Ацы аз нæ республикæйы Президент Тыбылты Леониды хъæппæрисæй фæсивæды æнæниздзинадмæ хъусдарыны тыххæй куыст цы программæйыл æрцыд, ома, «Спорт в шаговой доступности», уый дарддæр кæны йæ куыст. Тыбылты Леонид йæ сæйраг хæсыл нымайы республикæйæн фидæны æнæниз фæсивæд схъомыл кæнын. Йæ архайдæй амоны æмæ домы Фæсивæды политикæйы фæдыл комитетæй нæ, фæлæ ма æндæр министрадтæ æмæ ведомствотæй дæр, кæцытæн комкоммæ ахаст ис рæзгæ фæлтæры хъомыладмæ, цæмæй æппæт тыхтæй дæр тырной фæсивæды ’хсæн хъомыладон куыстмæ, сæйраджыдæр, та — се ’нæниздзинадмæ.

Президенты программæмæ гæсгæ азы кæронмæ хъуамæ нæ горæт æмæ йæ районты конд æрцæуа аст спортивон гом фæзуаты æмæ аст та — спортивон залтæ, ифтонг цæуынц бæстæйы сæргълæууæджы резервон фонды фæрæзтæй.

6-æм майы нæ горæты цæгатфарс БАМ-ы районы цы спортивон зал ис, уый ифтонг æрцыд алыгъуызон тренажертæ æмæ æндæр спортивон инвентарæй. Дыууæ къуыри нæма рацыд æмæ та мæнæ нæ горæты ЦАРЗ-ы микрорайоны байгом спортивон фæзуат.

Цытджын мадзалы хайад райстой Президент Тыбылты Леонид, Æдасдзинады советы сæрдар Плиты Анатоли, Президенты Æнæниздзинад æмæ социалон фарстаты фæдыл уынаффæгæнæг Сиукъаты Радион, горæты администрацийы сæргълæууæг Æлборты Алан, Мидæггагон хъуыддæгты министр Лæууойты Æхсар, Спорт, туризм æмæ фæсивæды хъуыддæгты фæдыл комитеты сæргълæууæг Зассеты Сергей, йæ хæдивæг Кокойты Георги æмæ æндæр министрадтæ æмæ ведомствоты сæргълæуджытæ.

Мадзалмæ æрбацыдысты ацы микрорайоны фæсивæд æмæ цæрджытæ дæр. Цалынмæ мадзал цытджын æгъдауæй нæ байгом, уæдмæ Президент фембæлд æмæ зæрдæбын ныхæстæ ракодта ЦАРЗ-ы районы цæрджытимæ. Уыдон зæрдиаг арфæ кодтой Президентæн йæ сæрмагонд программæйы тыххæй рæзгæ фæлтæры сомбон æмæ æнæниздзинадыл кæй ауды. Уыимæ иумæ йæм хатыдысты, цæмæй сын ноджы лæмбынæгдæр æркæса се ’ннæ проблемæтæм дæр.

Уыцы нымæцы — фæндаджы хæрзарæзтадмæ. Президент цæрджыты фæндиæттæм хъусгæйæ, ныфс бавæрдта, цадæггай сын сæ куырдиæттæ кæй сæххæст кæндзæнис. «Кæд ацы аз Инвестпрограммæйы фæлгæтты цы 11 уынг арæзт цæуы горæты, уыдон нымæцмæ нæ бахауд уæ район, уæддæр иннæ аз æркастæуыдзæн ацы фарстмæ. Сымах хъуамæ зонат, æз сæрмагондæй уæ проблемæтимæ зонгæ кæй дæн, гæнæн уæвгæйæ тырнын уыдон аиуварс кæнынмæ, фæлæ алцæмæн дæр хъæуы рæстæг æмæ фæрæзтæ», — дзырдта Тыбылты Леонид.

Адæм бузныгæй баззадысты Президенты ахæм хуымæтæг æмæ иузæрдион ахастæй. Уый фæстæ цытджын æгъдауæй лыг æрцыд, фæзуатмæ бахизæны цы сырх лентæ уыд, уый. Райдианы ныхасы бар лæвæрд æрцыд Спорт, туризм æмæ фæсивæды политикæйы хъуыддæгты фæдыл комитеты сæргълæууæг Зассеты Сергейæн.

