Сылгоймаг – нывгæнæджы миддунейы цырынгæнæг, йæ музæ. Сылгоймаджы æрдзон рæсугъддзинад – нывгæнæджы аивадон цырындзинад æвзæрынгæнæг.
Нæ республикæйы æмбæстæгтæ æмæ уазджытæн 8-æм марты бæрæгбонмæ уыдис цалдæр равдысты: нывгæнджыты цæдисы залы «Уалдзыгон симфони»-йы хайад райстой Би-гъуылаты Рудольф, Цхуырбаты Тамерлан, Багаты Фельдмар, Дзæгъиаты Альбинæ, Куымæридтаты Аркади æмæ æндæр авторты конд нывтæ. Æдæппæт аивадуарзджыты размæ рахастой 40 бæрц сфæлдыстадон куысты.
Цæдисы къухдариуæггæнæг Битеты Алан куыд загъта, афтæмæй равдыст бæрæгбоны цытæн уыд æмæ, уымæ гæсгæ нывтæн сæ фылдæр у сæрмагондæй сылгоймаджы фæлгонцимæ баст.
«Нæ фæнд уыд нæ цард рæсугъдгæнджытæ, амондхæсджытæ æмæ царддæттæг Сылгоймæгты зæрдæтæ бахъæлдзæг кæнын æмæ сын балæвар кодтам ацы равдыст. Арфæ кæнæм се ‘ппæтæн дæр æмæ сын нæ зæрдæ зæгъы мидбылхудт æмæ уалдзыгон дидинæгау аив бакаст», – загъта Битеты фырт.
Национ музейы равдысты та равæрдтой зынгæ ирон нывгæнджытæ Тугъанты Махарбег, Санахъоты Барис, Санахъоты Валери, Хъотайты Григори æмæ æндæрты куыстытæ. Фенæн дзы уыд Хетæгкаты Къостайы «Анна Попова»-йы портрет, «Скифаг паддзах», «Хъисфæндырæй цæгъдæг чызг», «Сылгоймаджы фæлгонц» æмæ бирæ æндæр нывтæ.
Равдысты организатортæ куыд загътой, афтæмæй иу къуырийы дæргъы аивадуарзджытæн сæ бон уыдзæн æрбацæуын Национ музеймæ историон аивадон экспозицитæ фенынмæ. Афтæ ма сын фадат уыдзæнис музейы агъуысты æвæрд экспонаттимæ базонгæ уæвынæн.
ХУЫГАТЫ Миленæ
Comments are closed, but trackbacks and pingbacks are open.