбырдгæнæны арæзтад хаст æрцыд 2019 азæн РХИ-йы социалон-экономикон рæзтæн ахъазгæнæг Инвестицион программæмæ. Объекты арæзтад план цæуы 2019 азы, фæлæ йын йæ проектыл та бакуыстой 2018 азы æмбисы.
Паддзахадон унитарон куыстуат «Водоканал»-ы сæйраг инженер Сиукъаты Иван куыд зæгъы, афтæмæй донуадзæны проектыл ивгъуыд аз куыста Красноярскы донуадзæн системæты «Водоканал-проект»-ы фæлтæрдджын организаци. Уыдон Хицауады æрхуындмæ гæсгæ 2018 азы кæрон æрцыдысты нæ республикæмæ æмæ бынаты федтой, донæмбырдгæнæн арæзт кæм хъуамæ æрцæуа, уыцы территори.
«Специалисттæ бакодтой геодезион куыстытæ, территорийы нывтæ систой. Цхинвалы резервуартæм цы дон цæуы, уымæн йæ дебет у 8-9 мин кубометры суткæйы мидæг. Уанат-Цхинвалы донуадзæн та суткæйы дæтдзæн 15 мин кубометры дон. Горæт хъуамæ æнæкъуылымпытæй ифтонг æрцæуа донæй. О, фæлæ цæмæй ахæм стыр гуырахстимæ дон иса горæт, уый тыххæй анализ скæнын бахъæудзæнис зæронд системæйæн æнæхъæнæй», – зæгъы Сиукъайы фырт.
Уæ зæрдыл уын лæууын кæнæм, Советон дуджы ам цы донæмбырдгæнæн уыд, уырдыгæй ифтонг цыд Гуырдзыстоны районтæй иу стыр хай. Ныр специалисттæ агурынц æмбырдгæнæны ифтонгадтæ, цъайтæ, кæцытæ сыджыты бын фесты. Цъыфдзаст бынæттæ сур æрцæудзысты, цæмæй проектгæнджытæ феной, цыран хъæуы дренажертæ æмæ ног цъайтæ сæвæрын. Уый фæстæ уыдон хъæуы доны хæтæлтæм баиу кæнын, ома, донуадзæны æппæт системæ хъуамæ сæндидза æмæ йæ ног фадгуытæ проектгонд æрцæуой.
Куыддæр боныгъæдтæ фæхуыздæр уой, афтæ ацы территорийы сыгъдæггæнæн куыстытæм æрæвналдзысты æмæ уый фæстæ та – йæ арæзтадтæ.
Уазæгты Марфа
Comments are closed, but trackbacks and pingbacks are open.