Сомихы паддзахадӕн Никол Пашиняны æрлæудæй фæстæмæ æнцойад нал ис – райдыдтой «хуызджын» революцийæ, састы бынаты баззадысты дыууæ хæсты Азербайджаны ныхмæ, фесæфтой Хæххон Карабах æмæ ныр та кæрæдзимæ фесты. 12 июны Сомихы парламенты радон рабадты Пашинян йæ раныхасы цалдӕр сомихаг инӕлары бафхæрдта ӕмӕ ма сӕ, ӕгӕрыстӕмӕй, уӕйгӕнджытӕ дӕр рахуыдта.

«Нӕ инӕлартӕй кӕцыдӕртӕ сӕ райгуырӕн бӕстӕйы тыххӕй гаджидаутӕ уагътой, фӕлӕ Азербайджан куы ӕрбабырста Карабахмӕ, уӕд мӕм лӕгъстӕйӕ дзырдтой, цӕмӕй сӕ раирвӕзын кӕнон хӕсты быдырӕй. Уыдон сты тӕппудтӕ ӕмӕ дезертиртӕ, ӕмӕ сӕ бынат ис ахӕстоны», – загъта Пашинян.

Ацы ныхӕсты фӕстӕ оппозицион депутаттӕ загъд самадтой, суанг ма къухӕй дӕр бавнӕлдтой сӕ кӕрӕдзимӕ. Фӕлӕ Пашинян ууыл не ‘рлӕууыд – дарддӕр провокацитӕ арӕзта ӕмӕ знӕт кодта ӕрӕмбырдуӕвджыты. Куы йӕ бафарстой, зӕгъгӕ дӕ цӕмӕннӕ фӕнды протестон змӕлды лидер Баграт Галстанянимӕ фембӕлын, уӕд эмоционалон дзуапп радта, ома мӕм ӕй багажласӕны ӕрбаласут ӕмӕ фембӕлдзынӕн йемӕ.

Уыцы рӕстӕджы Ереваны уынгты протестгӕнджытӕн конфликт рауад пъӕлицӕимӕ. Демонстранттӕ хъавыдысты парламенты бӕстыхаймӕ бабырсынмӕ, ома Пашиняны отставкӕйы арвитынмæ. Ӕнӕниздзинады министрад куыд фехъусын кодта, афтӕмӕй рынчындонмӕ бахаудтой 115 адӕймаджы, уыдонӕй 17 разындысты пъӕлицӕйӕгтӕ. Гранатӕйы срӕмыгъды фӕстиуӕгӕн дзы иу адӕймагӕн йӕ къух ахаудта.

Демонстранттӕ, фыццаджыдӕр, разы не сты арӕнты делимитациимӕ ӕмӕ юридикон демаркациимӕ. Ног бадзырдмӕ гӕсгӕ Азербайджанӕн хъуамӕ радтой цалдӕр хъӕуы Тавушы областы. Демонстрантты лидер Баграт Галстанян растдӕр у Тавушы епархийы сӕргълӕууӕг. Ис афтӕ хъуыдыгӕнджытӕ дӕр, ома оппозицийы протесттӕ сусӕгӕй цырен кӕнынц Турк ӕмӕ Азербайджан. Сӕ фӕнд у, Сомихы ӕхсӕнад схӕццӕ кæнын ӕмӕ сӕм мидӕггагон хӕст бандзарын.

Пашинян ма ноджы фехъусын кодта, зӕгъгӕ, Сомих гӕнӕн ис ӕмӕ рахиза Кол­лективон ӕдасдзинады бадзырды организацийы (ОДКБ) скондӕй. Йӕ раныхасы ОДКБ-йы фӕаххосджын кодта, ома сӕ хӕстӕ не ‘ххӕст кӕнынц ӕмӕ ма уыимӕ иумӕ архайынц Азербайджаны пайдайӕн. Пашинян ницӕййаг политик ӕмӕ лидер разынд, нӕй йын ӕнтыстытӕ мидӕггагон ӕмӕ ӕддагон политикӕйы, ӕмӕ Сомихы мӕгуырау уавӕры ныр аххосджын кӕны йӕхи нӕ, фӕлӕ ОДКБ-йы.

