Бирæтæ хæрзæвзæнгтæй равзарынц сæ сомбоны професси æмæ йыл цæрæнбонтæм дæр сæ зæрдæ никуы сивынц æмæ цæсгомджынæй сæ хæстæ феххæст кæнынц. Мæ абоны уацы хъайтар дæр хæрзчысылæй равзæрста йæ уарзон професси æмæ кæд уайтагъд йæ бон не ссис æвзонгæй цы дæсныйад равзæрста, уыцы фадыджы бакусын, уæддæр æй фæстæдæр йæ хъысмæт æрбахаста йæ цæрæнбонты бæллицмæ.
Пухаты Джульеттæ райгуырд горæт Цхинвалы. Ахуыр кодта нæ горæты 2-æм астæуккаг скъолайы, каст æй фæцис 1992 азы, растдæр гуырдзиаг-ирон ныхмæлæуды райдианты. Уыцы аз кусын райдыдта РХИ-йы Культурæйы министрады цур скъола-студийы. Уым æртæ азы бакусыны фæстæ куыста РХИ-йы Ахуырад æмæ зонады министрады цур Ахуыр-гæнджыты квалификаци бæрзонддæргæнæн институты кадрты хистæрæй. Уыцы иурæс-тæджы фæсаууонмæ ахуыр кæнынмæ бацыд ХИПУ-йы ирон филологийы факультетмæ. Фæстæдæр та кусын райдыдта Уанеты Захары номыл Хуссар Ирыстоны зонад-иртасæн институты кадрты хис-тæрæй.
Пухаты Джульеттæйæн йæ хъуыддæгтæ кæд æвзæр нæ цыдысты, уæддæр йæ зæрдæ æхсайдта йæ чысылæй цы професси равзæрста, йæ зæрдæмæ æввахсдæр цы дæсныйад уыд, уымæ. Скъолайы ма куы ахуыр кодта, уæд аскъуыддзаг кодта барадхъахъхъæнæг органты кусæг суæвын, уæлдай тынгдæр æй фæндыд милиционер суæвын æмæ афтæмæй фæткхалджыты ныхмæ тох кæ-нын. Æмæ æппынфæстагмæ йæ къухты бафтыд йæ бæллиц сæххæст кæнын. 2005 азы кусынмæ бацыд горæт Цхинвалы мидхъуыддæгты управленимæ фадыгон милиционерæй. Йæ дæлбар ын бакодтой Мамсырайы фырты æмæ Ленины уынджы иугай хæйттæ, стæй Гафезы уынг, Гæззаты Вадимы уынгæй суанг Дзабиты Геннадийы уынджы онг æмæ Октябры уынджы иу хай, Хъайтарты уынджы завод «Эмальпровод»-æй пансионат «Забота»-йы онг. Æвзонг райдайгæ фадыгон милиционерæн баххуыс кодта горæты мидхъуыддæгты управленийы хистæры дыккаг хæдивæг Пухаты Александр. Уый йе рвады зæрдæрайæ базонгæ кодта фадыгон милиционеры куысты сусæгдзинæдтимæ, æнæвгъау ын амыдта йæ куысты фæлтæрддзинад. Уыцы амындтытæ Джульеттæйæн тынг фæпайда сты йæ дарддæры архайды.
Фыццаг рады Пухаты чызг базонгæ йæ дæлбар ын цы фадгуытæ бакодтой, уыдоны цæрджытимæ, уайтагъд семæ ссардта иумиаг æвзаг æмæ цæсгомджынæй æххæст кæнын райдыдта йе службæйон хæстæ. Æвæццæгæн, йæ дæлбар фадгуыты стæм адæймæгтæ разындзысты, сæ фадыгон милиционеры сæ чи нæ зыдта. Арæх-иу æй бахъуыд цæрджытæ-иу горæты мидхъуыддæгты управленимæ цы куырдиæттæ æрбалæврдтой, уыдоны фæстæ ацæуын æмæ сæ бынаты равзарын. Тырныдта-иу быцæуаг фарстатæ раст аскъуыддзаг кæнынмæ. Нæ горæты цæрджытæй бирæтæ сæхивæндæй бацахсынц фатертæ æмæ сын тæрхондон куы рахæссы æнæзакъонæй бацахсгæ цæрæнуат ссæрибар кæныны тæрхон, уæд-иу æй бахъуыд тæрхондонон приставты сæр дæр. Æвæллайгæ куыст кодта тæрхондоны чи бадт æмæ чи ссæрибар ис, уыдонимæ дæр, цæмæй дыккаг хатт фыдракæндтæ мауал сарæзтаиккой, семæ кодта æмбарынгæнæн профилактикон куыст. Афтæ ма куыста систематикон æгъда-уæй карз нозт чи кодта, ахæм адæймæгтæ æмæ бинонтимæ дæр. Бирæ хæттыты-иу йæ кусгæ бон аххæсыд суанг æнафонтæм дæр. Хатт-иу æй бахъуыд æрдæгæхсæв дæр йæ дæлбар фадгуыты цæрджытæй иуæй-иуты дуæрттæм бахойын. Иу дзырдæй æмбæрстгонд у фадыгон милиционерæн цас куыст ис, уый. 12 азы дæргъы, уый цæрджыты фæсидтытæм цал хаты атындзыдта, цал адæймагæн баххуыс кодта, уыдон тынг бирæ сты. Фæлæ уый йæ куыст æххæст кæнгæйæ фæллад цы уыд, уый нæ зыдта, уымæн æмæ æхцондзи-над иста тыхст уавæры бахауæг адæймæгтæн баххуыс кæнынæй.
