Уæрæсейы Федерацийы ‘рдыгæй Республикæ Хуссар Ирыстоны паддзахадон хæдбардзинады банымадыл 11 азы сæххæсты бæрæгбоны размæ информацион агентад «Спутник-Хуссар Ирыстон»-ы пресс-центры ауагъдæуыд пресс-конференци, цыран хайад райстой РХИ-йы Хицауады Сæрдар Пухаты Эрик, Фæсконфликтон фарстатæ бæстон кæныны фæдыл, РХИ-йы Президенты æххæстбарджын минæвар Джиоты Мурат æмæ Республикæ Хуссар Ирыстоны Уæрæсейы Федерацийы минæварады сæргълæууæг Марат Кулахметов. Уыдон   журналисттæн радзырдтой уæрæсейаг-хуссарирыстойнаг ахастыты рæзты æмæ Фæскавказы æрцæугæ цауты тыххæй.

Марат Кулахметов куыд радзырдта, афтæмæй Уæрæсейы Федераци æмæ Хуссар Ирыстоны ахастытæ алыварсон сты.

«Хуссар Ирыстон æмæ Уæрæсейы Федерацийы ‘хсæн арæзт æрцыд сæдæйæ фылдæр сразыдзинады. 2015 азы къухтæ цы сразыдзинæдтыл æрфыстæуыд, уыдон нæ ахастыты рахизын кодтой æмцæдисады ног æмвæзадмæ. Не ‘мгуыстад рæзы алыварсонæй. Уыдон, космос, сабырадон атом æмæ денджызы бынæй дарддæр анхъæвзтой нæ ахастыты алы фадыгыл дæр. Уæрæсейæн йæ дуæрттæ гом сты æмæ алыгъуызон фæндæттæм æнхъæлмæ кæсы йе ‘мцæдисонтæм», – банысан кодта Хуссар Ирыстоны УФ-йы минæвар Марат Кулахметов.

«НÆ РЕСПУБЛИКÆ РАЗМÆ ЦÆУЫ УÆРÆСЕЙЫ ÆХХУЫСЫ ФÆРЦЫ»

РХИ-йы Хицауады сæргълæууæг Пухаты Эрик куыд ра-дзырдта, афтæмæй хорз зоны, Хуссар Ирыстоны Уæрæсе цы куыст кæны, уый.

«Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы руаджы нæ республикæйы размæ цæуынц цардархайды фадгуытæ иууылдæр. Уыдон сты медицинон объекттæ æмæ ахуырадон уагдæттæ, экономикæ æмæ амалиуæгад. Нæ куыст æххæст кæнæм уæрæсейаг стандарттæм гæсгæ. Республикæ размæ цæуы уæрæсейаг æххуысы фæрцы. Уымæй дарддæр ма фæнд кæнæм Уæрæсейы Федерацийы Фæллойадон министрадимæ сразыдзинадыл къухтæ æрфыссын, кæцыйы фæрцы фæхуыздæр уыдзæн нæ адæмы царды æмвæзад», – банысан кодта Пухаты Эрик.

Уæрæсейы Федерациимæ интеграцийы фарсты фæдыл Хицауады Сæрдар куыд радзырдта, афтæмæй Хуссар Ирыстоны скъолатæ æмæ скъолайы агъоммæ уагдæттæ кусынц иумиаг уæрæсейаг программæмæ гæсгæ æмæ, Уæрæсейы цы стандарттæ ис, уыдонмæ гæсгæ.

Интеграцион процесс ма цæуы экономикæйы фадыджы дæр. «Интеграцион процесстæ цæуынц цардархайды æппæт фадгуыты. Уыцы хъуыддаджы нын тынг æххуыс кæныныц уæрæсейаг коллегæтæ.

ЕВРОКЪАМИСЫ КУЫСТЫ ФÆСТИУДЖЫТÆ НЫГУЫЛÆН НИЦÆМÆ ДАРЫ

Йæ рады Джиоты Мурат куыд фехъусын кодта, афтæмæй 2008 азы августы хæсты цаутæн реалон аргъ лæвæрд æрцыд Евроцæдисы хæдбар къамисы доклады, кæцыйы сæргъ лæууыд швейцариаг дипломат госпожа Хайди Тальявини.

