Грознæйы уагъд æрцыд VIII-æм Æппæтуæрæсейон сæрдыгон Универсиадæ.  Ерыс кодтой уæгъдибар хъæбысхæстæй архайæг спортсментæ. Ирон богалтæн бантыст цыппар сыгъзæрин, æртæ æвзист æмæ æртæ та бронзæ майданы рамбулын. Универсиадæйы уæлахиздзаутæ систы Хъызынты Дзамболат (65 кг), Багаты Арслан (86 кг), Наниты Славик (92 кг) æмæ Джыгкайты Тамик (97 кг). Æвзист призертæ систы Цхуырбаты Батырбег (70 кг), Бæдиаты Алик (79 кг) æмæ Кцойты Алихан (92 кг). Бронзæйон хорзæхтæ та рамбылдтой Калоты Сослан (74 кг), Гæджиты Аслан (74 кг) æмæ Хапсаты Аслан (86 кг).

Универсиадæйы фæлгæтты ма уагъд æрцыдысты ерыстæ сылгоймæгты хъæбысхæстæй дæр. Уым дæр расгухтысты Ирыстоны хъæбысхæсты скъолайы хъомылгæнинæгтæ. Аккаг ныхмæлæуджытæ нæ разынд Кæсæбиты Алинæ æмæ Танделаты Аминæйæн. Алинæ фыццаг бынат бацахста 62 кг уæзы категорийы. Аминæ та пьедесталы фыццаг къæпхæнмæ схызт 65 кг уæзы категорийы.

Уæ зæрдыл уын лæууын кæнæм уый дæр, æмæ ацы аз Кæсæбиты Алинæ кæй ссис Уæрæсейы чемпионаты уæлахиздзау. Танделаты Аминæ та ацы аз рамбылдта Поддубныйы Къорды (борцовская Лига Поддубного).

 

ФУТБОЛ

Райдыдта футболæй Уæрæсейы фыццаг къорды чемпионат. Фыццаг туры Дзæуджыхъæуы «Алани» Грознæйы Султан Билимхановы номыл стадионы фысымиуæг кодта Махачкалайы «Динамо»-йæн, кæцы ацы аз фыццаг къордмæ схызт дыккаг дивизионæй. Ацы хъазты фаворитыл нымад цыдысты дзæуджыхъæуккæгтæ, кæцытæ сæ ног тренер Тедеты Зауыры къухдариугадæй уагътой фыццаг официалон хъазт. Фæлæ уыцы хъуыдыимæ разы нæ разындысты уазджытæ. «Алани»-йы атакæйæн дзуапп кодтой сæхи атакæйæ. Дыууæ хатты та сын бантыст алайнæгты кулдуары пурти бакъуырын, фæлæ дыууæ хатты дæр тæрхонгæнæг нæ банымадта, зæгъгæ, хæлд æрцыд хъазты фæтк. «Алани»-йæн дæр уыд цалдæр хорз гæнæны пурти бакъуырынæн, фæлæ сæ не спайда кодтой. Афтæмæй фембæлд фæцис 0:0 хыгъдæй.

Дыккаг туры «Алани» 24 июлы уазæгуаты хъаздзæн Мæскуыйы «Родина»-имæ.

ХУРИТЫ Батрадз

 

Comments are closed, but trackbacks and pingbacks are open.