Фæсивæдон политикæ, спорт æмæ туризмы комитеты Сæрдар Зассеты Сергей Информаци æмæ мыхуыры паддзахадон комитеты дзыллон информацион фæрæзты минæвæрттимæ йæ фембæлды ныхас аздæхта республикæйы туризм райрæзын кæныны фарстыл. Уый ныхæстæм гæсгæ, ацы фадыг у ведомствойы куысты рæхысы лæмæгъдæр цæг.

«Кæд æмæ 2015 азы РХИ-йы Фæсивæдон политикæ, спорт æмæ туризмы комитет æмæ УФ-йы туризмы агентады æхсæн фидаргонд æрцыд ацы фадыджы æмгуыстады сразыдзинад, уæддæр ацы фадыджы нæма зыны рæстмæ размæцыд. Абоны бон туристон продукты хуызы нæ бон равдисын цы у, уыдон сты æрмæстдæр: фистæгæй балцыты сæраппонд кæуыл бакуыстам, уыцы маршруттæ, æмæ уыдон та цымыдисон сты активон хæххон, хъæууон æмæ этнотуризмы хуызы улæфт уарзджытæй алкæмæн дæр.

Махæн нæ экологи иннæ регионтæй хуыздæр кæй у — рæсугъд хæххон æрдз, цымыдисон зайæгойты æмæ цæрæгойты дуне — уый цымыдис сæвзæрын кæнид туристтæм», — загъта уый.

Туризм райрæзын кæныны хъуыддаджы ныртæккæ ахсджиаг у дунеон æмвæзадмæ рахизын, ацы куысты фæдыл кæрæдзи зонæнтæй пайда кæнын, туристон продукт æмæ куыстгонд проекттæ кæм æвдисынц, ахæм æхсæнадон равдыстыты хайад исын.

«Махæн нæ бон нæма у нæхи проекттæ равдисæм, уымæн æмæ хорз проекттæн хъæуы материалон фæрæзтæ, цæмæй бацымыдис кæнай æмæ æрбаздахай инвесторты, уый тыххæй. Фæлæ кæд æмæ исчи цымыдис дæр бакæна, уæддæр ын мах хъуамæ проекттæ равдисæм, æмæ уый тыххæй та æмбæлон уагмæ æркæнын хъæуы туристон архайды фадыджы нормативон-барадон базæ æмæ раттын бадзырд сæххæст кæныны гарантитæ, æдасдзинады фадыджы уæддæр», — банысан кодта Зассеты Сергей.

Республикæ Хуссар Ирыстоны Официалон информацион портал

Comments are closed, but trackbacks and pingbacks are open.