Стыр Фыдыбæстæйон хæсты Уæлахизы бон кад æмæ цытимæ банысан кæныны сæраппонд ацы бонты Хуссар Ирыстоны уагъд цыдысты бирæ алыгъуызон мадзæлттæ.

8-æм майы Стыр Уæлахизы бæрæгбон цытджын æгъдауæй банысан кодтой Дзауы районы дæр. Администрацийы къухдариуæгад бацархайдта æмæ бæрæгбоны размæ хæрзæфснайд бакодтой централон уынгтæ, уый фæстæ сæ бæрæгбонвæлыст скодтой. Районы центры «Кады аллея»-йы Стыр Фыдыбæстæйон хæсты хъайтарты номыл цырты размæ æрбамбырд сты цæрджытæ, скъоладзау фæсивæд сæ ахуыргæнджытимæ хастой дидинджытæ уæлахизхæсджыты нæмттæ æрымысыны сæраппонд. Æвзонг фæсивæд бæрæгбоны цытæн арфæ кодтой фæсчъылдымы ветеран Пæррæстаты Соняйæн. Дардыл хъуыстысты æфсæддон зарджытæ. Цытджын мадзалы райдианы айзæлыдысты Уæрæсейы Феде-раци æмæ Хуссар Ирыстоны гимны зæлтæ. Скъоладзаутæ цытджын æгъдауæй сæвæрдтой Кады гирляндæ дæр æмæ уый фæстæ бæрæгбонон мадзал байгом кодтой мадзаламонджытæ Кæркуысты Иринæ æмæ Якубова Камилла. Уыдон цыбыртæй æрдзырдтой Стыр Фыдыбæстæйон хæсты тыххæй æмæ бузныг загътой æппæт ветерантæн дæр 9-æм майы бæрæгбоны сæраппонд. Мадзаламонджытæ ма банысан кодтой, зæгъгæ, кæддæрау районы цæрджытæ кæй нал буц кæнынц Стыр Фыдыбæстæйон хæсты ветеранты æмæ дзы абон иу дæр сæрæгас кæй нал у æмæ сын адæм сæ рухс нæмттæ ссардтой иу уысм æмырæй алæугæйæ.

Цытджын мадзалы раныхас кодта Дзауы районы администрацийы сæргълæууæг Джиоты Андрей. Уый бæрæгбоны цытæн загъта арфæйы ныхæстæ æмæ цыбыртæй æрдзырдта хæсты даргъ историйыл.

«Азтæ цæуынц, фæлæ адæмæй нæ рох кæны уыцы диссаджы хæст. Уый уыд уæззау фæл-варæн нæ адæмæн, уымæн æмæ аххæссыд фондз азы æмæ уал азы сæ туг калдтой нæ уæлахиз-хæсджытæ. 1941 азы 22 июны нæ Райгуырæн бæстæм немыцаг тыххæйисджытæ куы æрбабырстой, уæд фыццаг бонæй адæм слæууыдысты знаджы ныхмæ æмæ суанг йæ кæронмæ хæцыдысты фашизмы ныхмæ. Уæлахизхæсджытæ бавзæрстой стыр фыдæбон æмæ хъизæмæрттæ æмæ сын никуы хъæуы рох кæнын сæ рухс нæмттæ», – загъта Джиоты Андрей.

Стыр Фыдыбæстæйон хæсты цауты тыххæй, æмæ Уæлахизы фæдыл, раныхас кодта районы æфсæддон къамисар Санахъоты Юри дæр. Уый цыбыртæй радзырдта Дзауы районæй хæсты быдырмæ чи фæцыдис, уыдон кадимæ куыд æххæст кодтой сæ хæс Фыдыбæстæйы раз, сæ нæмттæ сæнусон кæнгæйæ.

Районы фæллойгæнджытæ æмæ администрацийы разамынад «Кады аллея»-йы уæлахизхæссæг хæстонты номарæн цырты раз цытджын æгъдауæй сæвæрдтой веноктæ æмæ дидинджытæ æмæ банысан кодтой, кæддæриддæр кæй хъæуы кад кæнын хæствæллад ветерантæн, уый.

Цытджын мадзалы фæстæ фæндагæн дæллаг фарс цы улæфæн парк ис, уырдæм Уæрæсейы Федерацийы Æдасдзинады Федералон службæйы Арæнгæрон управленийы службæгæнджыты иу къорд, адæмы фæхуыдтой быдырон къæбицмæ æмæ адæм ацаходыдтой сæ арæзт æфсæддон касæй. Ам скъоладзау фæсивæд хъæбатыр хæстонты æмæ хæсты тыххæй бакастысты æмдзæвгæтæ, афтæ ма сæххæст кодтой цалдæр зарæджы дæр. Уæдмæ мадзал адарддæр бæрæгбонон концертæй, цыран хайад райстой районы сфæлдыстадон къордтæ.

Стыр Уæлахизы бæрæгбон ахицæн фейерверкæй.

ЦХУЫРБАТЫ Ларисæ

Comments are closed, but trackbacks and pingbacks are open.