Республикæ Хуссар Ирыстоны Президент Бибылты Анатоли «Фыдыбæстæйон хæсты ирон адæмы уæлахизыл 10 азы сæххæсты сæраппонд» майдантæй схорзæхджын кодта дзулфыцæн комбинаты хуыздæр кусджыты. Хорзæхджын кæныны церемони уагъд æрцыд УФ-йы Хуссар Ирыстоны хæдбардзинад банымайыныл 10 азы сæххæсты цытæн æмæ РХИ-йы сырæзты боны сæраппонд, кæцытæ нысан æрцыдысты 26 августы æмæ 20 сентябры.

Паддзахады сæргълæууæг бузныджы ныхæстæ загъта кусджытæн Хуссар Ирыстоны зын уавæрты,  цы хъару æмæ хъæддыхдзинад равдыстой, уый тыххæй æмæ сын йæ цæст бауарзта циндзинад, бинонты фæрныгад æмæ куысты æнтыстытæ.

«Куыстуатæн йæ архайад не ‘рлæууыд уыцы тугкалæн 2008 азы августы хæсты рæстæджы дæр. Сымах равдыстат æцæг хъайтардзинад æмæ патриотизм. Кæй зæгъын æй хъæуы, уыцы бонты сымах тыхстыстут уæ бинонтыл æмæ уе ‘ввахс хиуæттыл. Фæлæ уæддæр, республикæйы цæрджыты ифтонг кодтат дзулæй. Мах уый кæддæриддæр нæ зæрдыл хъуамæ дарæм æмæ йын аргъ кæнæм», – загъта Бибылты Анатоли.

Уый ма йæ цæст ахаста дзулфыцæн комбинаты ног агъуыстыл, кæцы арæзт æрцыд Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты.

Куыстуаты директор Цхуырбаты Вадимы ныхæстæм гæсгæ, ног агъуыст ифтонг у нырыккон технологитæй, кондады пайда цæуы автоматикон механизмæй куыст фенцондæр кæнынæн. Уый ма банысан кодта, зæгъгæ, Хуссарирыстойнаг дзулфыцæн комбинаты кусынц сæ хъуыддаджы æцæг дæснытæ.

Президент бабæрæг кодта цехтæ æмæ базонгæ ис дзул æмæ адджинæгтæ аразыны процессимæ. Уый равдыста йе ‘ууæнк, ног агъуыст эксплуатацимæ лæвæрд куы æрцæудзæн, уæд ассортимент кæй фæфылдæр уыдзæн.

«Завод кæддæриддæр кадджын уыд йæ хæрзгъæд дзулæй, республикæйы адæм æмæ йæ уазджыты зæрдæмæ чи цæуы, ахæм продукцийæ. Абоны бон завод кусы субсидиты фæрцы, æмæ цас фылдæр продукци  уагъд цæуа, уыйбæрц пайда дæр уыдзæн заводæн дæр, æмæ паддзахадæн дæр. Мæ хъуыдымæ гæсгæ, уый ноджыдæр фылдæр кæндзæн йæ рауадзгæ продукци», – загъта Президент.

Comments are closed, but trackbacks and pingbacks are open.