«Къамис куыста дыууæ азы бæрц æмæ йæ доклады комкоммæ равдыста, 2008 азы августы Хуссар Ирыстоны ныхмæ хæст Гуырдзыстон кæй райдыдта, уый. О, фæлæ политикон приоритеттæм гæсгæ, Ныгуылæны нæ фæнды хæсты фæстиуджытæ фенын. Æгæрыстæмæй, хæст Гуырдзыстон кæй райдыдта, уый кæй къамис аскъуыддзаг кодта, уыцы Евроцæдисы минæвæрттæ дæр æй арæх ницæмæ фæдарынц, æмæ уый тыххæй мах бахъæуы, фадат нын цы фæзуæтты фæвæййы, уым сын сæ зæрдыл æрлæууын кæнын, æмæ сæ Тальявинийы доклады хатдзæгтæм раздахыны сæр», – банысан кодта Президенты æххæстбарджын минæвар æмæ ма йæ ныхасмæ бафтыдта, зæгъгæ,  2008 азы Хуссар Ирыстоны территорийыл Уæрæсе фидауынгæнæг кæй уыд, уый Ныгуылæны ферох.

Ныгуылæны, сæйраджыдæр, гуырдзиæгты проблемæ-тæ æндавынц, уыдоныл дзурынц, уый та æхсæнадæмон барад нæу, фæлæ у сæ политикон позици æмæ амбицитæ, кæцытыл, æнцойгæнгæйæ, хъыззы кæнынц гуырдзиаг истеблишменты дæр.

Джиоты Мураты ныхæстæм гæсгæ, нырма лигъдæтты фарст дæр тынг ахсджиаг у. «Уыцы фарстыл æруынаффæ кæнынмæ мах цæттæ стæм, фæлæ 2008 азы цаутæн объективон аргъгæнæг фарстатимæ иумæ», – загъта Джиойы фырт.

НЫГУЫЛÆН ЦÆТТÆ НÆУ

Йæ рады Хуссар Ирыстоны Уæрæсейы Федерацийы ми-нæвар Марат Кулахметов куыд радзырдта, афтæмæй Ны-гуылæны бирæ хъæстытæ ис, кæцыты æвдыст æрцыд ивгъуыд æнусы 90-æм азты, 2004 азы Хуссар Ирыстон æмæ Гуырдзыстоны ‘хсæн æрцæугæ цаутæ, кæцытæ фесты 2008 азы хæстæй.

«Хъæстытæ бирæ сты æмæ Ныгуылæнæй домынц æмбæлон серьезон къахдзæф – Хуссар Ирыстоны ныхмæ Михаил Саакашвилийы командæйы агресси банымайын. Фæлæ уый куы банымайа, уæд Ныгуылæны бар-æнæбары бахъæудзæн дыккаг къахдзæф саразын – Хуссар Ирыстоны паддзахадон хæдбардзинад кæй банымадта, уый тыххæй Уæрæсейы Федерацийы рæстагон архайд банымайын. О, фæлæ Ныгуылæн уымæ цæттæ нæу, æмæ уый мидæг ис проблемæ дæр», – бахахх кодта Марат Кулахметов.

Уæрæсе хайад исы алы æмæ алыгъуызон æхсæ-надæмон тæрхондæтты, уыцы нымæцы 2008 азы августы хæсты цауты фæдыл дæр. Фæлæ куыд уынæм, афтæмæй тæрхонгæнджытæ политикæйыл хæст кæй сты, уый тыххæй нæ уынынц, кæнæ сæ нæ фæнды конкретон фæстиуджытæ фенын.

Дарддæр куыд радзырдта, афтæмæй Уæрæсе цивилизацион æгъдауæй тох кæны рæстдзинады сæрыл.

«2008 азмæ Хуссар Ирыстоны территорийыл Уæрæсе фидауынгæнæг кæй уыд æмæ гуырдзиаг-ирон конфликты зонæйы æхсæны лæг кæй уыд, æмæ конфликтгæнæг та Хуссар Ирыстон нæ, фæлæ Гуырдзыстон кæй уыд, уый Ныгуылæны бирæтæй ферох. Уый рох кæнынц Тбилисы дæр, фæлæ сын æй алы хатт дæр мах сæ зæрдыл æрлæууын кæнæм», – фехъусын кодта Кулахметов.

