РХИ-йы Президент Тыбылты Леонид фембæлд ХПÆ-йы паддзахадтæ-хайадисджытимæ, Республикæ Хуссар Ирыстон æмæ Республикæ Абхазимæ социалон-экономикон æмгуысткæнынады фæдыл Уæрæсейы Федерацийы Президенты Управленийы хистæр Олег Говорунимæ, кæцы нæ республикæмæ æрцыд дыууæбонон кусæгон визитимæ.
Фембæлды ма хайад райстой Хицауады Сæрдар Хъуылымбегты Доменти æмæ ХПÆ-йы паддзахадтæ-хайадисджытимæ, Республикæ Хуссар Ирыстон æмæ Республикæ Абхазимæ социалон-экономикон æмгуысткæнынады фæдыл Уæрæсейы Федерацийы президенты управленийы хистæры хæдивæг Денис Травин.
Паддзахады сæргълæууæг раарфæ кодта уæрæсейаг коллегæтæн æмæ бузныджы ныхæстæ загъта, республикæйы проблемæтæ скъуыддзаг кæнынмæ сын зæрдæбын ахаст кæй ис, уый тыххæй. Уый банысан кодта, зæгъгæ, аивгъуыйгæ 2016 аз фæцис, Хуссар Ирыстоны дарддæры рæзты фæдыл æвæрццаг фæстиуджытимæ.
«Нæ иумæйаг куысты рæстæджы, 2014 азæй райдайгæйæ, мах серьезон бындур æрæвæрдтам республикæйы рæзты радон этапæн æмæ бахæццæ стæм æндидзынгæнæн процессты фæдмæ», – загъта Президент.
Уый банысан кодта, зæгъгæ, практикон æгъдауæй куыстытæ фесты Уæрæсейы Федерациимæ Æмцæдисад æмæ интеграцийы тыххæй бадзырды кæронмæ реализаци кæныны фæдыл.
«Мах æнхъæлмæ кæсæм æфсæддон æмгуысткæнынады фæдыл уæлæмхас сразыдзинæдтыл къухтæ æрфыссынмæ, кæцыйы фæстæ махæн нæ бон уыдзæн зæгъын, бадзырд реализаци кæй æрцыд», – загъта Тыбылты Леонид.
Уый ма фехъусын кодта, зæгъгæ, абоны бонмæ активон куыст цæуы 2018-2019 азтæн Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæдыл фæндæттыл.
«Нæ иумæйаг консультацитæ пайда уыдзысты, цæмæй æввахс рæстæджы фæндæттæ бавдыстæуа ног Инвестицион программæйы фæдыл, æмæ сыл дарддæр уынаффæ цæуа Æхсæнхицауадон къамисы рабадты, стæй фидар æрцæуа 2018-2019 азтæн радон Инвестпрограммæ», – загъта Президент.
Олег Говорун йæ рады бузныг загъта хуссарирыстойнаг паддзахады сæргълæууæгæн, бакæнгæ иумæйаг куыстæн стыр аргъ кæй скодта, уый тыххæй æмæ банысан кодта, загъгæ, къухтыбафтгæ æнтыст, сæйраджыдæр, у Тыбылты Леониды руаджы.
«Мах нæ архайдæн аргъ кæнæм куыд бæрзондэффективон æмæ иттæг конструктивон. Инвестицион программæ реализаци кæныны иумиаг куыстмæ куы æрæвнæлдтам, уæд ын саргъгæнæн уыдис æрмæстдæр куыд цавæрдæр арæзтадон коллапс. Æмæ æз нымайын, ацы цыбыр рæстæджы дæуæн æмæ дæ командæйæн бантыст аиуварс кæнын æппæт цухдзинæдты, æмбæрстгонд, æмбæлон фæтк æрæвæрын Инвестпрограммæ реализаци кæ-ныны», – загъта уый.
Олег Говорун банысан кодта, зæгъгæ, Уæрæсейы Федерацийы Нымайæн палатæ басгæрстыты фæстиуджытæм гæсгæ сæ докладты фенын кодтой, финансон фæрæзтæ æнæнысанмæздæхтæй хардз кæныны цаутæ кæй нæ уыд.
«Æнæнысанмæздæхтæй иу сом дæр хардз не ‘рцыд. Уый у иттæг ахсджиаг», – банысан кодта уый.
