Дыргъдæтты, бирæуæладзыгон хæдзæртты кæртыты, уынгты, паркты, æндæр æхсæнадон бынæтты – кæмдæриддæр бæлæсты бур уддзыд сыфтæртæ чысыл дымгæмæ дæр æрызгъæлынц зæхмæ. Алы ран дæр хус сыфтæртæ кæй бамбырд, уый тыххæй сыл иуæй-иу æнæрхъуыды адæм арт бандзарынц, æмæ уымæй зиан кæнынц канд алфамбылай æрдзæн нæ, фæлæ ма сæхи æнæниздзинадæн дæр.

Сыфтæртæ уалдзæджы æмæ сæрды цы зианхæссæг буарадтæ райсынц, уæлдайдæр æвзалытуаг газ, уыдон, арты басудзгæйæ, схæццæ вæййынц уæлдæфимæ. Медицинон иртасæнтæй бæлвырдгонд куыд æрцыд, афтæмæй хус сыфтæрты фæздæгæй тæссаг у адæймаджы улæфæн органты низтæ фæзынынæй, уæлдайдæр ракæй. Уымæ гæсгæ санитарон домæнтæ бар нæ дæттынц, бæлæстæй цы хус сыфтæртæ æрызгъæлы, уыдон æмæ æндæр брæттæ дæр цæрæн бынæтты раз судзынæн.

Уæйыджы хъусы уад уайы, фæзæгъынц. Алы хатт дæр фæззæджы æмæ уалдзæджы горæттæ æмæ хъæуты цæрджытæ хус сыфтæрты æртытæ скæнынц уынгтæ æмæ дыргъдæтты, цæхæрадæтты. Ахæм архайдæн санитарон домæнтæ бар кæй нæ дæттынц, уымæй ис бæлвырд хатдзæг скæнæн. Хус сыфтæрты фæздæг горæты кæнæ хъæуы уынгты куы апырх вæййы, уæд, хъуырты низтæ кæй хъыгдарынц, уыцы рынчынтæ цы фæуой, уый нал фæзонынц. Уымæн æмæ хус сыфтæрты арты фæздæджы зианхæссæг буарадтæ вæййы, цас æмбæлы, уымæй 200-300 хатты фылдæр.

Хус сыфтæртæ басудзгæйæ, атмосферæмæ фæстæмæ раздæхынц, бæлæстæ уалдзæджы æмæ сæрды мæйты змæлæг автотранспортæй цы маргджын химион буарадтæ фæистой, уыдон. Уымæ гæсгæ, УФ-йы административон бархалынæдты кодексмæ гæсгæ ахæм артгæнджытæ цæуынц иваргонд. Кæд сыфтæртыл арт бафтауын зынгсирвæзт расайы, уæд ивары бæрц цалдæр хатты фæфылдæр вæййы.

Мах æнхъæл стæм, æмæ ныр йæхи ахæм уавæрмæ ничи æруадздзæн. Хъуамæ, куыд æмбæлы, афтæ æххæст кæнæм санитарон домæнтæ. Хæдзардзин адæймагæн та фæззыгон сыфтæртæ фæздæджы хуызы нæ ацæуынц. Цалдæр раны сæ бамбырд кæны, уалдзæгмæ бамбийынц æмæ дын лæвар хъацæн дæ цæхæрадонмæ базилынæн. Уымæй уæлдай ацы мадзал феххуыс уыдзæн канд дæхи нæ, фæлæ ма дæ алыварс цæрджыты цард фæдаргъдæр кæнынæн дæр.

Comments are closed, but trackbacks and pingbacks are open.