 Уый куыд бамбарын кодта, афтæмæй хæстон цауты фæдыл тæрхондонон процесс нырма бирæ азты аххæсдзæн, скурпулезон куыст кæй у, уымæ гæсгæ.

ХУССАР ИРЫСТОНЫ ÆДАСДЗИНАД ÆМÆ РÆЗТ ПРИОРИТЕТОН СТЫ

Уæрæсейы минæвар журналисттæн ра-дзырдта Уæрæсейы Федерацийы регионтимæ Хуссар Ирыстоны æмгуыстады тыххæй дæр.

«Уæрæсейы Федерацийы субъекттимæ Хуссар Ирыстон йæ къух æрфыста 13-ы бæрц документтыл – фондз сразыдзинад æмæ аст суагъæйыл. Республикæ активон æмгуыст кæны Цæгат Ирыстонимæ. Æрмæст ивгъуыд аз Цæгат Ирыстон- Аланиимæ сæ къухтæ æрфыстой дыууæ бадзырдыл  Информацион фæрæзты æмæ туризмы фадгуыты, афтæ ма Алагиры район (РЦИ-А) æмæ Дзауы районы (РХИ) ‘хсæн къухтæ æрфыстæуыд суагъæйыл. Контакттæ динамиконæй рæзынц Республикæ Хъырымимæ дæр, кæцыимæ ивгъуыд аз къухтæ æрфыстæуыд дыууæ сразыдзинадыл æмæ æфсымæрон горæттæ та систы   Керчь æмæ Цхинвал», – фехъусын кодта Кулахметов.

 Уый куыд загъта, афтæмæй Нижний Новгород æмæ Владимиры областтимæ ахастытæ дæр активонæй рæзынц, Уæрæсейы Федерацийы 14 субъекты та фехъусын кодтой Хуссар Ирыстонимæ æмгуыстады тыххæй сæ цæттæдзинад. Уый тыххæй цы документ арæзт æрцыд, уый æркæсынмæ ныртæккæ ис Хуссар Ирыстоны Хицауадмæ.

ГУЫРДЗЫСТОНЫ ХÆСТОН АХУЫРТÆ СТЫ

ХЪУСДАРДЫ БЫН

НАТО Хуссар Ирыстоны арæнмæ æввахс Гуырдзыстоны территорийыл рæстæгæй рæстæгмæ хæстон ахуыртæ кæй фæуадзы, бынтон æрæджы та Гуырдзыстоны хъахъ-хъæнынады министр Леван Изория цы хъусынгæнинаг сарæзта, зæгъгæ, фæнд цæуы хæстон фадыджы æртæ азы æмгъуыдмæ Вашингтонимæ бадзырд саразын, æппæт уыдæттæ бахынцгæйæ, Хуссар Ирыстоны æдасдзинады тыххæй уæрæсейаг минæвар банысан кодта, зæгъгæ,  НАТО-йы бæстæ-тимæ æмæ АИШ-имæ Гуырдзыстоны æмгуыстад ис лæмбынæг хъусдарды бын.

«Кæй зæгъын æй хъæуы, æппæт уыдонмæ мах нæ хъус дарæм. Хуссар Ирыстоны территорийыл дислокацигонд 4-æм æфсæддон базæ сифтонг кæндзæн республикæйы æдасдзинад, УФ Æдасдзинады федералон службæйы Арæнхъахъхъæнæг управлени хъахъхъæны Хуссар Ирыстоны арæнтæ. Не ‘мгуыстады уыцы здæхт тынг ахсджиаг у æмæ ис нæ паддзахадты къухдариуæгадты æмæ æмбæлон структурæты лæмбынæг хъусдарды бын», – загъта дипломат.

Уый ма йæ ныхасмæ бафтыдта, зæгъгæ, 2008 азы августы Гуырдзыстоны æрдыгæй хæстон агресси бахынцгæйæ, арæзт æрцыд æмбæлон хатдзæгтæ.

