Ирыстоны кад дунеон спортивон аренæйыл бæрзонд чи хæссы, уыцы зындгонд боксер Гасситы Муратæн рæхджы, 3-æм февралы, Сочийы Æппæтдунеон боксерон супер серийы уыдзæн йæ радон тох. Уый рингыл тох кæндзæн кубæйаг спортсмен Юниор Дортикосимæ. Ацы спортивон цаумæ æнæрхъæцæй æнхъæлмæ кæсынц Цæгат æмæ Хуссар Ирыстоны адæм, спортсментæ, спортуарзджытæ æмæ Гасситы Мураты хорз чи зоны, æппæт уыдон. Гасситы Мураты радон тохмæ ацæудзæнис нæ Президент Бибылты Анатоли дæр.
Сочимæ æрвыст æрцæудзысты нæ сывæллæтты иу къорд дæр. Сæ арвитыны хъуыддаг сорганизаци кодта фæсивæдон организаци «Иу-уон Алани» РХИ-йы Президент Бибылты Анатолийы æххуысæй. Сывæллæтты арвитыны хъуыддаджы бæрндзинад æнкъаргæйæ знон Республикæ Хуссар Ирыстоны Президент йæхимæ райста, горæт Сочимæ чи абалц кæндзысты, нæ республикæйы уыцы 40 скъоладзауы æмæ ма семæ чи цæуы, уыцы тренерты æмæ журналистты.
Фембæлды рæстæджы, фыццаджыдæр, Бибылты Анатоли бафæдзæхста æрыгон фæсивæды, цæмæй сæхи, куыд æмбæлы, афтæ дарой. «Мæнæ æцæг ирон лæг цахæм у, раст афтæ хъуамæ уæхи дарын зонат. Цæмæй зæгъой ацы сывæллæттæ хорз, æгъдауджын сывæллæттæ сты. Æрмæст сымах нæ уыдзыстут Цхинвалæй, ардыгæй дзы бирæ адæм уыдзæнис. Стæй канд мах нæ, фæлæ æгас Ирыстонæй, Хуссарæй дæр æмæ Цæгатæй дæр. Æз афтæ хъуыды кæнын æмæ дзы Ирыстонæй авд мин адæймагæй къаддæр нæ уыдзæнис. Уыдонимæ иумæ нæ зæрдæтæ хъуамæ радтæм æмæ хæцæм не ʻмзæххон чемпион Гасситы Мураты æвварс. Æз мæхæдæг дæр уым уыдзынæн æмæ та уым дæр амбæлдзыстæм. Мах, кæй зæгъын æй хъæуы, тынг фæнды, цæмæй нæ ирон богал фæуæлахиз уа æмæ нæхæдæг та фæстæмæ дзæбæхæй æрыздæхæм», – фæсивæды фæдзæхсгæйæ дзырдта Бибылты Анатоли.
Фæсивæдон организаци «Иууон Алани»-йы сæрдар Коцты Михаил Президентæн радзырдта, æппæт дæр кæй бацæттæ кодтой сæ балцы тыххæй, уый. «Сочимæ чи ацæудзæн, уыдон æхсæн сты æрыгон спортсментæ, афтæ ма республикæйы æппæт районты æмæ горæты скъолаты ахуыргæнинæгтæ. Æдæппæтæй стæм 48 адæймаджы æмæ нын ис æртæ машинæйы. Æдасдзинады тыххæй немæ ацæудзысты Паддзахадон автоинспекцийы кусджытæ дæр», – загъта Коцты лæппу. Уый ма Бибылты Анатолийæн загъта, зæгъгæ, Сочимæ хæссынц уырыссаг æмæ ирон тырысатæ. Афтæ ма Гасситы Муратыл Санахъоты Юля цы æмдзæвгæ ныффыста, уый дæр. Президент уæд банысан кодта, зæгъгæ, Гасситы Мурат канд Ирыстоны спортсмен нæу, фæлæ ма у Уæрæсейы спортсмен дæр. Уымæ гæсгæ дзы хъуамæ уа дыууæ тырысайы дæр. «Æз афтæ хъуыды кæнын, æмæ уæ ацыд æмæ уе ‘рцыд дæр уыдзæн хорз. Райсдзыстут дзы стыр æхцондзинад æмæ уыл уæ балц ныууадздзæнис хорз тæлмæнтæ æмæ куы ‘рыздæхат, уæд уе ‘мбæлттæн радзурдзыстут уæ тæлмæнтæ», – загъта Бибылты Анатоли.
Фембæлды кæрон ма фæсивæды номæй сæ балцы тыххæй стыр бузныджы ныхæстæ загъта Коцты Михаил æмæ банысан кодта, зæгъгæ, ахуырдзауты балц ахъаз у Хуссар Ирыстоны рæзгæ фæлтæры ‘хсæн спорт пропагандæ кæнынæн. «Чизоны, абон ацы æрыгон спортсменты ‘хсæн сты сомбоны Гасситы Мураттæ. Куы йæм бакæсой, уæд, чизоны, ноджы тынгдæр тырной спорты бæрзæндтæм æмæ уымæ гæсгæ нæ балцæн дæр сывæллæттимæ ис стыр нысаниуæг», – загъта «Иууон Алани»-йы организацийы сæрдар.
* * *
Президентимæ фембæлды хайадисджытæн ма пресс-конференци уыд информацион агентад «Спутник -Хуссар Ирыстон»-ы.
Цхуырбаты Ларисæ
Comments are closed, but trackbacks and pingbacks are open.