Хуссарирыстойнаг æвзонг теннисистттæ хайад райстой клуб «Бам-бей»-ы турниры, кæцы уагъд æрцыд Пятигорскы. Уый тыххæй хъусын кæны Уæлдæр спортивон дæсныйады скъолайы тренер Джиоты Мириан. Турниры 13 азы онг кæуыл цæуы, уыцы спортсменкæты ‘хсæн дыккаг бынат бацахста Тедеты Алинæ. Уый ма æртыккаг та ссис æмхæццæ къæйтты ‘хсæн ерысты. Æмхæццæ къæйтты ‘хсæн фыццаг бынат та бацахста Цхуырбаты Иринæ.
Уыцы рæстæджы ма Ессентукийы та уагъд æрцыд æхсæнрегионалон турнир «Шаг в будущее», зæгъгæ. Ам та дыккаг финалы дыккаг бынат бацахста Майя Касрадзе. Банысан кæнын хъæуы уый дæр, æмæ ацы спортсменкæтæ кæй ахуыр кæнынц Цхинвалы скъола-интернаты.
Бацæттæ сæ кодтой тренертæ Джиоты Мириан æмæ Уалыты Иринæ.
«Раст зæгъгæйæ, хорз цæттæ нæ уыдыстæм. Уымæн æмæ тренировкæтæ нал ауагътам. Фæлæ уымæ æнæкæсгæйæ сывæллæттæ равдыстой хорз бæрæггæнæнтæ», – загъта Джиоты Мириан.
ФУТБОЛ
Республикæ Хуссар Ирыстон расидыны боны цытæн уагъд цæуы РХИ-йы Президенты кубок рамбулыны сæраппонд турнир футболæй. Ерыстæ стыр цымыдисдзинад сæвзæрын кодтой футболуарзджытæм. Сæйраг призыл тох кæнынц 11 командæйы, кæцытæ дихгонд сты дыууæ дæлкъордыл. Уыдон сты Цхинвалы микрорайонты, республикæйы районты æмæ тыхон структурæты минæвæрттæ. Финалон хъазт уагъд æрцæудзæн 18 сентябры. Уæлахиздзау командæ хорзæхджын æрцæудзæн 100 мин сомæй, дыккаг бынат æрцахсæг командæйæн ратдзысты 50 мин сомы æмæ æртыккаг бынатыл чи ацæуа, уыцы командæйæн та лæвæрд æрцæудзæн 30 мин сомы.
***
Футболæй Уæрæсейы Фыццаг дивизионы 9-æм туры Дзæуджыхъæуы «Алани» 1:1 хыгъдæй ахъазыд «Тюмень»-имæ. Ныр Ирыстоны сæйраг футболон командæ æрæмбырд кодта 20 очкойы æмæ турнирон таблицæйы дарддæр дæр цæуы фыццаг бынатыл.
Радон туры дзæуджыхъæуккаг клуб 18-æм сентябры хъаздзæн Махачкалайы «Динамо»-имæ.
ХУРИТЫ Батрадз