— Президенты программæ «Спорт в шаговой доступности»-йы сæйраг нысан у фæсивæды спортыл цайдагъ кæнын. Æрæджы дæр ма нæ фæсивæдæн нæ уыд спортæй сæхи кæм ирхæфстаиккой, ахæм бынæттæ. Ныр мæнæ ахæм фæзуæттæ æмæ спортивон залтæ, кæцытæ ифтонг цæуынц æппæтхъæуæг инвентарæй, арæзт æрцæудзæн горæты районтæй алкæцыйы дæр. Фæнды мæ зæгъын стыр бузныг Президентæн, уый йæ хæсыл кæй нымайы фæсивæды раст фæндагыл æфтауын æмæ йæм æввахс кæй сты сæ проблемæтæ.

Горæты администрацийы сæргълæууæг Æлборты Алан та афтæ загъта: «Радон хатт гом кæнæм спортивон фæзуат, ис афтæ зæгъæн, алы дыууæ къуыри иу хатт горæты фæзыны ног, рæзгæ фæлтæр æмæ фæсивæд спортæй кæм архайой, ахæм бынæттæ. Мæн бузныг зæгъын фæнды, чидæриддæр йе ’ххуысы къух фæдардта ацы фæрныг хъуыддагмæ, уыдонæн. Бузныг ЦАРЗ-ы микрорайоны цæрджытæн дæр, æнæрхъæцæй кæй æнхъæлмæ кастысты абоны бонмæ».

Уый фæстæ та ныхасы рацыд Тыбылты Леонид — ацы хæрзиуæг программæйы автор æмæ реализацигæнæг.

— Мæ зынаргъ æмбæстæгтæ! Арфæ уын кæнын, уæ сабитæн ахæм хорз ирхæфсæн бынат кæй фæзынд, уый цытæн. Тагъд мæнæ ацы бынатмæ хæстæг байгом уыдзæнис спортивон зал дæр. Ирыстон кæдфæндыдæр хъуыстгонд уыд йæ богалтæ æмæ спорты æндæр хуызы спортсментæй. Мæн ныфс ис, мæнæ ацы спортивон фæзуаты чи байрæза, уыцы хъомылгæнинæгтæ дæр кæй суыдзысты фидæны чемпионтæ.

Президент æмæ Хицауады номыл фæсивæдæй арæх æрбацæуы куырдиæттæ. Уыдон фæдомынц, цæмæй мах нæ хъус дарæм спорты фарстытæм, цæмæй арæзт æрцæуа ахæм бынæттæ, цыран фæсивæд сæхи ирхæфсой. Ныр мæнæ ахæм футболон фæзуæттæ æмæ тренажерон залтæ бакæнын ахъаз фæуыдзæн спортивон мадзæлттæ уадзынæн. Æз æппæт дæр сараздзынæн, цæмæй нæ республикæйы рæза æнæниз фæсивæд, — загъта Президент.

ЦАРЗ-ы фæсивæды номæй бузныджы ныхæстæ загъта Дудайты Альберт: «Цалдæр азы размæ дæр ма нæ горæты районтæй иуы дæр нæ уыд, фæсивæд пуртийæ кæм ахъазыдаиккой, спортæй кæм архайдтаиккой, ахæм бынат. Чизоны чидæртæ уымæн фæхæст сты нозт æмæ æндæр æвзæрдзинæдтыл, кæцытæ худинаг сты ирон адæмæн. Ныр нæ горæты фæдфæдыл фæзынд футболон фæзуæттæ æмæ спортивон залтæ. Æз афтæ хъуыды кæнын æмæ уый хорз фæстиуæг ратдзæнис. Бузныг ЦАРЗ-ы микрорайоны фæсивæд æмæ ныййарджыты номæй, сæрмагондæй, Президентæн æмæ ма йæ фарсмæ чи балæууыд, уыдонæн дæр».

Цытджын церемонийы фæстæ Президентæн лæвæрд æрцыд ацы фæзуаты къулдуары фыццаг гол бакæныны бар. Уый фæстæ ам футболæй ахъазыдысты «Барсалан»-ы æрыгон футболисттæ.

Уазæгты Марфа

Comments are closed, but trackbacks and pingbacks are open.