Пашиняны ныхӕстӕ диссаг никӕмӕ фӕкастысты. Ныры онг дӕр Соросы «къӕ­былайӕ» ахӕм хуызы «схъӕл» ныхӕстӕ арӕх ирвӕзт. Пашинянӕн йӕ рейтинг тынг ныллӕг у, тӕрсы фӕсурынӕй ӕмӕ цы сараза, уый нал зоны. Ныгуылӕн бӕстӕтӕ дӕр уавӕримӕ зонгӕ сты ӕмӕ йӕ тагъд кӕнынц, цӕмӕй рагацау Уӕрӕсеимӕ йӕ бастдзинӕдтӕ аскъуына. Кӕннод дзы ӕваст революци куы саразой хуымӕтӕг адӕм, уӕд АИШ-ы фӕндтӕ нал сӕххӕст уыдзысты. Пашиняны ныхӕсты та нӕдӕр логикӕ ис, нӕдӕр мидис. 2020 азы Пашинян ӕмӕ Сомихы цӕрджытӕ арфӕтӕ кодтой Уӕрӕсейӕн, хӕст сӕм кӕй ӕрлӕууын кодта, уый тыххӕй. Уӕрӕсейаг фидауынгӕнӕн тыхтӕ бацыдысты Хӕххон Карабахмӕ ӕмӕ дзы сабырдзинад ныллӕууыд. Ныр Хӕххон Карабах сӕхи ӕнӕсӕр миты аххосæй куы фесӕфтой, уӕд сын Уӕрӕсе знаг фестад. Ӕмӕ уый хуымӕтӕджы нӕу.

Парламенты раныхасы хӕдразмӕ Пашинян фембӕлд америкӕйаг паддзахадон секретары хӕдивӕг Джеймс О Брайенимӕ ӕмӕ бадзырдтой, цӕмӕй АИШ ӕмӕ Со­михы ‘хсӕн ӕмахастытӕ схизой стратегион партнердзинады ӕмвӕзадмӕ. Уый та нысан кӕны, æввахс рӕстӕджы Сомихы гарзджын тыхтӕ кæй уыдзысты «демократон» контролы бын ӕмӕ активон хайад исдзысты НАТО-йы партнерон программӕты. Комкоммӕ зӕгъгӕйӕ та, Сомих экономикон, политикон ӕмӕ ӕфсӕддон къабӕзты суыдзӕн АИШ-ы дӕлбар. АИШ бындуронӕй кӕй ӕрбынат кодта Сомихы, уый        ууыл дзурӕг у, Ереваны кӕй ис иууыл егъаудӕр америкӕйаг минӕварад, уый дӕр.

Цӕмӕй Сомих ӕнӕмӕнг рахиза ОДКБ-йы скондӕй ӕмӕ йӕм уый фӕдыл къаддӕр претензитӕ уа, уый тыххӕй Пашинян йӕ пырх ныккалдта Беларусыл ӕмӕ йӕ сӕргълӕууӕг Лукашенкойыл. Ӕрӕджы Лукашенко кусӕгон балцы уыд Азербайджаны ӕмӕ Алиевимӕ фембӕлды рӕстӕджы загъта, зӕгъгӕ, Хӕххон Карабахы территорийыл сабыр цард куыд ӕндидзын кӕнынц, ахӕм методтӕй спайда кӕнӕн уыдзӕн фидӕны Украинӕйы дӕр. Кӕд ӕмӕ Хӕххон Карабахы Пашинян йӕхӕдӕг ныууагъта рохуаты, уӕддӕр ӕм Лукашенкойы ныхӕстӕ, цӕмӕдӕр гӕсгӕ, тынг хъыг фӕкастысты. Чизоны та ӕфсон агуырдта.