Пухаты Джульеттæйы никуы ферох уы-дзысты 2008 азы августы тугуарæн хæсты бонтæ. Барадхъахъхъæнæг органты кусджытæ хæсты размæ æндыгъд бонты раконд æрцыдысты казармæйон уавæрмæ. 7-æм августы Гуырдзыстоны уæды тугмондаг президент Саакашвили кæд раныхас кодта телевизоры, зæгъгæ, ирæттæ куы æхсой, уæддæр, зæгъ, гуырдзиæгты ‘рдыгæй иу æхст дæр нæ фæцæудзæн, уæддæр ыл хуссарирыстойнаг цæрджытæй стæмтæй дарддæр ничи баууæндыд. Нæ йыл баууæндыд Джульеттæ дæр, нæ ацыд хæдзармæ æмæ йæ хæст æрæййæфта йæ куысты уæлхъус. Цыппар сылгоймаг-милиционеры – Пухаты Джульеттæ, Кобылты Лонда, Козаты Евелинæ, Гаглойты Элинæ æмæ Гаглойты Заза, Джыккайты Гамлет 7-æм августæй суанг 10-æм августмæ уыдысты сæ куысты бынæтты æмæ хъахъхъæдтой уым цæ хæцæнгæрзтæ, документаци, архив уыдысты, уыдоны.
Ивгъуыд аз Джульеттæ кусын райдыдта Мидхъуыддæгты министрады æхсæнадон фæтк хъахъхъæныны хайады инспекторæй. Ацы бынаты та йæ хæстæ сты паддзахадон автоинспекци, патрулон-постон службæ, æнæведомствæйон хъахъхъæныны управленийыл контроль кæнын, ома, сæ хæстæ куыд æххæст кæнынц, уымæ хъус дарын. Ацы куысты дæр æй арæх бахъæуы æнафæтты дæр управлениты кусджыты куыст бабæрæг кæнын. Хъуамæ зона, кусджытæй исчи æнæ аххосагæй йæ куыстмæ нæ рацыд, уый дæр.
Милицийы кусгæйæ лейтенантæй схызт капитаны цины онг. Пухаты Джульеттæ мидхъуыдæгты органты йæ хорз æмæ цæсгомджын куысты тыххæй хорзæхджын æрцыд Кады грамотæтæй, дыууæ азы размæ та йæ схорзæхджын кодтой майданæй йе службæйон лæггæдты тыххæй.
«Пухаты Джульеттæ у цæсгомджын æмæ бæрнон кусæг, алыхатт дæр йæ хæстæ æххæст кæны рæстæгыл, йæ куыстмæ йын нæй фау æрхæссæн. Куыд адæймаг æмæ коллегæ, афтæ дæр у тынг зæрдæхæлар адæймаг», – зæгъы Мидхъуыддæгты министрады хисæрмагонд æдасдзинады управленийы хистæр Æлборты Алик.
Пухаты чызг сылгоймаджы амондæй у хайджын. Йæ цардæмбал паддзахадон унитарон куыстуат «Энергоресурс»-ы кусæг Тедеты Иналимæ хъомыл кæнынц дыууæ фырыхъулы хуызæн фырты. Уыдон кæд нырма чысылтæ сты, уæддæр сыл зыны сомбоны Ирыстонæн ныфсытæй кæй басгуыхдзысты, уый.
Арфæ дын кæнæм Сылгоймæгты дунеон бон 8-æм марты цытæн. Уадз, фылдæр дын бантысæд дæ радтæг адæмæн лæггад кæныны хъуыддаджы.
Джиоты Екатеринæ
Comments are closed, but trackbacks and pingbacks are open.