Хуссар Ирыстоны Уанеты Захары номыл зонадон-иртасæн институты коллектив хъынцъым кæны зынгæ ирон ахуыргонд, поэт, прозаик, публицист, советон æмæ фæссоветон тыгъдады академион скъолайы зынгæ минæвар Джусойты Нафи Григорийы фырты амæлæты тыххæй.

Ирыстон-Аланийæ фæхъуыд йæ аккагдæр фырттæй иу, ирон æгъдауы уаг хъахъхъæнæг, фарнхæссæг, æцæг патриот!

Нафи Григорийы фæлгондз мыггагмæ цæрдзæн йе ’мкусджыты, йæ хæлæртты æмæ ахуыргæнинæгты зæрдæты.

Хъыг кæнæм Нафи Григорийы фырты æввахс хиуæттимæ!

Мæрдты цы хуыздæр ис, уый дæ хай, Нафи Григорийы фырт, æмæ хæрзмæ ауд, афтæ тынг кæй уарзтай æмæ алы æмвæзадтыл, царды алыгъуызон фадгуыты кад кæмæн кодтай, уыцы Ирыстоныл.

Хуссар Ирыстоны Уанеты Захары номыл зонадон-иртасæн институты коллектив

***

Джусойты Нафи æрфидар кодта, Хетæгкаты Къоста бындур кæмæн æрæвæрдта, уыцы национ литературæйы. Йæ цард ссис аивадон æмæ зонадон сфæлдыстады гуырæн. Фæллойы, зонады, адæмæн лæггад кæныны уый ссардта йæ амонд æмæ йæ ном рох никуы уыдзæн. 2015 аз Республикæ Хуссар Ирыстоны æнæхъуаджы не ’рцыд нымад Джусойты Нафийы азыл.

Джусойты Нафийы амæлæт уæззау зиан у ирон адæмæн. Нафи нæ адæмæн цы ахсджиаг зондамындтæ ныууагъта мадæлон æвзаг æмæ национ культурæ бахъахъхъæныны сæраппонд, уыдон хъуамæ мыггагмæ баззайой немæ, уыдон фæдыл хъуамæ цæуой нæ фæсивæд, — банысан кодта Тыбылты Леонид.

Нæ фыссæджы уды стырдзинады æнæмæлгæ æвдисæн уыдзысты, Райгуырæн бæстæмæ цы ныхæстæй сидти, уыдон: «Æнæ дæу æз æнæбазыр маргъ уаин»…

Рухсаг у!

Паддзахад Аланийы раздæры Президент Тыбылты Леонид

***

Æхсæнадæмон змæлд «Ирон адæмы уæлдæр совет»-ы Хуссар Ирыстоны хайады уæнгтæ стыр хъыгзæрдæйæ райстой, ирон адæмы зынгæ минæвар, адæмон поэт, ахуыргонд, фыссæг, йæ раттæг адæмы сагъæс æмæ фæндон æвдисæг Джусойты Нафи Григорийы фырт кæй фæзиан, уыцы хабар.

Цытджын Нафи Григорийы фырт ныууагъта арф фæд нæ адæмы историйы, йæ зонады, литературæйы, лингвистикæйы. Уæрæх у Кавказы æмæ дард фæсарæнты адæмтимæ йæ бастдзинæдты гуырахст.

Уый хорз рæхсти академион зонады, литературæ зонынады æмæ æмткæй филологийы йæ позицитæ хъахъхъæнынмæ, уыд стыр æхсæнадон архайæг, зондамонæг. Нафи уыд æмæ уыдзæн рæзгæ фæлтæрæн фæзминаг цæвиттон.

«Ирон адæмы уæлдæр совет»-ы змæлды хайадисджытæ мæсæллæй зæгъынц Нафи Григорийы фырты хиуæттæ æмæ æввахс адæмæн.

Уый стыр зиан у æппæт ирон адæмæн, Кавказы адæмтæн, æмæ æрмæст уыдонæн нæ.

Æхсæнадæмон змæлд «Ирон адæмы уæлдæр совет»-ы Хуссар Ирыстоны хайад

Comments are closed, but trackbacks and pingbacks are open.