Спорт

РЕСПУБЛИКÆЙЫ БОНЫ ЦЫТÆН – ТУРНИР ФУТБОЛÆЙ

РХИ-йы сырæзтыл 30 азы сæххæсты цытæн Цхинвалы райдыдта сывæллæтты командæты ‘хсæн турнир футболæй. Ерыстæ уадзы г.Цхинвалы администраци. Хайад сæ исынц 15 командæйы. Уыдон дих сты 3 кары къордыл (2005-06, 2007-08 æмæ 2009-10 азты гуырд сывæллæттæ).

«Ерысты хайад исынц Цхинвалы микрорайонты командæтæ. Сывæллæттæн развæлгъау фехъусын кодтам турниры тыххæй æмæ сын уыд фаг рæстæг сæхи бацæттæ кæныны тыххæй. Уыдон турниры тыххæй куы базыдтой, уæд сын уыд тынг æхсызгон. Ныр дæр хъазынц тынг райзæрдæйæ», – банысан кодта Цхинвалы администрацийы спорты хайады сæргълæууæг Битеты Гурам. 

ВОЛЕЙБОЛ

Республикæйы боны цытæн ма ерыстæ уагъд цæуынц Ленингоры районы. Ам организацигонд æрцыд турнир волейболæй. «Районы администрацийы спорты хайады сæргълæууæг Бестауты Казимир куыд фехъусын кодта, афтæмæй ерысты хайад исынц 8 командæйы.

«Командæтæ дих сты дыууæ къордыл. Турниры уагæвæрдмæ гæсгæ финалмæ ахиздзысты, сæ къордты фыццаг бынæттæ чи бацахса, уыцы командæтæ», – загъта Бестауты Казимир.

Турнир фæуыдзæн абон, 19 сентябры.  

ТЕХНИКОН УÆЛАХИЗ ЛÆВÆРД ÆРЦЫД «АЛАНИ»-йæн

Национ футболон къорды 9-æм туры фæлгæтты 13-æм сентябры Дзæуджыхъæуы «Алани» хъуамæ фысымиуæг кодтаид Брянскы «Динамо»-йæн. Фæлæ ацы командæйы хъазджыты иу къорд коронавирусæй кæй фæрынчын, уый аххосæй хъазт уагъд нал æрцыд. Уый фæдыл Уæрæсейы футболон цæдисы Контролон-дисциплинарон комитет рахаста уынаффæ, цæмæй техникон уæлахиз лæвæрд æрцæуа «Алани»-йæн. Уый тыххæй фехъусын кодта командæйы пресс-службæ.

«Ахæм уавæры гæнæн ис æмæ бахауа алчи дæр. Уымæ гæсгæ æмæнкъард кæнæм нæ динамойаг коллегæтимæ æмæ сын зæгъæм, цæмæй æввахс рæстæджы сынæниз уой. Мах та фæндыд 3 очкойы раст тохы рамбулын», – фыст ис клубы сайтыл.

Ныр «Алани»-йæн ис 16 очкойы æмæ турнирон таблицæйы ахсы 6-æм бынат. Радон хъазт командæ акæндзæн абон, 19-æм сентябры Нижнекамскы «Нефтехимик»-имæ. «Алани»-йы плæнтты тыххæй та клубы президент, амалаиуæггæнæг Гуыриаты Владимир радзырдта «Алани»-йы аналитикон рауагъдадæн.  «Мах нæ разы æвæрæм тынг зын хæстæ æмæ сæ скъуыддзаг кæнæм этаптæм гæсгæ. Сæххæст уал кодтам Национ футболон къордмæ рахизыны хæс. Реконструкци кæнæм клубы базæ, архайæм стадионы реконструкцийы проблемæтыл, уымæн æмæ раст нæу, спортуарзджытæн сæ уарзон командæйы хъæзтытæм бакæсынæн уавæр кæй нæй, уый. Дарддæр дæр боны фæткы ис премьер-къордмæ рахизыны фарст. Æмбарын æй, уый саразын кæй у тынг зын. Фæлæ архайдзыстæм. Кæд нын ныр нæ рауайа, уæд иннæ аз уæддæр рахиздзыстæм. Мах хæсджын стæм, цæмæй уæм премьер-къорды», – банысан кодта Гуыриаты Владимир. – «Мæхæдæг футболы фанат нæ дæн. Футбол фылдæр уарзы мæ лæппу. Фæлæ йæ зонын, уыцы хъуыддаг кæй хъæуы республикæйы, Ирыстоны футбол тынг кæй цымыдис кæны. Уæрæсейы бирæ республикæтæ, крайтæ æмæ областтæ ис, цыран стадионмæ æрба-цæудзысты 30 мин спортуарзæджы. Ирæттæн футбол, афтæ зæгъæн ис, æмæ кæй ис сæ генты, сæ туджы, æвæццæгæн, бразилиæгтæ æмæ аргентинæгтæн куыд ис, афтæ. Уымæ гæсгæ æппæт дæр хъæуы саразын, цæмæй стыр футбол æрбаздæха Ирыстонмæ. Цæмæй сывæллæттæ хъазой футболæй, архайой спортæй», – загъта уый.

ХУРИТЫ Батрадз