Ныр цалдæр азы, апрелы мæйы райдианæй октябры мæйы фæудмæ, иу стæм бонæй дарддæр, сæумæрайсомæй ацæуын Тулдзы къох-мæ. Уым сатæг уæлдæфмæ атезгъо кæнын. Ардæм цæуынмæ мæ баразæнгард кодтой, уæдмæ йе ‘нæниздзинад кæмæн фæцудыдта æмæ ардæм цæуыны фæстæ кæмæн фæхуыздæр, ахæм цалдæр адæймаджы. Æмæ æз дæр мæхи хуыздæр æнкъарын райдыдтон. Кæй сæм байхъуыстон, уый тыххæй фæсмон нæ, фæлæ сын фæзæгъын бузныг. Уымæн æмæ мæнæн дæр цасдæрбæрцæй фæхуыздæр мæ куыстхъомдзинад, ме уæнгты змæлд. Уæдмæ зынтæй цы куыстытæ æххæст кодтон, уыдон ныр фæаразын æнцондæрæй. Ардæм ма æрвылбон дæр æрбацæуы 30 адæймагæй фылдæр æмæ уыдон дæр хуыздæр æмæ фидардæр кæнынц се ‘нæниздзинад.
Ам ма фенæн вæййы, æрмæст се ‘нæниздзинадыл чи аудынц, ахæмты нæ, фæлæ улæфынмæ, сæ рæстæг æрдзы хъæбысы, сыгъдæг уæлдæфы арвитын кæй бафæнды, бирæ ахæм æмбæстæгты дæр. Хъыгагæн, уыдонæй иутæ сæ хæринæгты баззайæццæгтæ ныууадзынц, кæм фæбадынц, уым æмæ æвзæрын кæнынц антисанитари.
Ивгъуыд аз сфæнд кодтон, цæмæй ныссыгъдæг кæнон Тулдзы къох. Мемæ хастон голлаг æмæ æрвылбон дæр æмбырд кодтон брæтты. Баисты ссæдзæй фылдæр. Бирæ чидæртæ-иу бацымыдис кодтой, зæгъгæ дын чи бахæс кодта. Æмæ мын чи хъуамæ бахæс кодтаид? Цы брон-иу æруыгътон, уыдон-иу раластон æмæ-иу сæ ныккалдтон горæты æввахсдæр бронкалæн асыччы. Афтæмæй йын йе ‘мбисыбæрц ныссыгъдæг кодтон.
Цæмæй Тулдзы къох æппынæдзух уа сыгъдæг, уый тыххæй, æвæццæгæн, æмбæлы æмæ йæм исчи дара йæ хъус. Мæ хъуыдымæ гæсгæ, фарст нæу зын аскъуыддзаггæнæн æмæ йыл æмбæлон органты хъæуы ахъуыды кæнын.
Банысан кæнын ма мæ фæнды уый дæр, æмæ Тулдзы къохыл кæрæй кæронмæ цæуы фæндаг. Хорз уаид, æмæ фæндагмæ æввахс æвæрд куы æрцæуид цалдæр бронкалæн асыччы, уæд уый дæр фæахъаз уаид йæ сыгъдæгдзинадæн. Уымæн æмæ уæд ардæм сæ рæстæг æрвитынмæ чи цæуынц, кæд улæфджытæ се ‘ппæт нæ, уыдон сæ хæринæгты баззайæццæгтæ æппариккой асыччыты.
Чи йæ чъизи кæны, уыдонæн та мæ бауайдзæф кæнын фæнды – уарзыс рæстæг æрвитын, уарз дæ фæстæ сыгъдæгæй ныууадзын дæр.
ГÆЗЗАТЫ Иван
Comments are closed, but trackbacks and pingbacks are open.