Социалон-нысаниуæгджын мадзæлттæ уадзыны фæдыл паддзахадон къамисы рабадт

РХИ-йы Президент Тыбылты Леониды сæргълæудæй уагъд æрцыд социалон-нысаниуæгджын мадзæлттæ уадзыны фæдыл паддзахадон къамисы рабадт.

Рабадты куысты хайад райстой РХИ-йы Хицауады Сæрдар Хъуылымбегты Доменти, Президенты Администрацийы къухдариуæггæнæг Джиоты Алан, Парламенты Сæрдары фыццаг хæдивæг Мамиты Инал, республикæйы горæтты æмæ районты администрациты сæргълæуджытæ.

Рабадты рæстæджы лæмбынæг æруынаффæ кодтой бæрæгбонон бонты, сæрмагондæй 19,20, 21-æм сентябры мадзæлтты планыл. Бæрæгбонон бонтæ кæй сты, уымæ гæсгæ паддзахады сæргълæууæг бæрæгæй бамбарын кодта, зæгъгæ, мадзæлттæ ауадзыны фæдыл бæрнон адæймæгтæ сæ куыстмæ хъуамæ равдисой бæрнон ахаст.

«20 сентябрь стыр бæрæгбон у. Æмæ тынг ахсджиаг у, нæ хæдбардзинад нын кæй банымадтой æмæ ацы бæрæгбон бæрзонд æмвæзадыл кæй нысан кæнæм, уый», – загъта Тыбылты Леонид.

Уый банысан кодта, зæгъгæ, республикæйы тыхон блокимæ уый размæ боны рабадты уынаффæ цыд республикæйы территорийыл æдасдзинад сифтонг кæныны фарстытыл Уæрæсейы Федерацийы Паддзахадон Думæмæ æвзæрстыты рæстæджы.

Уый фæстæ байхъуыстой бæрæгбонон мадзæлтты развæлгъау планмæ. Уыдоны тыххæй бæстон радзырдта Президенты паддзахадон уынаффæгæнæг Зассеты Жаннæ.

«19-æм сентябры мах нысан кæнæм Паддзахадон Тырысайы бон. Ирон триколоры хæрдмæ сисыны цытджын церемони  алыхатт дæр уагъд цыд Цхинвалы Театралон фæзуаты. Фæлæ, сæйраг фæзуаты арæзтадон-æндидзынгæнæн куыстытæ уагъд кæй цæуынц, уымæ гæсгæ мадзал ацы аз ахаст æрцыд республикæйы сæйраг горæтмæ æрбахизæны бæрзæндтæй сæ иумæ, сæрмагондæй, Присы хъæумæ, цыранмæ хуынд æрцæудзысты Кадджын хъарагъулы ротæ, Хуссар Ирыстоны Мидхъуыддæгты æмæ Хъахъхъæнынады министрады æфсæддон æмæ политикон цæттæдзинады хуыздæр службæгæнджытæ. Церемони æххæст æрцæудзæн «Паддзахадон тырысайы тыххæй» Республикæ Хуссар Ирыстоны Закъонмæ гæсгæ.

Уыцы бон æнхъæлмæ кæсæм алы бæстæты делегациты æрцыдмæ. Паддзахадон телерадиокомпани «Ир» план кæны Хуссар Ирыстоны тыххæй кинонывтæ равдисын», – загъта уый.

Зассеты Жаннæйы ныхæстæм гæсгæ, 20-æм сентябрь хъæздыг уыдзæн алыгъуызон бæрæгбонон мадзæлттæй.

Рабадты хайадисджытæ æруынаффæ кодтой Хъахъхъæнынады министрады Цхинвалы горнизоны цытджын рацыды бынатыл, уымæн æмæ республикæйы сæйраг горæты сæйраг фæзуаты æфсæддон техникæимæ æххæст æфсæддон парад ауадзынæн ныртæккæ фадат нæй.

«Уагъд ма æрцæудзæн сывæллæтты стыр бæрæгбон «Этот мир принадлежит нам!», зæгъгæ. Ацы бон уагъд æрцæудзæн фольклорон-этнографион бæрæгбон «Наследие предков», кæцы уагъд цæуы ирон цардуагон адæмон культурæ сæндидзын æмæ пропагандæ кæныны æмæ фæлтæрддзинад фæсивæдмæ радтыны тыххæй. Ацы мадзал уагъд æрцæудзæн Къостайыхъæуы æмæ дзы хайад райсдзысты куыд хицæн адæймæгтæ, афтæ Хуссар Ирыстоны районты æмæ горæтты командæтæ æмæ куыстуæттæ æмæ организацитæ дæр.

Ацы бон фæуыдзæн стыр бæрæгбонон концерт æмæ фейерверкæй», – загъта пад-дзахадон уынаффæгæнæг.

Рабадты ма æруынаффæ кодтой 21-æм сентябры Мады Майрæмы боны фæдыл сплангонд мадзæлтты тыххæй дæр.

РХИ-йы Президенты официалон сайт