Ныр Пашинян ультиматум сӕвӕрдта, ома Сомихы позици ОДКБ-йы ‘рдӕм фӕивдзӕн, ӕрмӕстдӕр, кӕд Беларусь рахиза йе скондӕй ӕмӕ Лукашенко та хатыртӕ ракура. Бартхъирӕн кодта, зæгъгæ, Беларусы территоримӕ налдӕр йӕхӕдӕг ныццӕудзӕн, налдӕр ӕндӕр сомихаг политик. Алчидӕр тынг хорз зоны, Беларусь ОДКБ-йы скондӕй кӕй нӕ рахиздзӕн, уӕлдайдӕр та Пашиняны хуызӕн ницӕййаг лидеры ӕртхъирӕнты фӕстиуӕгӕн. Ӕмӕ ма ныгуылӕны дӕр ӕндӕр цы хъӕуы.

Беларусы фӕсарӕйнаг хъуыддӕгты минӕвар куыд бамбарын кодта, афтӕмӕй Беларусы нӕ фӕнды Сомихимӕ сӕ ахастытӕ февзӕр кӕнын. «Сомихы ахӕм къахдзӕфтӕ аразынмӕ разӕнгард кӕнынц фӕсарӕнтӕй. Кӕд кӕйдӕр фӕнды сомихӕгты сӕ мидӕггагон проблемӕтӕй ахӕм хуызы фӕиппӕрд кӕнын ӕмӕ махӕй ӕддагон знаг саразын, уӕд уыцы позици тынг мӕгуырау у. Дыууӕ бӕстӕйы рагӕй фӕстӕмӕ бӕттынц ӕфсымӕрон ахастытӕ, иумӕйаг истори, иумӕйаг базарад. Беларусы разамынад стыр кад кӕны сомихаг нацийӕн ӕмӕ сӕ зӕрдиагӕй фӕнды, цӕмӕй сын уа ахӕм лидертӕ, кӕцытӕ тыхджын кӕндзысты сӕ паддзахад, архайдзысты адӕмы фӕрныгад фылдӕр кӕныныл», – зӕгъы бела-русаг дипломат.

Хӕххон Карабахы хӕст куы райдыдта, уӕд Ереван официалонӕй нӕ бахатыд ОДКБ-мӕ ӕххуысмӕ, уымӕн ӕмӕ ацы регион юридиконӕй Сомихы территори нӕ уыд. Сомих 30 азы дӕргъы Хӕххон Карабахы йе скондмӕ райсын нӕ бауӕндыд ӕмӕ сӕ стӕй афтӕ фӕндыд, Уӕрӕсе сӕ бӕсты Азербайджанимӕ куы схӕцыдаид ӕмӕ сын «сыгъзӕрин тӕбӕгъыл» Хӕххон Карабахы куы ӕрбахастаид. ОДКБ-йӕн йӕ хӕстӕ сты – кӕрӕдзимӕ ӕфсӕддон информаци дӕттын, иумӕйаг арӕнтӕ хъахъхъӕнын ӕмӕ терроризмы ныхмӕ тох кӕнын.

ОДКБ-йы организацийӕ куы рахиза Сомих, уӕд ӕнӕмӕнг Уӕрӕсеимӕ сӕ дипломатон ахастытӕ февзӕр уыдзысты. Уӕрӕсе сӕ ныхмӕ экономикон санкцитӕ куы райса, уӕд Сомихы паддзахад ахӕм баййафгӕ зиӕнттӕ не сфӕраздзӕн.

ОДКБ-йы сконды сты Беларус, Казахстан, Киргизи, Таджикистан, Уӕрӕсе ӕмӕ Сомих. Ацы организаци фарон сарӕзта иумӕйаг уӕлдӕфон хъахъхъӕнынады системӕ ӕмӕ ныртæккæ Сомихы территорийыл цы радартӕ ис, уыдон ӕхгӕнынц ӕнӕхъӕн хуссар сектор. Фӕлӕ ОДКБ-йы ӕфсӕддонтӕ исты ӕрымысдзысты ӕмӕ стыхджын кӕндзысты хуссарварс арӕнтӕ ӕнӕ Сомих дӕр.

