Тыбылты Леонид: «Гуырдзыстонимæ арæнгæрон районты цæрæг æмбæстæгты фæрныгад махæн у иттæг ахсджиаг»

Ленингоры районы Цъинагары зонæмæ кусæгон балцы фæстиуджыты фæдыл РХИ-йы Президент Тыбылты Леонид ауагъта æмбырд уырдыгæй æрæздæхгæйæ. Æмбырды хайад райстой Цхинвалы районы администрацийы сæргълæууæг Плиты Алан, РХИ-йы Автомобилон фæндæгты арæзтад æмæ эксплуатацийы фæдыл комитеты сæрдар Гуыззыдтаты Эдуард æмæ паддзахадон-унитарон куыстуат «Дорэкспострой»-йы генералон директор Лалыты Мурат. Цы темæйыл уынаффæ кодтой, уый уыд иувæрсты цæуæг Цъинагар-Громы фæндаджы арæзтад, кæцыйыл фембæлды дзырдтой Цъинагары зонæйы цæрджытæ. Ацы фæндаг административон æгъдауæй хауы Цхинвалы районмæ æмæ або-ны бонмæ уый у æвадат, цæуынæн нæ бæззы. Куыд банысанчындæуыд, афтæмæй ацы фарст иттæг актуалон у цæрджытæн, уымæн ацы фæндагæн йæ дæгъ у 15 киллометры æмæ у æртæ хатты цыбырдæр, ныртæккæ цы фæндагыл цæуынц хъæуы цæрджытæ, уымæй. Президент банысан кодта, зæгъгæ, цæрджытæ цы фарст æрæвæрдтой, уый у иттæг ахсджиаг æмæ йæм хъæуы æвæстиатæй æркæсын. «Кæд æмæ абон Цхинвалæй Цъинагармæ фæндагыл цæуын хъæуы 2 сахаты, уæд ацы фæндаджы эксплуатацимæ радтыны фæстæ уый зынгæ фæцыбырдæр уыдзæн, — загъта уый, — æмæ райсомæй республикæйы столицæмæ чи рацæуынц сæ хъуыддæгты фæдыл æмæ фæстæмæ чи хъуамæ баздæхой, уыдонæн фæндагыл цы къаддæр рæстæг бахардз кæной, уымæн ис стыр нысаниуæг».

Президент Плиты Аланæн æмæ фæндагон службæтæн бахæс кодта, цæмæй уыцы бон ацыдаиккой Цъинагармæ, федтаиккой фæндаджы уавæр æмæ бынаты сбæрæг кодтаиккой, цахæм ресурстæ хъæуы, цæмæй фæндаг арæзт æрцæуа æмæ йыл адæм цæуой.

«Не ’мбæстæгты фæрныгад, уæлдайдæр та Гуырдзыстонимæ арæнгæрон районты цæрджыты фæрныгад махæн у иттæг ахсджиаг æмæ цæрджытæм проблемон фарстытæ куы фæзыны, уæд республикæйы разамынад хъуамæ уыдонæн оперативон æгъдауæй дзуапп дæтта», — банысан кодта Президент.