«Сæйраг уый у, æмæ 11 азы дæргъы Хуссар Ирыстоны территорийыл уæвынад кæны сабырдзинад, адæм нал хъусынц нæмгуыты рæмыгъдтытæ, изæрыгæтты уынгты бирæ адæм фæтезгъо кæны, сывæллæттæ æда-сæй фæхъазынц. Æдасдзинады фадыджы уый у нæ иумиаг куысты фæстиуæг», – банысан кодта Марат Кулахметов.

«НÆ КУЫСТ ЗДÆХТ У АДÆМЫ ЦАРД ФÆХУЫЗДÆР КÆНЫНМÆ»

Ацы аз Хуссар Ирыстоны Уæрæсейы минæварадыл сæххæст дæс азы. Уыцы æм-гъуыдмæ дипломатон ведомствойы цы ивындзинæдтæ æрцыд, уый тыххæй минæварады сæргълæууæг банысан кодта, зæгъгæ, кæд дипведомствойы разылæууæг хæстæ   фæивтой, уæддæр æнæ ивгæйæ баззадысты приоритетон здæхтытæ  республикæйы рæзт æмæ ныры этапы Инвестпрограммæйы реализаци.

«Æппæт нæ куыст здæхт у, Хуссар Ирыстоны адæмы цард фæхуыздæр кæнынмæ», – бахахх кодта Марат Кулахметов.

НЫСАНИУÆГДЖЫН БОНТÆ ИУУЫЛДÆР

АХСДЖИАГ СТЫ

Хуссар Ирыстоны ногдæр историйы бирæ ис хъысмæтскъуыддзаггæнæн бонтæ, уыдонæй алкæцыдæр у ахсджиаг, уымæн æмæ республикæ аразыны хъуыддаджы алы къахдзæфæн, алы бонæн дæр йæхи бынат ис. Джиоты Мураты хъуыдымæ гæсгæ, уыцы хъысмæтскъуыддзаггæнæн бонтæй никæцыйы ис рахицæнгæнæн.

«Нæ паддзахад аразгæйæ, мах иунæг рæдыд дæр не ‘руагътам. 90-æм азты раст къахдзæфтæ куынæ сарæзтаиккам, уæд нæ ныгуылæн ныххурх кодтаид, Хъуылымбегты Торезы та гуырдзиæгтæ ахæстоны сбадын кодтаиккой, куыд фыдгæнæг, афтæ. Фæлæ Торез нымад æрцыд намысы ахæст №1-æй æмæ Гуырдзыстоны хицауиуæгад кæд афæ-дзы дæргъы тынг архайдта, уæддæр æм ницы аххосаг ссардтой æмæ сæрибар æрцыд. Уый та дзурæг у Республикæ Хуссар Ирыстоны къухдариуæгад æмæ адæмы раст архайдыл», – журналисттæн радзырдта Джиоты Мурат.

Журналистты цымыдис кодта, Хуссар Ирыстоны нысаниуæгджын бонтæй иууыл ахсджиагдæр кæцы у, уыцы фарст.

Президенты æххæстбарджын минæвар Джиоты Мурат куыд банысан кодта, уымæ гæсгæ «20 сентябрь дæр, 9 январь дæр, 29 май дæр Хуссар Ирыстоны историйы ахсджиаг бонтæ сты. Иуы дæр дзы нæй банымайæн иннæ бонтæй ахсджиагдæрыл, уымæн æмæ уыцы бонты нысаниуæгджын цаутæ иу-уылдæр уыдысты æнæмæнгхъæуæг æмæ ахсджиаг».

«Нæ адæм æддагполитикон ориентирæй равзæрста Уæрæсейы æмæ мах цыдыстæм уыцы фæндагыл, нæ фæндагæй æппындæр нæ фæиппæрд стæм, афтæмæй æмæ 2008 азы 26 августы Уæрæсе банымадта, реалонæй чи уæвынад кодта, уыцы паддзахады, кæцы рацыд йæ рæзты алы къæпхæныл дæр», – бахахх кодта РХИ-йы Президенты æххæстбарджын минæвар Джиоты Мурат.

Осиаты Индирæ

Comments are closed, but trackbacks and pingbacks are open.