Донецк æмæ Луганскы Адæмон Республикæтимæ активон экономикон æмгуыстад кæнынæн Хуссар Ирыстоны æппындæр ницы хъыгдары. Ацы бонты Хуссар Ирыстон æмæ Луганскы æхсæн ацы фадыджы бафыст æрцыд сразыдзинад. Ацы экономикон сразыдзинад дыууæ бæстæйæн цы фадæттæ гом кæны, уый тыххæй чысыл брифинджы рæстæджы Информаци æмæ мыхуыры комитеты сæргълæууæг Хъотайты Мария афтæ радзырдта:
«Сразыдзинады фæлгæтты биноныг æрцæудзысты туризм, сæудæджерад, культурæ æмæ зонады фадыджы ахастытæ.
Луганскы республикæйы хæдбардзинад нæ бæстæ банымадта 2014 азы, биноныг сты дипломатон ахастытæ. Уымæ гæсгæ нæ æппындæр ницы хъуыддаг къуыхцы кæны экономикон фадыджы æмгуыстад райтынг кæнынæн.
Æмбæхсинаг нæу, нæ экономикæ нырма раппæлинаг уавæры кæй нæй, нырма нæ тыхы нæй нæхи бынæттон хæлцадон продукттæй сифтонг кæнын.
Ацы аз 10 азы æххæст кæны нæ бæстæйы паддзахадон хæдбардзинад банымайыны хъуыддагыл æмæ нын нырма æрæджы фæзынд фыццаг инвестортæ, кæцытæ архайынц кондад æрбæстон кæныныл. Уыдонæй иу у «Растдон». Ацы дзидзакуыстгæнæны продукци æрæджы бæстæйы сæргълæууæг Бибылты Анатоли аласта Донецкмæ Хуссар Ирыстонæй бархионтæн», – дзырдта Хъотайты Мария.
Йæ ныхæстæм гæсгæ, базарадон ахастытæ райтынг кæныныл дзырд куы цæуа, уæд нырма бамбарын хъæуы уый, æмæ хæстон уавæрты кæцыфæнды экономикæ æмæ экспорты фадæттæ дæр фæкъуындæг вæййынц. Зæрдыл æрлæууын кодта, зæгъгæ, Донецк æмæ Луганскы Адæмон Республикæты егъау сæудæджерадон объекттæ æрæджыйы онг дæр Украинæйы æфтиæгты фылдæр хай ифтонг кодтой. Фæлæ ацы дыууæ æвзонг республикæйы Украинæйы экономикон æмæ политикон тыгъдадæй куы рахызтысты, уæд бæрæг фæкъаддæр сæ экспортон хъомыс. Уæрæсеимæ æмгуыстад æрбæстон кæнын та сын фадат нæ дæтты, нымад республикæты статус сын кæй нæй, уый тыххæй æмæ уæрæсейаг бангон системæйы хъуагдзинадмæ гæсгæ, кæд сæ националон æхца уырыссаг сом у, уæддæр. Донецк дæр æмæ Луганск дæр егъау тыхтæй архайынц сæ экспортон хъарутæ Уæрæсейы ‘рдæм раздахын, фæлæ нырма хисæрмагонд æлхæн-джытæй фылдæр сæ къухы ницы бафтыд.
«Уымæ гæсгæ махæн æмгуыстад æмæ кæрæдзийæн нæ фæлтæрддзинад дæттын ахсджиаг сты, кæд æмæ уæвæг æмæ ног уагдæттæ сæ къахыл слæууын æмæ байгом кæныныл архайæм, уæд дæр. Уый нын фæндаг байгом кæндзæн æнтыстджын бизнесмæ», – банысан кодта ныхасгæнæг.
Йæ хъуыдымæ гæсгæ, куыст райдайын хъæуы чысыл товартæ ласынæй. Уыдон стыр æфтиаг не ‘рхæсдзысты, фæлæ политикон æгъдауæй уый æнæмæнгхъæуæг у. Уымæн æмæ нырма æрбæстон хъæуы æмгуыстад ацы бæстæтимæ, бæстон цæудзæн æрзылды фæфылдæр кæныны фарст.
Хъотайты чызг куыд банысан кодта, уымæ гæсгæ абоны онг бафысгæ документтæй се ‘ппæтæй пайдадæр суыдзæн экономикон æмгуыстады фæдыл сразыдзинад. Уый, йæ хъуыдымæ гæсгæ, суыдзæн пайдаджын, кæд æмæ æрмæст гæххæттыл фыстæй нæ баззайа, уæд.
Нæ уацх.
Comments are closed, but trackbacks and pingbacks are open.