Битеты Павелы номыл 2-аг музыкалон скъолайы бæстыхайы сæ тæмæны сты цалцæггæнæн куыстытæ. Цхинвалы администрацийы цæрæнуатон-коммуналон хæдзарады хистæр Хъуылымбегты Роберт куыд зæгъы, афтæмæй бæстыхай сцæттæ уыдзæн январы кæронмæ. Йæ ныхæстæм гæсгæ куыстытæн сæ фылдæр хай ныридæгæн фесты. Электрохæххытæн сæ иу хай раивтой, раивтой бæстыхайы æмбæрзт дæр, афтæ ма сæвæрдтой ног рудзгуытæ. Куыстытæ æххæст кæныны рæстæджы рабæрæг, дыккаг уæладзыджы къулты иу хай хъæдæй кæй уыдысты æмæ сæ раивтой блоктæй. Æххæст дзы цæуынц бæстонгæнæн куыстытæ.
«Ныртæккæ куыст цæуы объекты горæты администрацийы балансмæ радтыныл. Раздæр ацы бæстыхай уыд хъæууон механизацигонд ахуыргæнæндоны, уыдон нырма дæр скъолайы ахсынц цалдæр хатæны», – загъта цæрæнуатон-коммуналон хæдзарады сæргълæууæг.
Музыкалон скъолайы фасад цалцæг æрцæудзæн, бæстыхай горæты администрацимæ лæвæрд куы ‘рцæуа, уый фæстæ.
Музыкалон скъолайы ахуыргæнджытæ ахуыртæ уагътой, 25 азы дæргъы ахуыр кæнынæн чи нæ бæззыдысты, ахæм хатæнты. Ныртæккæ ам ахуыр кæнынц 175 ахуыргæнинаджы 7 хайады ахæм дæсныйæдтыл: аккордеон, ирон фæндыр, скрипкæ, фортепиано, эстрадон вокал, гитарæ æмæ гуымсæг. Скъолайы цалцæггæнæн куыстытæ райдыдтой ивгъуыд азы декабры, ахуыргæнæн уагдонмæ паддзахады сæргълæууæг Бибылты Анатоли куы бацыд, уый фæстæ. Хатæнты азилгæйæ, уый горæты администрацийæн бахæс кодта, цæмæй цыбыр рæстæгмæ скъола цалцæг æрцæуа.
Comments are closed, but trackbacks and pingbacks are open.