2008 азы августы æвирхъау æмæ тæссаг хæстæй ныр 12 азæй фылдæр рацыд æмæ нæ сындæггай рох кæнын райдыдтой нæ уынгтæ хæсты фæстæ цы æдзæллаг уавæры уыдысты, ома, къæвда бонты астæумæ цъыфы кæй лæгæрстам æмæ хурбоны та рыгæй кæй хуыдуг кодтам, уыдæттæ. Абоны бон нæ горæты уынгтæн сæ фылдæр хæрзарæзт æрцыдысты æмæ рафидыдтой. Горæт Цхинвалы администрацийы хæрзарæзтады комбинаты кусджыты куыстмæ фау æрхæссæн нæй æмæ сын сæ куыстæн чи нæ аргъ кæны, уыдонæн та хуыцауы хай нæй. Æрвылрайсом дæр горæты уынгтыл разилынц бронласæн машинæтæ æмæ комбинаты кусджытæ иу брон нал фæуадзынц, ног чындзау афснайынц уынгты. Райсомæй хæрзæфснайд уынгтæм рахизгæйæ зæрдæ барухс вæййы, уыимæ газонты алыгъуызон дидинджытæ æмæ д-коративон зайæгойты уындæй дæр. Адæй-маджы стыр ныфс бацæуы рæхджы нæ горæт йæ раздæры хуыз кæй æрцахсдзæн æмæ ноджыдæр кæй фæрæсугъддæр уыдзæн, уымæй.
Зæгъгæ нæ горæты цæрджытæ æмхуызонæй аудынц нæ горæты сыгъдæгдзинадыл, уæд абон нæ хæстæфхæрд горæт ноджы сыгъдæгдæр æмæ рæсугъддæр уаид. Фæлæ иутæ аразгæ æмæ сыгъдæг куы кæной горæты уынгтæ, иннæтæ та сæ брон брондонмæ куынæ хæссой æмæ арæзт цы æрцыд, уыдон куы цъæл кæной, уæд нæ горæт йæ гаччы кæд хъуамæ æрбада. Ц-виттонæн æрхæссæм Октябры уынджы. Ацы уынг у нæ горæты рæсугъддæр уынгтæй сæ иу. Уæлдай зæрдæмæдзæугæ та сис, хæрзарæзт куы æрцыд, уый фæстæ. Ацы уынджы æвæрд æрцыдысты бронæмбырдгæнæнтæ æмæ æхсæвыгон рухсытæ. Фæлæ сæ цасдæр рæстæджы фæстæ ныцъæл кодтой цахæмдæр «хъайтартæ» раст цыма сæ тых уыдонимæ æвзæрстой, уыйау. Ацы проблемæйы тыххæй нæ газеты фæрстыл мыхуыр бирæ æрмæджытæ æр-цыд.
Кæй зæгъын æй хъæуы, нæ горæты сыгъдæгдзинадæн, ивгъуыд рæстæджыты куыд уыд, уыимæ абарæн дæр нæй. Уæд уынгты азмæлæнтæ дæр нæ уыд арæзтадон бронæй, нæ горæты цæрджытæй бирæтæ цалдæргай мæйты æмæ, æгæрыс-тæмæй афæдзгæйтты дæр сæ хæдзæртты рæзты цы тротуартæ ис, уым рæдзæгъдтæй дардтой сæ арæзтадон æмæ цардуагон брæттæ. Ахæм нывтæ фенгæйæ-иу адæй-маджы зæрдæйы равг фехæлд æмæ-иу зæрдæрыстæй ахызт сæ цурты, йæхими-дæг хæдзæртты хицæуттæн уайдзæф кæнгæйæ. Зæгъгæ, худинаг уын уæд, кæд уæхи цæсгомæй нал æфсæрмы кæнут, уæд адæмæй уæддæр фефсæрмы ут. Ныр ахæм цаутæ бæрæг фæкъаддæр сты бирæбæр-цæй. Фæлæ ныр та тротуартыл сæ машинæ-тæ бауромынц æмæ сæ цурты ахизæнтæ кæй нал вæййы, уымæ гæсгæ цæрджыты хъыгдарынц. Арæх фехъусæн ис ахæм ныхæстæн, зæгъгæ, мæнæ ацы бирæуæладзыгон хæдзæртты цæрæг бинонтæн ис, цал бинойнаджы сты, уал машинæйы. Æмæ иу бинонтæ, сæ разы цы иумиаг кæрт ис, уым æртæ кæнæ цыппар машинæ куы бауромой, уæд ма иннæ цæрджытæ та цы фæкæной сæ машинæты. Иннæ ахæм иуæй-иу цæрджытæ тротуартыл сæ хæлд машинæты афæдзæгæйтты кæй дарынц, уый тых-хæй сæ бафæдзæхсынц фадыгон милици-онертæ, фæлæ сæ бирæтæ æппындæр ницæмæ æрдарынц.
