Нæ республикæйы уголовон-æххæстгæнæн системæйы кусджытæм æрæджы сæ бæрæгбонмæ Юстицийы министрадмæ арфæ кæнынмæ æрбацыд бæстæйы сæргълæууæг Тыбылты Леонид æмæ Æдасдзинады советы нымæрдар Плиты Анатоли.
Президент куыд банысан кодта, уымæ гæсгæ рарастгæнæн колонийы куыст у хъæуæг æмæ бæрнон.
«Нæ рæстæг хуымæтæг нæу. Бирæ æмбæстæгтæ хатт ахизынц закъоны иувæрсты æмæ аразынц фыдракæндтæ. Уыдон рараст кæныныл архайы рарастгæнæн колони. Тæрхондон сын цы æмгъуыд рахæссы, уыцы рæстæджы колонийы кусджытæ архайынц уыдоны раст фæндагыл слæууын кæныныл, кæд уый хатт сæ къухы нæ бафты, уæддæр», – дзырдта Тыбылты Леонид.
Уголовон-рарастгæнæн системæйы кусджытæн сæ профессионалон бæрæгбоны фæдыл раарфæ кæнынæй дарддæр ма бæстæйы сæргълæууæг банысан кодта, кæй сыл ис стыр бæрндзинад æвæрд. Республикæйы къухдариуæгад, зæгъгæ, уый æмбары æмæ стыр аргъ цæуы сæ куыстæн.
«Зонæм æй, уæ куыст хуымæтæг нæу, фыдæбон кæнут фыдгæнæджы раст фæндагыл слæууын кæныныл. Уыдонæй алчи кæд уыцы фæндагыл не слæууы, уæддæр сымах уæ æвæджиаг хæс æххæст кæнут. Рарастгæнæн колонийы кусджытæ æмбарынц, сæ куыст нæ æхсæнадæн ахсджиаг кæй у. Уымæ гæсгæ Республикæйы къухдариуæгад дæр араздзæн æппæтдæр, цæмæй хуыздæр кæной куысты уавæртæ», – банысан кодта Тыбылты Леонид. «Рарастгæнæн колонийы кусджыты куыст вазыгджын æмæ, æгæрыстæмæй, тæссаг дæр у. Сымах æвдисут лæджыхъæддзинад, алыхуызон фыдгæнджытæм æнæ æхсæнгарзæй куы бацæут æмæ æрмæст ныхасæй фæтк куы æвæрут, уæд. Уый хуымæтæг нæу, æндæр бæстæты колонитæм абаргæйæ. Уымæн æмæ колонитæ дих кæнынц æртæ хуызыл, махмæ та ис, æрмæстдæр иу колони æмæ алы фыдгæнæджы дæр дарæм уым», – дзырдта Маринæ.
Уый дæр банысан кодта колонийы бæстыхайы æдзæллаг уавæр, зæгъгæ, арæзт æрцыд ивгъуыд æнусы 30-æм азты. Уæд уый колонийæн арæзт не ‘рцыд, фæлæ фæдагурæн изоляторæн æмæ бæстыхай дзуапп нæ лæвæрдта дæргъвæтин рæстæджы ахæстæтты уым дарынæн. Уымæ гæсгæ ныр æххæстбæрцæй ацы объекты сæ хæстæ æххæст кæнын уымæн зын у колонийы кусджытæн.
Бестауты Маринæ ма æрæмбырдуæвджыты базонгæ кодта Уæрæсейы Федерацийы Хуссар Ирыстоны минæвар Гасситы Знауыры арфæйы фыстæгимæ уголовон- арастгæнæн системæйы кусджытæн.
Юстицийы министрады Æфхæрд æххæстгæнæн управленийы къухдариуæггæнæг Къæбулты Георги бæрæгбонон арфæйы фæстæ радзырдта йæ дæлбар уæвæг уагдоны куысты тыххæй.
«Ныридæгæн нæ къухты бафтыд, æнцой нын чи нæ лæвæрдта, уыцы хъуыддаг – арæзт æрцыд æмæ архайы дæргъвæтин рæстæджы кæрæдзийыл æмбæлыны тыххæй хатæн. Колонийы кусы хинайæн, ахст æмбæстæгтæн фадат æмæ уавæртæ ис, цæмæй сыгъдæг æмæ æфснайд хатæнты уой», – дзырдта Георги.
2016 азы куыстыл дзургæйæ, банысан кодта, зæгъгæ, дзы бынат нæ уыд иу уæлвæткон уавæрæн дæр.
«Абон мæнæн мæ бон у цæсгомджынæй зæгъон уый, æмæ ахæстонмæ наркотикон буарадтæ бахъуызын кæныны хъуыддагæн кæрон кæй æрцыд. Бирæ ныййарджытæ, хотæ, æфсымæртæ æрбацæуынц æмæ нын арфæ кæнынц уый тыххæй. Уый нæ, фæлæ ма архайын райдыдтой спорты цалдæр хуызæй. Æмæ уый та у Цъæхилты Игоры стыр хайбавæрд. Уый къухдариуæгадæй организаци æрцыд æртæ спортивон секцийы. Нæ колонийы контингент ма фæцалх чиныг кæсыныл. Уым та Иринæ Прокопенкойæн зæгъæм бузныг», – дзырдта ахæстоны къухдариуæггæнæг. Уый ма банысан кодта фидæны плæнттæ. Æрсидт йæ кусджытæм, цæмæй куыст дарддæр æнтысгæйæ размæ цæуа.
Тыбылты Леонид ма фембæлд Юстицийы министрады Паддзахадон регистраци, ка-дастр æмæ Хуссар Ирыстоны картографийы службæ æмæ Тæрхондонон приставты службæйы кусджытимæ. Службæты сæргълæуджытæ бæстæйы сæргълæууæджы базонгæ кодтой сæ куысты фæтк æмæ сæвзæргæ проблемæтимæ. Бæстæйы сæргълæууæг æрсидт министрады ацы службæтæм, сæ куыст адæмимæ кæй у, сæйраджыдæр, уымæ гæсгæ уæздан æмæ хуымæтæг ахастмæ. Дзуапп радта æрæмбырдуæвджыты цымыдисгæнæг фарстытæн дæр.
Къæбулты М.
Comments are closed, but trackbacks and pingbacks are open.