Æмцæдисад æмæ интеграцийы тыххæй бадзырд реализаци кæныныл дзургæйæ, Олег Говорун банысан кодта, зæгъгæ, ацы здæхты куыст цæуы æнтысгæйæ æмæ æввахс рæстæджы къухтæ æрфыстæуыдзæн уæлæмхас сразыдзинæдтыл, цæмæй бадзырд æххæст гуырахстæй реализаци æрцæуа. Уый ма афтæ банысан кодта, зæгъгæ, æнтыстытæ æнкъардæуы республикæйæн йæхи экономикон потенциал тынгдæр кæныны къабазы, ацы хаххыл кæд куыст нырма ивгъуыд аз райдыдта, уæддæр.
«Мах лæмбынæг нæ хъус дарæм сæйрагдæр параметртæм, кæцытæ баст сты ацы фарстимæ. Æз зæгъын, фыццаджыдæр, республикæйы хи æфтиæгты, адæмы бæрцы, кæцытæ кусынц æнæбюджетон къабæзты, афтæ ма инвестицитæ æрбакæныны тыххæй. Æппæт ацы æртæ параметрты фæдыл æнкъардæуы хорз фæстиуæг.
Республикæйы хи æфтиæгтæ ивгъуыд азимæ абаргæйæ сырæзтысты 14%, æнæбюджетон къабазы чи кусынц, уыдоны нымæц дæр фæфылдæр 14%, афтæ ма æнкъардæуы хи инвестициты æнæпрецедентон рæзт, кæцы у 60 % ивгъуыд азимæ абаргæйæ», – фехъусын кодта уый.
Афтæ ма Олег Говорун куыд загъта, уымæ гæсгæ æнтысгæйæ реализаци цæуынц социалон къабазмæ хауæг проекттæ. Уый банысан кодта, зæгъгæ, æрбавдисгæ статистикæмæ гæсгæ 2012 азæй райдайгæйæ Хуссар Ирыстоны гуырындзинад сырæзт 36%, мæлындзинад та фæкъаддæр 13%. Уый та дзурæг у, Тыбылты Леонид цы хæстæ æмæ нысæнттæ сбæлвырд кодта, уыдон раст æвæрд кæй æрцыдысты, кæцыйы руаджы цыбыр рæстæгмæ нæ къухты бафтыд бирæ хъуыддæгтæ саразын.
«Фæнды мæ зæрдыл æрлæууын кæнын, уыцы дыууæ азы пенсиисджытæн – Уæрæ-сейы Федерацийы æмбæстæгтæн, кæцытæ цæрынц Хуссар Ирыстоны территорийыл – сæ пенситæ астæуккаг нымадæй кæй фæфылдæр сты 18 %. Æппæт æнæмæнгхъæуæг уæлæмхас сразыдзинæдтыл кæронмæ куыст цæуы, æхцатæ фыст цæудзысты 2016 азы январæй. Бафыстыты бæрцтыл дзырд куы цæуа, кæцытæ хауынц паддзахадон æмæ муниципалон разамынады органты чи кусынц, уыдонмæ, уæд ам ис хорз динамикæ куыстмызд фылдæр кæныны хъуыддаджы: 2016 азы уый уыдис 14 %, 2017 азы та уыдзæн 16 %», – фехъусын кодта Олег Говорун.
Уый ма банысан кодта, зæгъгæ, æнæмæнгхъæуæг у лæмбынæг æруынаффæ кæнын 2018-2019 азтæн Инвестицион программæйы фæдыл нæ иумиаг куыстыл, зæгъгæ, ахсджиаг у бахъахъхъæнын социалон къабазы дарддæры рæзт, сæрмагондæй, объекты арæзтад фæуын, уæлæмхас инвестицитæ æрбакæнын, афтæ ма ног цæрæнуаты арæзтад дæр.
«Иу дзырдæй, Леонид Харитоны фырт, махæн ис серьезон плантæ. Раздæрау хæстæ сты бирæ, фæлæ æз нæ дызæрдыг кæнын дæ разамынды бын уыцы хæстæ æнтысгæйæ скъуыддзаг кæй æрцæудзысты», – загъта уый.
Республикæ Хуссар Ирыстоны Президенты официалон сайт
Comments are closed, but trackbacks and pingbacks are open.