Уæрæсейы Федерацийы Президент Владимир Путины Барамындæй Стыр театры сæйраг дирижер, музыкалон къухдариуæггæнæг Сохиты Тугъанæн лæвæрд æрцыд УФ-йы сгуыхт артисты кадджын ном.
«Фыдыбæстæйон культурæ æмæ аивады рæзты йæ лæггæдты, бирæ азты дæргъы æнтыстджын архайды тыххæй Сохиты Тугъанæн лæвæрд æрцæуæд «УФ-йы сгуыхт артист»-ы кадджын ном», – дзырдæуы Барамынды.
Сохиты Тугъан райгуырд Дзæуджыхъæуы 1977 азы, каст фæцис Петербурджы музыкалон консерватори, дыууæ азы ахуыр кодта легендарон Илья Мусинмæ æмæ уый фæстæ та – Юри Темиркановмæ. Сохийы фырт дирижеры професси равзæрста 17-аздзыдæй. Йæ дунеон карьерæ райдыдта 2003 азы Валлийаг национ оперæйы. Фæстаг азты æмгуыст кодта зынгæ европæйаг коллективтимæ, сæрмагондæй, йæ къухдариуæгады бын уыдысты Тулузы Капитолийы национ æмæ Берлины симфонион оркестртæ.
Æрхонгæ дирижерæй уыд дунейы хуыздæр оркестрты, уыцы нымæцы Берлины æмæ Венæйы филармониты амстердамаг Консертгебауы Чикагойы симфонион, Баварийы радиойы оркестрты æмæ æндæрты. Сохиты Тугъан у Мариинаг театры æппынæдзухон дирижер. Ацы театры сæргълæууæг Гергиты Валериимæ йын ис рагон хæлардзинад. Сохиты Тугъаны æрбацыдимæ бæстæйы егъаудæр Стыр æмæ Мариинаг театрты ‘хсæн фæзынд цымыдисон параллель: дыууæ сфæлдыстадон коллективы сæргъ лæууынц Ирыстонæй рацæугæтæ, Петербурджы дирижерон скъолайы фæдонтæ, Илья Мусины ахуыргæнинæгтæ.
Уæ зæрдыл уын лæууын кæнæм: Сохиты Тугъан у Цæгат Ирыстон-Аланийы адæмон артист. 1999 азы ссис С.Прокофьевы номыл 3-аг дунеон конкурсы лауреат. 2013 азы та ссис «За заслуги»-йы ордены кавалер. 2014 азы та йæ схуыдтой «Азы музыкалон адæймаг» («оркестры дирижеры» категорийы), Францы профессионалон, театралон, музыкалон æмæ балетон критикты синдикат.
Comments are closed, but trackbacks and pingbacks are open.