Сыгъдæгдзинадæн стыр нысаниуæг кæй ис, уый нæ алчи дæр хаты. Цы ис уымæй хуыздæр, æмæ хæрзæфснайд хатæны дæ куыст кæныс æдæрсгæйæ, æрдзы хъæбысы дæ сæрибар рæстæг æрвитыс, улæфыс сатæг уæлдæф. Цæвиттонæн уал зæгъæм нæ горæты сыгъдæгдзинады тыххæй. Ацы хъуыддагыл æппынæдзух кусы æмæ архайынц цæрæнуатон-коммуналон куыстуаты кусджытæ æмæ сæ алы æмбæстаг дæр у райгонд. Фæззæджы фæстаг мæйы кæрон уыдонæн сæ куыст ноджы фæдывæр, бæлæсты сыфтæрты фылдæр хай æрызгъæлд æмæ сæ хъæуы асæрибар кæнын. Куыстуат уый йæ зæрдыл дары æмæ æвæстиатæй бавналы сæ ахсджиаг хæс æххæст кæнынмæ. Цæвиттон, ахæм уавæры уыд Октябры уынг дæр æмæ йæм æрæджы фæзындысты сылгоймæгтæ æд кусæнгæрзтæ, мæрзтой æмæ æмбырд кодтой дæрддзæ-гæй дæрддзæгмæ сыфтæртæ, сæ цырд æмæ зæрдиаг архайдæй рухс кодта адæймаджы зæрдæ. Иугæр сæ хæс куы ахицæн кодтой, уæд та сæм фæзынд Кæсæбиты Æхсар йæ уæзласæн машинæимæ æмæ ам та нæлгоймаг кусджытæ равдыстой хорз фердæхтдзинад, фæссихормæ гуыффæ айдзаг кодтой бæлæсты сыфтæртæй.
Куыстæуы цасдæрбæрцæй нæ хъæуты сыгъдæгдзинадыл дæр æмæ уыдонæн дæр азæй азмæ хуыздæрæрдæм зыны сæ аивдзи-надыл. Уый зæгъæн ис Цхинвалы районы Къостайыхъæу, Тъбет æмæ Ногхъæуæй. Ацы хъæуты цæрджыты брæттæ ласыныл ку-сынц Джиоты Рома æмæ Къæбысты Владимир. Уыдон къуыри иу бон уынггай разилынц, сæвгæ-нынц сæрмагонд машинæмæ брæттæ æмæ уымæй ахъаз сты хъæуты иумиаг фидыцæн.
Уыдæттæ, кæй зæгъын æй хъæуы, хорз æмæ раппæлинаг сты, иууылдæр сыгъдæгдзинадмæ æмбæлон хъусдард куы здахиккам, уæд. Фæлæ, хъыгагæн, афтæ нæу æмæ уый та катайаг у. Зæгъæм, ахæм мæгуырау ныв фенæн ис Тъбеты хъæумæ æввахс. Раздæр ацы хуымзæххы хæдзарад æгуыстæй никуы уагъта, тыдта дзы хъæууонхæдзарадон культурæтæ æмæ йæ тыллæгæрзад дæр уыд бæркадджын. Ныр афтæ нал у, скъутæр æмæ ма йыл уыимæ иумæ иуæй-иу æмбæстæгтæ нæ ауæрдгæ дæр нæ кæнынц. Хуымзæххы кæрæтты цы брон нæ фендзынæ, ахæм нал ис. Хуыздæр уавæры нæй, раздæр профтехахуыргæнæндон кæм уыд, уый территори дæр. Кæнæ райсæм Къостайыхъæуы иу хуымзæхх, уый дæр нæу хуыздæр уавæры. Ацы бынаты сæрды мæйты цæвæджджынтæ аппарынц сæ уæлдай брæттæ æмæ дзы фезмæлæн нал вæййы. Æвæццæгæн, иуæй-иутæ нæ хъуыды кæнынц, уыцы рæтты нæ уыгæрдæнтæ æмæ сæрвæттæ кæй сты, нæхæдæг сæ кæй пайда кæнæм, уыцы хъуыддаг.
Хорз уаид, алы æмбæстаг дæр фылдæр бæрндзинад куы ‘нкъарид нæ æрдзы рæсугъддзинады тыххæй, куы йæм дарид фылдæр хъусдард æмæ иумиаг хъарутæй та куы тыхсиккам йæ бахъахъхъæныныл.
Хуыбиаты Никъала
Comments are closed, but trackbacks and pingbacks are open.