«Югосетпотребнадзор»-ы  комитет сног кодта «тæвд хаххы» куыст коронавирусы пандемийы рæстæджы республикæйы цæрджытæн баххуыс кæныны тыххæй. Йæ байгом кæнынæй – 12 мартæй ацы хахмæ бахатыдысты 500 адæймаджы, фехъусын кодтой «Рес»-æн.

«Тæвд хахмæ» бахатынц алыгъуызон фарстытимæ. Æмбæстæгтæ фæрсынц ауадзгæ тесты фæстиуджыты тыххæй æмæ афтæ дарддæр»,- фехъусын кодтой агентадæн.

«Тæвд хаххы» телефонтæ сты +7(929) 810-60-96; +7(929)805-88-96.

Сæйраг санитарон дохтыр Коцты Маринæ курæг у æмбæстæгтæй, цæмæй сæхи хъахъхъæной ног вирусон инфекцийæ.

«Адæм хъуамæ хатой сæ бæрндзинад, хъахъхъæной сæхи æмæ сæ алыварс адæмы, æххæст кæной социалон дистанци, профилактикæйы фæткойтæ, сæрмагонд гигиенæ, дарой маскæтæ, адæм массон æгъдауæй кæм тымбыл кæнынц, уым, чъизи къухтæй ма æвналой цæсгоммæ, сыгъдæг дарой хатæнты, уымæл хъæцилæй æфснайой, дезинфекци кæной», – банысан кодта Коцты чызг.

Уый ма банысан кодта, зæгъгæ, æппæт организацитæн æрвыст æрцыдысты методикон рекомендацитæ COVID-19 профилактикæйы фæдыл.

«Карз респираторон вирусы инфекцийы нысæнттæ куы фæзыной, уæд нæ хъæуы дæхицæн дæхæдæг хос кæнын, хъуамæ фæдзурай дохтырмæ. Æмæ кæд адæймаг ис куысты, уæд хъуамæ изоляци æрцæуа æмæ фæдзурын хъæуы поликлиникæмæ», – загъта Коцты чызг.

«Югосетпотребнадзор»-ы  комитеты сæргълæууæг банысан кодта, зæгъгæ, уыдзæн коронавирусон инфекцийæ рынчынты ног цаутæ, уымæ гæсгæ цæрджытæн æнæмæнгхъæуæг у, цæмæй сæхи хъахъхъæной, уæлдайдæр уый хауы, æнцондæрæй кæуыл бахæца, уыцы къорды æмбæстæгтæм.

Comments are closed, but trackbacks and pingbacks are open.