Æнæххæст кары сывæллæтты искуыдæм балцы куы фæкæнынц, уæд скъолаты къухдариуæгад, кæнæ та ныййарджытæ æнæмæнг бахатынц милицийы кусджытæм, цæмæй фæндагыл цæугæйæ сывæллæтты æдасдзинад хъахъхъæд цæуа.
Сывæллæтты автобустыл искуыдæм аласынæн ис сæрмагонд фæткойтæ, кæцыты нысан у чысыл бæлцæтты цард æмæ æнæниздзинад бахъахъхъæнын. Ахæм мадзæлтты рæстæджы организаторты арæх ферох вæййынц уыцы домæнтæ. Фæлæ бæрндзинад та фæхæссы паддзахадон инспекци.
Дыууæ бон раздæр хъуамæ фехъусын кæной организатортæ паддзахадон инспекцимæ, ома æнæххæст кары сывæллæттимæ цæуæм фæндагыл горæтæй дарддæр. Кæд æмæ дæрддзæф ранмæ нæ цæуынц, уæд иу бон раздæр дæр гæнæн ис фехъусын кæнын. Ахæм уавæрты паддзахадон инспекци рахицæн кæны сæрмагонд патрулон автомашинæ, кæцы семæ уыдзæнис фæстæмæ æрбаздæхыны онг. Фæндагыл цыппар сахатæй фылдæр куы цæуой, уæд уыцы сывæллæтты къордимæ нæ уадзынц, 7 азæй къаддæр кæуыл цæуы, ахæмты. Кæд æмæ дард фæндагыл цæуынмæ хъавынц, ома, фæндагыл цæугæй рæстæг бахардз кæной 12 сахатæй фылдæр, уæд семæ æнæмæнг хъуамæ уа медицинон кусæг дæр. Ӕх-сæвы 11 сахатæй фæстæмæ æрмæстдæр 100 километры бæрц ис цæрæн – стæй хъуамæ автобус бауромой.
Сывæллæтты автобусмæ дæр ис сæрмагонд домæнтæ – æнæмæнг ифтонг хъуамæ уой æдасдзинады рæттæй. Конд ма йыл хъуамæ уа сæрмагонд бур рухсгæнæн. Автобусы шофырæй та уромынц фæлтæрд кусæджы, кæцы, иууылкъаддæр, фæстаг дыууæ азы куыста автобусы шофырæй æмæ фæндагон фæткойтæ фехалыны фæстиуæгæн, фæстаг иу азы, бæрндзинадмæ конд не ‘рцыд. Шофырмæ хъуамæ уа сæрмагонд бары гæххæтт, кæцыйы фыст ис балцы маршрут. Фæндагон инспектортæ автобусы басгарынц, ома дзы хæлд мацы разына. Кæд æмæ сæ зæрдæ ахæм истæмæ фехсайа, кæцы тæссагдзинад хæсса бæлцæттæн, уæд автобус баивынц æндæрæй.
ДЖИОТЫ Алыксандр
