12-æм июны бæрæгбон – Уæрæсейы бон нæ республикæйы адæм дæр нымайынц зæрдæйæн æввахс чи у, ахæм бæрæгбоныл. Уымæн æмæ дыууæ адæмты æхсæн хæлардзинады тæгтæ арф æмæ фидар сты. Хуссар Ирыстонæн Уæрæсе кæддæриддæр иннæ паддзахадты ‘хсæн ис сæрмагонд бынаты. Ацы хъомысджын паддзахад нæ чысылнымæц республикæйæн у æнæ аивгæ стратегион партнер. Нæ зын рæстæджыты нæм йе ‘ххуысы къух фыццаг чи фæдаргъ кодта, абоны онг дæр нæ фарсмæ фидар лæудæй чи лæууы, уый у Стыр Уæрæсе æмæ йæ алы ирон лæг дæр йæ зæрдыл дардзæнис.
Уæрæсейы Федерацийы сæйраг паддзахадон бæрæгбоны цытæн 10-æм июны Цхинвалы уагъд æрцыдис акци «Уæрæсе, айс мын мæ арфæтæ!», – зæгъгæ, ахæм номимæ, кæцыйы хайад райстой нæ республикæйы скъолайы кары агъоммæйы сывæллæттæ æмæ кæстæр кълæсты ахуыргæнинæгтæ. Уыдон хуссарирыстойнаг адæмы номæй се сфæлдыстады руаджы арфæ кодтой нæ хæлар æмцæдисон бæстæйæн. Музыкæйы æхцон зæлтимæ сывæллæттæ уынджы асфальтыл ныв кодтой Уæрæсеимæ баст бæрæгбонон традицион символтæ – æрдз, бæрз бæлæстæ, дидинджытæ, уырыссаг триколор æндæр æмæ æндæр предметты, уырыссаг матрешкæтæ, кæцыты бын-иу бафыстой сæ рæсугъд æмæ зæрдиаг арфæтæ Уæрæсейы номыл. Сывæллæтты нывтæ рауадысты хъæлдзæг æмæ цымыдисон. Ахæм акци нæ республикæйы уагъд æрцыдис фыццаг хатт æмæ нырæй фæстæмæ хъуамæ уа традицион. Мадзал сорганизаци кодта нæ республикæйы Уæрæсейы æмбæстæгты координацион совет, «Россотрудничество»-йы æххуысæй. Организатортæ куыд банысан кодтой, уымæ гæсгæ карантины домæнтæ æххæстгæнгæйæ, ацы аз акци арæзт не ‘рцыдис уæрæхæй, фæлæ сæ фæнды ис фидæнмæ йæ уæрæхдæрæй ауадзынæй.
Бæрæгбонон мадзалмæ сæм фæуазæг Хуссар Ирыстоны Уæрæсейы Федерацийы æххæстбарджын минæвар Марат Кулахметов. Уый азылд сывæллæтты нывтыл æмæ æрыгон нывгæнджытæн бузныг загъта се сфæлдыстад æмæ бæрæгбонон акцийы хайад кæй райстой, уый тыххæй æмæ ма се ‘ппæтæн дæр раарфæ кодта Уæрæсейы боны цытæн. “Мæнæн тынг æхсызгон у, абон рæгъмæ кæй рахастат æмæ нын кæй лæвар кæнут, уыцы цымыдисон æмæ хъæлдзæг æмæ бæрæгбонон нывтæм кæсын. Ацы нывтæ адæймаджы зæрдæйы æвзæрын кæнынц цины æнкъарæнтæ. Уе сфæлдыстад абон куыд рæсугъд æмæ сыгъдæгзæрдæйæ равдыстат, афтæ уæд уæ дарддæры царды фæндæгтæ. Стыр бузныг уын, уæ аивады тыххæй, Уæрæсемæ уæ уарзондзинады тыххæй. Уæрæсейы бон у стыр паддзахады националон бæрæгбон, уый иу кæны бирæнымæц адæмты, уыцы нымæцы ирон адæмы дæр. Арфæ уын кæнын нæ иумиаг æмæ стыр бæрæгбон – Уæрæсейы боны цытæн. Мæ зæрдæ уын зæгъы сабырад, дидинæфтыд æмæ æнтыстытæ», – загъта Марат Кулахметов.
Бæрæгбонон арфæты фæстæ Уæрæсейы Федерацийы паддзахадон гимн сæххæст кодта курдиатджын зарæггæнæг Харебаты Марта. Гимны зæлтæм сывæллæттæ уæлдæфы суагътой къоритæ уырыссаг триколоры нывтимæ. Мадзалы кæрон акцийы хайадисджытæн радтой зæрдылдарæн лæвæрттæ æмæ сæ суазæг кодтой хæрзад уырыссаг блинтæй дæр.
Цхуырбаты Ларисæ
Comments are closed, but trackbacks and pingbacks are open.