Нæ горæты уынгты æвæрд æрцыдысты бронæмбырдгæнæн егъау контейнертæ, уырдæм цæрджытæ сæ брæттæ фæхæс-сынц æнæхъæн боны дæргъы æмæ сæ райсомæй раджы бронласæн машинæтæ аласынц. Фæлæ та мæ ам дæр фæнды иуæй-иу цæрджытæн уайдзæф зæгъын, алчи йæ брон брондонмæ кæй нæма хæссы æмæ сæ æнæран бынæтты кæй ныккалынц, уый тыххæй. Тæболты Сергейы уынджы цæрджытæ дæр кæд райгонд сты хæрзарæзтады комбинаты кусджыты куыстæй, уæддæр сын ацы районы цæрджытæй дæр иуæй иутæ нæ аргъ кæнынц сæ куыстæн. Цæвиттон, бронласæн машинæ куы ацæуы, уый фæстæ дæр бирæтæ сæ брон рахæссынц æмæ сæ тротуартыл ныккалынц, кæд æй тынг хорз зонынц бронласæн машинæ ацыд æмæ дыккаг бонмæ нал рацæудзæн, уæддæр. Æмæ афтæ фæлæзæрынц дыккаг бонмæ. Уæдмæ сæ ныппырх кæнынц дзæгъæл куыйтæ, дымгæ сæ фæраскъæф-бас-къæф кæны алы къуымтæм. Иннæ ахæм Тæболты Сергейы уынджы «Бензоколонка»-мæ æввахс цæрджытæй чидæр тротуарыл æрæвæрдта, хæдзары йæ чи нæуал хъуыд, ахæм дыууæ зæронд стыр аджы æмæ уым цæрджытæ ныккалынц сæ брæттæ бронласæн машинæ куы ацæуы, уый фæстæ дæр æмæ сæ куыйтæ ныппырх кæнынц (къамы). Цас раст у уый æмæ горæты уынгты ахæм агтæй фыдуынд кæнай. Æрцæуæггаг уазджытæ нæ ахъуыды кæндзысты, зæгъгæ, адон цæй фæстæзад адæм сты. Уырдæм æввахс цæрæг Хацырты Жужунæ бæргæ æрбамбырд кæны, куыйтæ цы брон ныппырх кæнынц, уыдоны, фæлæ кæдмæ?
Хорз уаид æмæ-иу фадыгон милиционертæ куы разиликкой кæддæрты, цæрджытимæ æмбарынгæнæн куыст куы кæниккой æмæ-иу сæ куы бафæдзæхсиккой ахæм фæткхалæн цауты тыххæй. Науæд, иуæй-иу цæрджытæ æппындæр нæ аргъ кæнынц нæдæр уынгмæрзджыты æмæ нæдæр бронласджыты куыстæн. Афтæмæй та уынгмæрзджытæн сæ фылдæр сæ куыстмæ рацæуынц æхсæвы цыппар сахатыл, цæ-мæй та горæты цæрджытæ райсомæй рахизой хæрзæфснайд уынгтæм.
Курæг стæм не ‘мбæстæгтæй, цæмæй алчидæр аргъ кæна нæ иумиаг хъуыддаг, горæты сыгъдæгдзинадыл чи кусы, уыдоны куыстæн. Æмхуызонæй куынæ аудæм нæ хæстæфхæрд горæты сыгъдæгдзинадыл, уæд æй раздæрау цæхæркалгæйæ никуы уал фендзыстæм. Уыимæ æрбалæууыд уалдзæг, фæуыдзысты марты мæйы тæргæйттæ, хъарм бонтæ сæ бартæ сæхимæ райсдзысты æмæ уалдзæджы та алцыдæр хъуамæ уа дидинæгау рæсугъд.
ДЖИОТЫ Екатеринæ
Comments are closed, but trackbacks and pingbacks are open.