Ацы аз 18 марты Уæрæсейы Федерацийы уагъд цæудзысты президентон æвзæрстытæ. Уыцы æвзæрстытæн ис егъау нысаниуæг, куыд Уæрæсейы Федерацийы, афтæ æнгом политикон ахастытæ йемæ цы паддзахадтæн ис, уыдонæн дæр. Уыцы паддзахадты ‘хсæн ис Республикæ Хуссар Ирыстон дæр æмæ йæхи цæттæ кæны Уæрæсейы Федерацийы æвзæрстытæм, баконд æрцæудзысты æвзарæн фадгуытæ, уымæн æмæ Хуссар Ирыстоны æмбæстæгты фылдæр хай сты уæрæсейаг æмбæстæгтæ. Афтæ, æмæ хуссарирыстойнаг æмбæстæгтæ егъау хъусдард здахынц Уæрæсейы президентон æвзæрстыты компанимæ.

Мах бацымыдис кодтам ацы æвзæрстыты тыххæй нæ республикæйы æхсæнадон архайджыты хъуыды базонынмæ.

Тедеты Вадим, РХИ-йы паддзахадон университеты ректор:

Уæрæсейы Федерацийы президентон æвзæрстытæ ныртæккæ уагъд цæуынц егъау æнæпрецедентон æддагполитикон æндыгъд уавæры æмæ егъау санкциты рæстæджы, кæцы райтынг кодтой ныгуылæйнаг политиктæ Уæрæсейы ныхмæ. Фæлæ ныртæккæ Уæрæсейы Федерацийы сæргъ лæууы тыхджын, хъаруджын, зондджын президент Владимир Путин, кæцы æппæт санкциты, æддагполитикон æндыгъдады ныхмæ ссары тыхтæ экономикæ, ахуырад, социалон фадыджы фарстатæ скъуыддзаг кæныны сæраппонд. Хуссар Ирыстон хауы Уæрæсейы Федерацийы геополитикон фарсхæцджытæм. Уымæ гæсгæ ацы æвзæрстытæн стыр нысаниуæг ис канд Уæрæсейы нæ, фæлæ Хуссар Ирыстоны царды дæр. Махæн ацы æвзæрстытæ скъуыддзаг кæнынц ахæм фарстатæ, куыд стабилондзинад, æмгуысткæнынад, æдасдзинад. Ацы фарстаты скъуыддзаг кæнгæйæ, мах Уæрæсейы Федерацийы уынæм, куыд нæ стратегион цæдисон, афтæ. Мах æвдисæн стæм, фæстаг рæстæджы Владимир Путин кæй уадзы, ахæм политикæ, кæцы баст у стабилондзинад, национ идеяты райрæзтимæ  æмæ уый фæстиуæгæн Владимир Путин æнкъары Уæрæсейы æвзарджыты егъау тых. Æмæ мах та хуссарирыстойнаг æвзарджытæ, хъуамæ саразæм раст æвзæрст.

Дзиццойты Юри –  ХИПУ-йы ирон æвзаг æмæ иумиаг æвзагзонынады кафедрæйы сæргълæууæг, доцент.

Кæй зæгъын æй хъæуы, æз дзурын мæ хъуыды ацы фарсты фæдыл æмæ мæм афтæ кæсы, æмæ дызæрдыггаг нæу, ацы æвзæрстыты Владимир Путин кæй суыдзæн Уæрæсейы Федерацийы президент. Æвзæрстыты компанийы дзырд цæуы иннæ политикты рейтингыл, ома, чи сæ кæцы бынат бацахсдзæн, ууыл. Уый фæдыл та æз хъуыды кæнын афтæ, дыккаг æмæ æртыккаг бынат адих кæндзысты Павел Грудинин æмæ Владимир Жириновский. Уыцы дыууæйæ чи кæцы бынатыл ацæудзæн, уый мæнæн зын зæгъæн у. Иннæ кандидат – Сергей Бабурин, уый лæгæй-лæгмæ зонын. Хорз адæймаг у, фæлæ мæм афтæ кæсы, иу процент дæр нæ райсдзæн. Ксения Собчак, ацы кандидаты регистраци кæнын бынтондæр нæ хъуыд. Иуæрдыгæй йæ интеллект уыйас нæ сырæзт, цæмæй паддзахады сæргъ лæууа, уæлдайдæр та – Уæрæсейы Федерацийы. Иннæрдыгæй та – мæнæ æрæджы Мæхъæлы цы æнæраст ныхæстæ фæкодта адæмимæ фембæлгæйæ, уый тыххæй бынтондæр сисинаг уыд йæ кандидатурæ. Мæнмæ гæсгæ иу процент дæр нæ райсдзæн.

Нæ уацх.

Comments are closed, but trackbacks and pingbacks are open.