Сомихӕн та йӕ хъысмӕт бӕллиццаг нӕу. Азербайджан ӕмӕ Турк ӕргомӕй ӕрӕвнӕлдтой Сомихы паддзахад ныппырх кӕнынмӕ. Сомихӕгтӕм афтӕ кӕсын райдыдта, ома сын ныгуылӕн баххуыс кӕндзӕн ӕмӕ бахиздзысты «европӕйаг фӕрнджын хӕдзармӕ». Афтӕ бирӕ бӕстӕтӕ ӕнхъӕлдтой, ӕгӕрыстӕмӕй, Турк дӕр. Фӕлӕ ӕцӕгӕй та се ‘ддагон политикӕ куы нӕ фӕивой, уӕд цыбыр рӕстӕгмӕ суыдзысты мӕгуыр, ӕнӕбон паддзахад. Кӕнӕ та бынтондӕр ӕрбайсӕфдзысты дунейы картӕйӕ.

Дзӕвгар политикты хъуыдымӕ гӕсгӕ Сомих цӕуы растдӕр Украинӕйы фӕндагыл. Ныгуылӕны рагӕй фӕнды Фӕскавказы глобалон конфликт сцырен кӕнын. Гуырдзыстоны сын нӕ рауад ӕмӕ ныр се ‘ргом аздӕхтой Сомихмӕ. Конфликт расидын сӕ нӕ уадзы Уӕрӕсе – Гюмрийы уӕвынад кӕны уӕрӕсейаг ӕфсӕддон базӕ, Иран ӕмӕ Турчы арӕнтыл архайынц уӕрӕсейаг арӕнхъахъхъӕнджытӕ, аэропорт Звартноцы дӕр сты уӕрӕсейаг арӕнхъахъхъӕнджытӕ. Пашиняны бахӕсджын кодтой, цӕмӕй тагъд рӕстӕджы афтӕ сараза, ӕмӕ уӕрӕсейаг тыхон структурӕтӕ мауал уӕвынад кӕной Сомихы территорийыл ӕмӕ уый фӕстиуӕгӕн АИШ-ы авналӕнтӕ фӕуӕрӕхдӕр уой.

АИШ сын ныфсытӕ ӕвӕры, ома уӕ Туркимӕ бафидауын кӕндзыстӕм, 1993 азӕй фӕстӕмӕ сӕ арӕнтӕ ӕхгӕд сты карабахаг хӕсты фӕстиуӕгӕн. Стӕй ма сын 1915 азы геноцид дӕр сарӕзтой. Турк разы у фидыдады бадзырд бафыссыныл, фӕлӕ уый нӕ нысан кӕны ӕмӕ сомихӕгтыл исты хуызы тыхсы. Фӕнды сӕ Зангезуры район сӕхи бакӕнын, цӕмӕй сын Азербайджанимӕ сур зӕххыл арӕн уа. Уый фӕстиуӕгӕн саразой логистикон маршрут ӕмӕ исой егъау экономикон ӕфтиӕгтӕ. Пашиняны уадзгӕ политикӕмӕ гӕсгӕ Турчы бӕллицтӕ рӕхджы сӕххӕст уыдзысты.

Паддзахадон Думӕйы депутат Анатолий Вассерман куыд ӕмбарын кӕны, афтӕмӕй революци саразыны фӕстиуӕгӕн Пашиняны æмæ йӕ бандӕйы снысан кодтой Сомихы хистӕрӕй ӕрмӕстдӕр уый тыххӕй, цӕмӕй Фӕскавказы регионы уавӕр фендыгъддӕр кӕна.

«НАТО бирӕ азты дӕргъы Гуырдзыстоны йӕ къӕхты бын ссӕста ӕмӕ ныр Гуырдзыстон сӕ «дзӕмбытӕй» куы аирвӕзт, уӕд райдыдтой Сомихы ӕлхъивын. Пашинян адӕмы афтӕ «бафӕллайын» кӕндзӕн ӕмӕ æввахс рӕстӕджы сразы уыдзысты НАТО-йы базӕты арӕзтадыл дӕр. Сомихы территорийӕ АИШ Уӕрӕсемӕ ӕрбабырсынмӕ нӕ хъавы, фӕлӕ Иранмӕ», – зӕгъы Вассерман.

Куыд уынӕм, афтӕмӕй Сомихӕй аразынмӕ хъавынц плацдарм хӕстон архайдтытӕн. Ӕмӕ ма уый фӕстӕ уӕвынад кӕндзӕн куыд хӕдбар паддзахад, уый зын зӕгъӕн у.

ДЖИОТЫ Алыксандр

 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.