Спорт

СУМО

Казаны уагъд æрцыд Уæрæсейы чемпионат сумойæ. Уым æнтыстджынæй сæхи равдыстой ирон спортсментæ. +115 кг æмæ абсолютон уæзы категорийы сыгъзæрин майдантæ рамбылдта Хъараты Зауыр. Ноджы ма иу сыгъзæрин майдан бафтыд Бызыккаты Асланы къухты, кæцы хæцыд 100 кг уæзы. Бронзæйон призертæ та систы Дриаты Алан (85 кг), Багаты Руслан (+115 кг) æмæ Битарты Руслан (абсолютон уæзы категори).

Уыдон уыдысты æвзарæн ерыстæ Уæрæсейы æмбырдгонд командæмæ, кæцы апрелы мæйы хайад исдзæн Европæйы чемпионаты. Уый дæр уагъд цæудзæн Татарстаны столицæйы.

АРМРЕСТЛИНГ

Радон хатт та аккаг ныхмæлæууæг нæ разынд Дыгъуызты Малхазæн инвалидты ‘хсæн (лиц с поражением опорно-двигательного аппарата ПОДА) армрестлингæй Уæрæсейы чемпионаты. Малхаз дыууæ къухæй дæр рамбылдта +75 кг уæзы категорийы.

Дыууæ къухæй ма фæуæлахиз Мæлдзыгаты Алинæ. Уый та хæцыд 65 кг уæзы. Галиу къухæй аккаг ныхмæлæууæг нæ разынд Цъæхилты Гра-фæн (85 кг), рахисæй та – Дзугаты Маратæн (+55 кг).

Æвзист майданты хицæуттæ баисты Томайты Георги (55 кг) æмæ Хъуппеты Виктория (50 кг).

ФУТБОЛ

Турчы кæронмæ фæхæццæ кæнынц Дзæуджыхъæуы футболон командæ «Алани»-йы цæттæгæнæн сбортæ. Уым фæстаг контролон хъазты дзæуджыхъæуккæгтæ хъазыдысты Казахстаны командæ «Каспий»-имæ, кæцы ивгъуыд аз сæ бæстæйы премьер-къорды бацахста 10-æм бынат. Банысан кæнын хъæуы уый дæр, æмæ хъазт дыууæ таймы бæсты кæй цыд æртæ таймы. Фембæлд фæцис «Алани»-йы пайдайæн 10:3 хыгъдæй. Алайнæгты сконды фæйнæ дыгай пуртийы бакъуырдтой Хæдæрцаты Батраз, Хуыбылты Владимир, Гуырцъыты Батраз, Ислам Машуков æмæ Николай Георгобиани.

Хуриты Батрадз